މަރަދޫފޭދޫގައި ކުއްޖަކަށް ފުލުހުން އަނިޔާކުރި ކަމަށް ބުނާ މައްސަލައެއް ބަލަނީ

އައްޑޫ މަރަދޫފޭދޫގައި ކުއްޖަކަށް ފުލުހުން އަނިޔާކުރި ކަމަށް ބުނާ މައްސަލައަކާ ގުޅިގެން އެކަން ހިނގާފައިވާ ގޮތެއް ބަލަމުން އަންނަ ކަމަށް ފުލުހުން މިއަދު ބުނެފި އެވެ.

ފުލުހުން އެހެން ބުނީ، ކޯޓު އަމުރަކާ ނުލައި ފުލުހުން ގޮސް ކުޑަކުއްޖެއްގެ އަތުގައި ބިޑި އަޅުވައި އަނިޔާކުރި ކަމަށް ބުނެ ސޯޝަލް މީޑިއާގައި ވީޑިއޯއެއް އާންމު ކުރުމުންނެވެ.

އެ ވީޑިއޯ އާންމުކުރި މީހާ ސޯޝަލް މީޑިއާގައި ބުނީ، ފުލުހުން އެ ކުއްޖާ ދޫކޮށްލީ އަނިޔާކުރާ އަޑު އިވިގެން، އެ ސަރަހައްދަށް މީހުންް އެއްވުމުން ކަމަށެވެ. އެކަމަކު، ފުލުހުން އެ ކުއްޖާ އަށް އަނިޔާކުރާ ތަނެއް އެ ވީޑިއޯއަކުން ނުފެނެ އެވެ. ވީޑިއޯ އިން ފެންނަނީ ފުލުހުންނާއެކު އުމުރުން ގާތްގަނޑަކަށް 14 ވަރަކަށް އަހަރުގެ ފިރިހެން ކުއްޖަކު ހުރި މަންޒަރެވެ.

އެ ތަނުގައި ތިބި މީހުން ގޮސް ވީ ގޮތް ސާފުކުރުމުން، އެ ކުއްޖާ ބުނީ ފުލުހުން އޭނާގެ އަތުގައި ބިޑި އަޅުވައި، "ކަލޭމެންނަށް އެއްވެސް ކަމެއް ނުކުރެވޭނެ" ކަމަށް ބުނި ކަމަށެވެ. އަދި އެ ކުއްޖާގެ ބޯ ފާރުގައި ޖެއްސީ ކާކުތޯ އެހުމުން ކޮންމެވެސް މީހަކަށް އިޝާރާތް ކޮށްފައި ބުނީ އެކަން ކުރީ "ޒެޑޭ" ކަމަށެވެ. ނަމަވެސް އެއީ ކާކު ކަމެއް ވީޑިއޯއަކުން ސާފެއް ނޫނެވެ.

ބަޔަކު ގޮސް މި ވީޑިއޯ ކުރިއިރު އެ ތަނުގައި ފުލުހުން ތިބި ތަން ވެސް ފެނެ އެވެ.

އެ މައްސަލައިގައި ފުލުހުން ބުނީ އެ ވީޑިއޯގެ މައްސަލަ ފުލުހުންގެ ސަމާލުކަމަށް އައިސްފައިވާ ކަމަށެވެ. އަދި އެކަން ހިނގި ގޮތާ ގުޅޭ މައުލޫމާތު ފުލުހުންގެ ޕްރޮފެޝަނަލް ސްޓޭންޑާޑްސް ކޮމާންޑް ސާފުކުރަމުން އަންނަ ކަމަށް ބުންޏެވެ.

"މި މައްސަލައިގައި ފުލުހުން އަމަލުކުރަންޖެހޭ ގޮތާ ހިލާފަށް އަމަލުކޮށްފައިވާ ކަމަށް ތުހުމަތު ކުރެވިއްޖެ ނަމަ، ފުރިހަމަ ތަހުގީގެއް ހިންގައި އެކަމާ ގުޅިގެން އަޅަން ޖެހޭ ފިޔަވަޅު އަޅާނެ ވާހަކަ ދަންނަވަން،" ފުލުހުންގެ މީޑިއާ އޮފިޝަލް ވިދާޅުވި އެވެ..

މީގެ ކުރިން ވެސް ވަނީ އެކި މީސްމީހުންނަށް ފުލުހުން އަނިޔާކުރާ މައްސަލަ ފެންމަތިވެ، ބައެއް ފުލުހުންނަށް ފިޔަވަޅު އަޅައިފަ އެވެ.