އެލައިޑުން އަންހެނުންނަށް އަދި ސެކަންޑްރީ ތައުލީމަށް ހާއްސަ އިންޝުއަރެންސް ޕްލޭންތަކެއް ތައާރަފްކޮށްފި

އަންހެނުންނަށް ހާއްސަ ލައިފް އިންޝުއަރެންސް ޕްލޭނަކާއި ސެކަންޑްރީ ތައުލީމަށް ހާއްސަ ޕްލޭނެއް އެލައިޑް އިންޝުއަރެންސުން މިރޭ ތައާރަފްކޮށްފި އެވެ.

"ކަމަނަ"އިގެ ނަން ދީފައިވާ އަންހެނުންނަށް ހާއްސަ އިންޝުއަރެންސް ޕްލޭނާއި ސެކަންޑްރީ ތައުލީމަށް ހާއްސަ ޕްލޭން ތައާރަފްކުރީ ރައީސް އަބްދުﷲ ޔާމީންގެ ސަރުކާރަށް ތިން އަހަރު ފުރުން ފާހަގަކުރުމަށް އެ ކުންފުނިން ބޭއްވި ހަފްލާއެއްގަ އެވެ. އެ ދެ ޕްލޭން ލޯންޗުކޮށްދެއްވީ ހަލްފާ ޝަރަފުވެރި ކޮށްދެއްވި އިކޮނޮމިކް މިނިސްޓަރު މުހައްމަދު ސައީދެވެ.

ކަމަނަ: ކުއްލި ހާލަތުގެ ފަންޑެއް، ބޮޑެތި ބަލިތަކުގެ ފަރުވާ

މިރޭގެ ހަފުލާގައި އެލައިޑުގެ ލައިފް އިންޝުއަރެންސް މެނޭޖަރު ސްރިވާސަން ރާމަކްރިޝްނާ ވިދާޅުވި ގޮތުގައި ރާއްޖޭގެ އިގްތިސާދުގެ ހުރިހާ ދާއިރާއެއްގައި ވެސް އަންހެނުންގެ ދައުރު ބޮޑެވެ. އެކަމަކު، މަސައްކަތަށް ނުކުންނަ އަންހެނުންނަށް ބޮޑެތި ގޮންޖެހުންތަކެއް ކުރިމަތިވާ ކަމަށާއި އެ ފަރާތްތަކުގެ ގިނަ ކަންބޮޑުވުންތަކެއް ވެސް ހުންނަ ކަމަށް އޭނާ ވިދާޅުވި އެވެ.

"މިއީ އެ ހުރިހާ ކަމަކަށް ހައްލު ލިބިގެންދާނެ ޕްލޭނެއް،" ދަރުބާރުގޭގައި ބޭއްވި ހަފުލާގައި ސްރިވާސަން ވިދާޅުވި އެވެ.

އުމުރުން 18 އަހަރާއި 48 އަހަރުގެ ކޮންމެ އަންހެނަކަށް ވެސް ބައިވެރިވޭ މި ސްކީމުގެ ދަށުން އެންމެ ކުޑަކޮށް އިންޝުއަކޮށްދޭ ވަރަކީ 50،000 ރުފިޔާ އެވެ. މި ޕްލޭން ނެގުމަށް ބާރަ އަހަރުން ފެށިގެން 24 އަހަރާ ދެމެދުގެ އެކި އަހަރުތައް ހިމެނޭ ގޮތަށް ހަތް މުއްދަތެއް ހިޔާރު ކުރެވޭނެ އެވެ.

"ކަމަނަ" އިން ލިބޭ މައިގަނޑު ފައިދާތައް:

- ކުއްލި ހާލަތުގެ ފަންޑު: އިންޝުއަކުރާ މިންވަރުގެ ފަސް ޕަސެންޓަށް ވާ ފައިސާ، ފުރަތަމަ ދެ އަހަރަށް ފަހު ކޮންމެ ދެ އަހަރަކުން ހާއްސަ ފަންޑަކަށް ލާނެ. ވަޒީފާ ގެއްލުން ނުވަތަަ ބޮޑު ކަމެއް ދިމާވެގެން މުސާރަ ނުލިބޭ ގޮތަށް ޗުއްޓީ ނަގަން ޖެހުން ފަދަ ކުއްލި ހާލަތެއްގައި ބޭނުން ކުރަން މި ފައިސާ ނެގޭނެ.

- ޕްލޭން ނިމުމުން ލިބޭ ފައިސާ: އިންޝުއަކުރާ މުއްދަތު ހަމަވުމުން، އިންޝުއަކުރި ޖުމްލަ އަގަށް ބޯނަސްގެ ގޮތުގައި ލިބުނު ފައިސާ އާއި ކުއްލި ހާލަތުގެ ފަންޑުގައި ބާކީ ހުރި ފައިސާ ލިބޭނެ.

