އިންސާނީ ހައްގުތައް ނަގަހައްޓާ ނަމަ، ތާލިބާން ސަރުކާރު ބަލައިގަންނާނެ: އެމެރިކާ

އަފްގާނިސްތާނުގެ ވެރިކަން އިއްޔެ ވައްޓާލައި، ތާލިބާން ޖަމާއަތުގެ ހަނގުރާމަވެރިން ގައުމު ހިފާފައިވާ އިރު، ތާލިބާނުން އުފައްދާ ސަރުކާރެއް އެމެރިކާ އިން ބަލައިގަންނާނެ ހަމައެކަނި ގޮތަކީ، އެ ސަރުކާރުން އިންސާނީ ހައްގުތަކަށް ހުރުމަތްތެރިކޮށް ހިތުން ކަމުގައި އެމެރިކާ އިން ރޭ ބުނެފި އެވެ.

އެމެރިކާގެ ހާރިޖީ ވަޒީރު އެންޓޮނީ ބްލިންކެން ވިދާޅުވި ގޮތުގައި ތާލިބާނުންގެ ސަރުކާރެއް ބަލައިގަތުމާ މެދު އެމެރިކާ ސަރުކާރުން އަދި ވަކި ގޮތެއް ނުނިންމަ އެވެ. ނަމަވެސް ތާލިބާނުން އުފައްދާ ސަރުކާރަކީ، އަފްގާނިސްތާނު ރައްޔިތުންގެ އިންސާނީ ހައްގުތަކަށް ހުރުމަތްތެރިކޮށް ހިތުމުގެ އިތުރުން، ޓެރަރިސްޓުންނަށް އެ ގައުމުން ފުރުސަތު ނުދޭ ސަރުކާރެއް ނަމަ، އެމެރިކާ އިން އެ ސަރުކާރަކާ އެކު މަސައްކަތް ކުރާނެ ކަމަށް ވެސް ބްލިންކެން ވިދާޅުވި އެވެ.

"އަންހެނުންނާއި ކުޑަކުދިން ވެސް ހިމެނޭ ގޮތަށް، އެ ގައުމެއްގެ ރައްޔިތުންގެ އިންސާނީ އަސާސީ ހައްގުތައް ނަގަހައްޓައިނުދޭ، އެމެރިކާ އާއި އެމެރިކާގެ ބައިވެރިންނަށް ހަމަލާދޭން މަސައްކަތްކުރާ ޓެރަރިސްޓު ގުރޫޕްތަކަށް ހިމާޔަތް ދޭ ސަރުކާރަކާ އެކު، ހަމަ ޔަގީނުން ވެސް އެމެރިކާ އިން ގުޅުމެއް ނުބާއްވާނެ."

ބްލިންކެން ވިދާޅުވި ގޮތުގައި ޓެރަރިސްޓުންނަށް ހިމާޔަތް ދިނުން ހުއްޓާލައި، އަފްގާނިސްތާނު ރައްޔިތުންގެ އިންސާނީ އަސާސީ ހައްގުތައް ނަގަހައްޓައިނުދޭ ނަމަ، ތާލިބާން ޖަމާއަތާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އެމެރިކާ އިން އުވައެއް ނުލާނެ އެވެ. އޭގެ ތެރޭގައި، އިގްތިސާދީ ގޮތުން އަޅާފައިވާ ދަތިކުރުމުގެ ފިޔަވަޅުތަކާއި، ތާލިބާންގެ އިސް ވެރިންގެ ދަތުރުފަތުރަށް އަޅާފައިވާ ދަތިކުރުމުގެ ފިޔަވަޅުތައް ވެސް ހިމެނެ އެވެ.

ބްލިންކެން ވިދާޅުވި ގޮތުގައި އަފްގާނިސްތާނުގައި ތާލިބާނުންގެ ސަރުކާރެއް އެކުލަވާލައި ވެރިކަން ކުރަން ފެށިކަމުގައި ވިޔަސް، އެ ސަރުކާރަކުން އެ ގައުމުގެ އިންސާނީ ހައްގުތައް ފުރިހަމައަށް ނެގެހެއްޓުމަށް ބާރުއެޅުމަށްޓަކައި، އިގްތިސާދީ ގޮތުންނާއި ޑިޕްލޮމެޓިކް ގޮތުން އަދި ސިޔާސީ ގޮތުން ވެސް ކުރެވެން ހުރި ހުރިހާ ކަމެއް، ބައިނަލްއަގުވާމީ މުޖްތަމައުން ކުރާނެ އެވެ. އަދި އެ ކަންތަކަށް ތާލިބާނުން ހުރުމަތްތެރިކޮށް ނުހިތާ ނަމަ، އެކަމުގެ އަދަބާ ތާލިބާނުން ކުރިމަތިލާން ޖެހޭނެ ކަމަށް ވެސް ބްލިންކެން ވިދާޅުވި އެވެ.

