މުސްކުޅިއެއްގެ އެވޯޑް ރާނީ ގަބޫލެއް ނުކުރެއްވި

21 އޮކްޓޯބަރ 2021

އިނގިރޭސިވިލާތުގައި ނެރޭ ހަފުތާ މަޖައްލާއެއް ކަމަށްވާ "ދި އޯލްޑީ" އިން އެ ގައުމުގެ ރާނީ އެލިޒަބު ދޭކަށް މި އަހަރު އަރުވަން ނިންމި "އޯލްޑީ އޮފް ދި އިޔާ" ގެ އެވޯޑް ގަބޫލު ކުރައްވަން ދެކޮޅު ހައްދަވައިފި އެވެ.

އަހުމަދު އަދްޝަން

މިހާރު އުމުރުފުޅުން 95 އަހަރުގެ ރާނީ އަށް އެވޯޑް ދޭން ނިންމައި އެވޯޑްގެ ޗެއާމަން ގައިލްސް، ރާނީގެ ޕްރައިވެޓް ސެކްރެޓަރީ ސާ އެޑްވަޑް ޔަންގަށް ޖުލައި މަހުގެ 30 ގައި ފޮނުއްވި ސިޓީއެއްގައި ވިދާޅުވީ ރަނި ކަމަށް އަންނަ އަހަރު 70 އަހަރު ފުރޭ އެލިޒަބަތަށް "އޯލްޑީ އޮފް ދި އިޔާ" ގެ އެވޯޑް ދޭން ނިންމާފައިވާތީ އެކަމާ ރާނީ ދެކެވަޑައިގަންނަވާ ގޮތެއް ސާފުކޮށްދޭން އެދިވަޑައިގަންނަވާ ކަމަށެވެ.

އެ ސިޓީގެ ޖަވާބުގައި އޯލްޑީ އަށް ރާނީގެ އެސިސްޓަންޓް ޕްރައިވެޓް ސެކްރެޓަރީ ޓޮމް ލެއިންގް-ބޭކާ އޮގަަސްޓް މަހުގެ 21 ގައި ފޮނުއްވި ސިޓީގައި ވިދާޅުވީ އެވޯޑް ހައްގުވާ ކަމަށް ރާނީ ގަބޫލު ނުކުރައްވާ ކަމަށެވެ. އަދި ރާނީ އަށް އަރުވަން އެއަށް ވުރެ ހައްގު އެވޯޑަކަށް މަސައްކަތް ކުރެއްވުމަށް އެދިވަޑައިގެންފައިވެ އެވެ. އެ ސިޓީގެ ކޮޕީއެއް ވެސް ބައެއް މީޑިއާތަކުގައި އާންމުކޮށްފައިވެ އެވެ.

The Queen has a busy schedule over the coming weeks so her response, through her Private Secretary, to @OldieMagazine struck just the right cord when she said 'You as you feel'. In other words thank you but no thank you - there must be someone more worthy for the award pic.twitter.com/fhaYKeepX6
— Dickie Arbiter ?? (@RoyalDickie) October 19, 2021

"ރާނީ ގަބޫލެއް ނުކުރައްވާ އެކަމަނާ އަށް [ތި] އެވޯޑް ހައްގުވާ ކަމަކަށް. އަދި އެވޯޑްގެ ޝަރުތަށް ފެތޭ ކަމަކަށް ވެސް. ރާނީ ދެކެވަޑައިގަންނަވާ ގޮތުގައި މީހާގެ އުމުރު ވަޒަން ކުރާނީ އެ މީހަކު އަމިއްލަ އަށް އުމުރާ ގުޅޭ ގޮތުން ދެކޭ ގޮތެއްގެ މައްޗަށް." ސިޓީގައި ވިދާޅުވެފައިވެ އެވެ.

ސިޓީ ނިންމަވާލައްވާފައި އޮތީ ރާނީގެ ފަރާތުން ހެޔޮ ދުއާތަކާ އެކީގަ އެވެ.

"ދި އޯލްޑީ" އިން ދޭ އެވޯޑަކީ ދުވަސްވީ މީހުންގެ ހިދުމަތްތައް އަގު ވަޒަން ކުރުމުގެ ގޮތުން ދެމުން އަންނަ އެވޯޑެކެވެ. ފާއިތުވި 29 އަހަރުގެ ތެރޭގައި އެ އެވޯޑް އެކި ދާއިރާތަކުން ފާހަގަ ކޮށްލެވުނު ދުވަސްވީ މީހުންނަށް ދީފައިވެ އެވެ.

Comments