ވަރިވިޔަސް ދަރިންގެ ކަންކަމުގައި އުޅެންވީ އެކުގައި

ދިރިއުޅުމެއްގެ ފޮނި މޭވާ ލިބެނީ ދެމީހުންނަށް ދަރިން ލިބި ހަމަޖެހޭ ދިރިއުޅުމެއް ފެށޭ ހިސާބުންނެވެ. ނަމަވެސް ކޮންމެވެސް ސަބަބަކާ ހުރެ ދިރިއުޅުމުގެ ވަކި ހިސާބަކުން ދެ މީހުން ދުރުވާން ޖެހެ އެވެ. ދަރިންތިބެމެ، ކުދިންގެ ކަންކަން ދެ މީހުން ވަކިވެގެން ކުރަންޖެހޭ ގޮތް އަހަރެމެންނަށް އޮންނަނީ އޮޅިފަ އެވެ.

ވަރިވުމަކީ ކުދިންގެ ކަންކަން ނުބެލޭނެ ސަބަބަކަށް ނުހަދާށެވެ. ވަރިވަނީ ދެމަފިރިންނެވެ. ދަރިންގެ މައިންބަފައިންނަކީ އަދިވެސް ހަމަ އެ ދެ މީހުންނެވެ. އެ ގުޅުމަށް ބަދަލެއް އައިސްގެން ނުވާނެ އެވެ. ދެ މީހުން ވަކިވި ނަމަވެސް ކުދިންގެ ހުރިހާ ކަމެއްގައި ވެސް ދެމީހުންނަށް ބައިވެރިވެވޭނެ އެވެ.

މިއީ ވަރިވުމަށް ފަހު ވެސް ދަރިންގެ ކަންކަމުގައި މައިންބަފައިންގެ އެއްބާރުލުން ބޭއްވުމާ ގުޅޭ ގޮތުން ސައިކޮލޮޖީ ޓުޑޭ ވެބްސައިޓްގައިވާ ބައެއް ޓިޕްސް އެވެ.

ދަރިންގެ ކަންކަމުގައި އެއްކޮށް މަސައްކަތް ކުރުން

ވަރިވެގެން އުޅުނު ކަމުގައި ވިއަސް ދެ މީހުންނަކީ ވެސް ދަރިންގެ މަންމަ ނުވަތަ ބައްޕަ ކަމުގައި ވާ ނަމަ، އެކަކު އަނެކަކަށް އިހުތިރާމް ކުރަންޖެހެ އެވެ. ކުދިންގެ ކަންކަމުގައި ދެމީހުން ވެސް ސުލްހަވެރިކަމާ އެކު މަސައްކަތްކުރަން ޖެހެ އެވެ.

ދެ މީހުންނަކީ ވެސް ވަރިވެ، އާ ކައިވެންޏެއް ކޮށްގެން އުޅޭ ބައެއް ނަމަ، ކައިވެނި ކޮށްގެން އުޅޭ ބައިވެރިޔާ އަށް ކުދިންގެ ބައްޕަ/މަންމަ އާ ބާއްވަންޖެހޭ ގުޅުން ވިސްނައިދޭން ޖެހެ އެވެ. ހިނިތުންވުމާ އެކު ދަރިންގެ ބައްޕަ/މަންމައާ ވާހަކަ ދެއްކުމަކީ ދަރިންނަށް ނަމޫނާއަކަށް ދައްކަންޖެހޭ ކަމެއްކަން ވެސް، އިނދެގެން އުޅޭ މީހާ އަށް ވިސްނައިދޭން ޖެހެ އެވެ.

އިހުތިރާމްކުރުން

ވަރިވާން މެދުވެރިވާނީ ވެސް ކޮންމެވެސް ސަބަބުތަކެއް ހުރެގެންނެވެ. ނަމަވެސް ވަރިކުރި ފިރިމީހާ/އަނބިމީހާ އަށް އިހުތިރާމް ކުރުމުން ދަރިންގެ ކަންކަމުގައި ދެމީހުންގެ ސަޕޯޓު ދެވޭ މިންވަރު އިތުރުވެ އެވެ. އިހުތިރާމަކީ އޮންނަންޖެހޭ އެއްޗެކެވެ. އެކަކު އަނެކަކަށް އިހުތިރާމު ނުކޮށް ކުދިންގެ ކަންކަން ރަނގަޅަކަށް ނުކުރެވޭނެ އެވެ.