ތާލިބާނުން އަފްގާނިސްތާނުގެ ވެރިކަން ވައްޓާލައި، ވެރިރަށް ކާބުލް ހިފައި، ރިއާސީ ގަނޑުވަރު ވެސް އެމީހުންގެ ބާރުގެ ދަށަށް ގެނެސްފައިވާއިރު، އެމެރިކާ އާއި އިނގިރޭސި ވިލާތުގެ ސިފައިން މިހާރު މަސައްކަތް ކުރަމުން ދަނީ، އަފްގާނިސްތާނުގައި ތިބި ހުޅަނގުގެ ގައުމުތަކުގެ ޑިޕްލޮމޭޓުން އެ ގައުމުން ބޭރު ކުރުމަށެވެ.

އެ ގޮތުން އިއްޔެ އެކަނި ވެސް 500 އަށް ވުރެ ގިނަ މީހުން އަފްގާނިސްތާނުން ބޭރަށް ގެންދިޔަ ކަމަށް އެމެރިކާގެ އަސްކަރިއްޔާ އިން ބުނެ އެވެ. މި މަސައްކަތުގައި އެމެރިކާއާ އެކު އިނގިރޭސި ވިލާތުގެ ސިފައިން ވެސް ހަރަކާތްތެރި ވަމުން ދެ އެވެ.

ހުޅަނގުގެ ޑިޕްލޮމޭޓުން އަފްގާނިސްތާނުން ބޭލުމަށްޓަކައި، އެމެރިކާ ސިފައިން ވަނީ ކާބުލްގެ ވައިގެ ބަނދަރު އެމީހުންގެ ބާރުގެ ދަށަށް ގެނެސްފަ އެވެ. އަދި ޑިޕްލޮމޭޓުން ބޭރުކުރުމަށް ކުރާ މަސައްކަތަށް އެއްވެސް ހުރަހެއް ނޭޅުމަށް، އެމެރިކާ އިން ވަނީ ތާލިބާނުންނަށް އިންޒާރު ކޮށްފަ އެވެ.

އެމެރިކާ ސިފައިން މިހާރު ކުރިއަށް ގެންދާ، މީހުން ބޭލުމުގެ މަސައްކަތުގެ ތެރެއިން، އެންމެ ފުރަތަމަ އަފްގާނިސްތާނުން ބޭރުކުރީ، އެމެރިކާ އެމްބަސީގައި މަސައްކަތް ކުރާ މުވައްޒަފުންނެވެ. އޭގެ ފަހުން ހުޅަނގުގެ ގައުމުތަކުގެ ޑިޕްލޮމޭޓުންނާއި އެމެރިކާގެ ރައްޔިތުންނެވެ. އަދި ހާއްސަ ވިސާގެ ދަށުން އެމެރިކާ އަށް ދިރިއުޅުން ބަދަލުކުރުމަށް އެމެރިކާ ސަރުކާރުން ހުއްދަ ދީފައިވާ، އަފްގާނު ރައްޔިތުން ވެސް އެ ގައުމުން ބޭރަށް ގެންދާނެ އެވެ.

މީހުން ބޭރު ކުރުމުގެ މަސައްކަތް ކުރިއަށް ދާއިރު، އަފްގާނު ދޫކޮށް ދާން ބޭނުންވާ ގިނަ އަދަދެއްގެ އާންމުންގެ ބަޔަކު ކާބުލްގެ ވައިގެ ބަނދަރަށް ވަނީ ޖަމާވެފަ އެވެ. އެ މީހުން އެމެރިކާގެ އަސްކަރީ މަތިންދާބޯޓުތަކަށް އަރުވާތޯ އާދޭސްކުރަމުން ދާއިރު، މިއަދު ހެނދުނު ފުރަން ތައްޔާރުވި ބޯޓުތަކަށް ގަދަބާރުން އަރަން މަސައްކަތް ކުރި މީހުން މައިތިރި ކުރުމަށް، އެމެރިކާ ސިފައިން ވަނީ ވައިގެ ތެރެއަށް ބަޑި ޖަހައި އިންޒާރު ދީފަ އެވެ.