އިންޑިއާގެ ކްރިކެޓް ލެޖެންޑް ގަންގޫލީގެ ވާހަކަ ކިޔައިދޭ ފިލްމު އިއުލާންކޮށްފި

އިންޑިއާގެ ކްރިކެޓް ލެޖެންޑް ސޯރަވަން ގަންގޫލީގެ ވާހަކަ ކިޔައިދޭ ފިލްމެއް ހަދަން އުޅޭ ވާހަކަ ދެކެވެމުން އަންނަނިކޮށް އެ ފިލްމު ރަސްމީކޮށް އިއުލާންކޮށްފި އެވެ.

މި ފިލްމު ޕްރޮޑިއުސްކުރަނީ ޑައިރެކްޓަރު ލަވް ރަންޖަނާއި ޕްރޮޑިއުސަރު އަންކޫރް ގަރްގް ގުޅިގެންނެވެ. ނަމަވެސް ގަންގޫލީގެ ބައޮޕިކާ ބެހޭ އިތުރު އެއްވެސް މައުލޫމާތެއް އަދި ހާމައެއްނުކުރެ އެވެ.

ލަވް އަކީ ބެލުންތެރިންގެ ވަރަށް ބޮޑު ތަރުހީބެއް ލިބުނު 2018 ގެ ފިލްމު "ސޯނޫ ކޭ ޓިޓޫ ކީ ސްވީޓީ" ގެ ޑައިރެކްޓަރެވެ. އޭނާ މިހާރު އަންނަނީ ރަންބީރް ކަޕޫރާއި ޝްރަދާ ކަޕޫރާ އެކު ފިލްމެއްގެ މަސައްކަތްކުރަމުންނެވެ.

ގަންގޫލީގެ ބައޮޕިކް ހަދާކަން އިއުލާންކޮށްފައި މި ވަނީ އޭނާގެ ވާހަކަ ކިޔައިދޭ ފިލްމެއް ހަދަން ކަރަން ޖޯހަރާއި އެކްތާ ކަޕޫރް ވެސް ކުރިން ޝައުގުވެރިކަން ފާޅުކޮށްފައި ވަނިކޮށެވެ. އެކަމާ ބެހޭ ގޮތުން މިދިޔަ އަހަރު ގަންގޫލީ ބުނީ ބައޮޕިކެއް ހެދުމުގެ ޝައުގުވެރިކަން އެންމެ ފުރަތަމަ ފާޅުކުރި ޕްރޮޑިއުސަރަކީ އެކްތާ ކަމަށެވެ. އަދި އެކަމާ ބެހޭ ގޮތުން މަޝްވަރާތެއް ކުރެވުނަސް ފަހުން އެކަމާ ބެހޭ އެއްވެސް ވާހަކައެއް ނުދެކެވޭ ކަމަށް ބުންޏެވެ.

އޭރު ގަންގޫލީ ބުނި ގޮތުގައި ބައޮޕިކެއް ހަދާ ނަމަ ފިލްމުގައި އޭނާގެ ރޯލު ކުޅެން އެންމެ ކަމުދާނެ އެކްޓަރަކީ ރިތިކް ރޯޝަނެވެ.

ކްރިކެޓުން އިންޑިއާ އަށް ބޮޑެތި ކާމިޔާބީތަކެއް ހޯދައި ދިނުމުގައި ހިއްސާވި ކުޅުންތެރިޔާ ވަނީ 2008 ގައި ކްރިކެޓުން ރިޓަޔާކޮށްފަ އެވެ. މިހާރު އުމުރުން 49 އަހަރުގެ ގަންގޫލީ އަކީ ބޯޑް އޮފް ކޮންޓްރޯލް ފޯ ކްރިކެޓް އޮފް އިންޑިއާ (ބީސީސީއައި) ގެ ރައީސެވެ. އެ މަގާމާ އޭނާ ހަވާލުވީ 2019 ގަ އެވެ. ޕްރޮފެޝަނަލްކޮށް ކްރިކެޓް ކުޅުން ހުއްޓައިލި ނަމަވެސް އިންޑިއާގެ ކްރިކެޓްގެ "މަހާރާޖާ" ގެ ގޮތުގައި މަޝްހޫރުވި ގަންގޫލީ އަކީ ކްރިކެޓް ކުރިއަރުވަން އަބަދު ވެސް މަސައްކަތްކުރާ މީހެކެވެ.

މި ފަހުން ގެނެސްދިން އިންޑިއާ ކްރިކެޓް ތަރިއެއްގެ އެންމެ ކާމިޔާބު ފިލްމަކީ އެމްއެސް ދޯނީގެ ބައޮގްރަފިކަލް ޑްރާމާ "އެމްއެސްދޯނީ: ދި އަންޓޯލްޑް ސްޓީރޯ" އެވެ. ދެހާސް ސޯޅައިގައި ރިލީޒްކުރި ފިލްމުގައި ދޯނީގެ ރޯލު ކުޅުނީ މިދިޔަ އަހަރު ދަންޖެހިގެން މަރުވި އެކްޓަރު ސުޝާންތު ސިންގް ރާޖްޕޫތެވެ.