- މަރުވެއްޖެ ނަމަ ވާރިސަށް ލިބޭ ފައިސާ: އިންޝުއަކޮށްފައިވާ ފަރާތް މަރުވެއްޖެ ނަމަ، އިންޝުއަކުރި ޖުމްލަ އަގުގެ 150 ޕަސެންޓް ފައިސާ އޭނާގެ ވާރިސަށް ދޭނެ. މީގެ އިތުރުން، ބޯނަސްގެ ގޮތުގައި ޖަމާވެފައިވާ ފައިސާ އާއި ކުއްލި ހާލަތުގެ ފަންޑުގައި ހުންނަ ފައިސާ ވެސް ލިބޭނެ.

- ބޮޑެތި ބަލިތަކުގެ ފަރުވާ އަށް ދޭ ފައިސާ: ބޮޑު ބައްޔެއް ވެއްޖެ ނަމަ، އިންޝުއަކޮށްފައިވާ ޖުމްލަ އަގުގެ 50 ނުވަތަ 100 ޕަސެންޓަށް ވާ ފައިސާ، އެ ބައްޔެއްގެ ފަަރުވާ އަށް ލިބޭނެ. އަދި ކުރިއަށް އޮތް ތަނުގައި ޕްރިމިއަމް ފީ ދައްކަން ނުޖެހި، މި ޕްލޭންގެ ދަށުން ލިބޭ ހުރިހާ ފައިދާއެއް ލިބެމުން ދާނެ.

- ދާއިމީ ނުކުޅެދުންތެރިކަމެއް ކުރިމަތިވުމުން ލިބޭ ފައިދާ: އެކްސިޑެންޓެއް ނުވަތަ އެފަދަ އެހެން ވެސް ކަމަކުން ދާއިމީ ނުކުޅެދުންތެރިކަމެއް ކުރިމަތިވެއްޖެ ނަމަ، އިންޝުއަކޮށްފައިވާ ޖުމްލަ އަގަށް ވާ ފައިސާ ލިބޭނެ. އަދި ކުރިއަށް އޮތް ތަނުގައި ޕްރިމިއަމް ފީ ދައްކާކަށް ނުޖެހޭނެ.

- އެކްސިޑެންޓެއްގައި މަރުވެއްޖެ ނަމަ ލިބޭ ފައިދާ: އެކްސިޑެންޓެއް ނުވަތަ އެފަދަ އެހެން ވެސް ކަމެއްގެ ސަބަބުން މަރުވެއްޖެ ނަމަ، އިންޝުއަކޮށްފައިވާ ޖުމްލަ އަގަށް ވާ ފައިސާ ލިބޭނެ.

ސެކަންޑްރީ ތައުލީމަށް ފަހަށް ރައްކާކުރެވޭ ޕްލޭނެއް

ސެކަންޑްރީ ތައުލީމަށް ކުރަންޖެހޭ ހަރަދުތައް ހަމަޖެއްސޭނެ ޕްލޭނެއް ވެސް އެލައިޑުން ވަނީ މިރޭ ތައާރަފްކޮށްފަ އެވެ. އުމުރުން ފަސް އަހަރުން ދަށުގެ ކޮންމެ ކުއްޖަކަށް، އެ ކުއްޖެއްގެ މަންމަ ނުވަތަ ބައްޕަ ނަގާ ޕްލޭނުގެ ދަށުން އިންޝުއަކުރަން ބޭނުންވާ މިންވަރާއި ޕްރިމިއަމް ފީ އަމިއްލަ އަށް ކަނޑައެޅުމުގެ އިހުތިޔާރު އޮންނާނެ އެވެ. އެންމެ ކުޑަކޮށް އިންޝުއަކުރެވޭނީ 50،000 ރުފިޔާ އެވެ.

މި ޕްލޭންގެ ދަށުން، ކުއްޖާގެ އުމުރުން 13 އަހަރު ވުމުން ފައިސާ ލިބެން ފަށާނެ އެވެ. އެ ގޮތުން، 18 އަހަރު ފުރެންދެން، އިންޝުއަކުރި ޖުމްލަ އަދަދުގެ 15 ޕަސެންޓް ލިބޭނެ އެވެ. އަދި ދަރިފުޅު އެ އަށް ވުރެ ބޮޑުވުމުން، އިންޝުއަކުރި ޖުމްލަ އަދަދުގެ 25 ޕަސެންޓާ އެކު، ބޯނަސްގެ ގޮތުގައި ޖަމާވެފައިވާ ފައިސާ ވެސް ލިބޭނެ އެވެ.

މަތީ ތައުލީމަށް ވަކި އިންޝުއަރެންސް ޕްލޭނެއް މިހާރު ވެސް ދޫކުރާ އެލައިޑުން ސެކަންޑްރީ އަށް ހާއްސަކޮށް ތައާރަފްކުރި ޕްލޭން ނަގާފައިވާ ބެލެނިވެރިޔާ މަރުވެއްޖެ ނަމަ، ކުރިއަށް އޮންނަ މުއްދަތުގައި ޕްރިމިއަމް ފީ ދައްކާކަށް ނުޖެހޭނެ އެވެ. އަދި އެ ކުއްޖަކަށް މި ޕްލޭންގެ ދަށުން ފައިދާ ލިބޭނެކަން ކަށަވަރުކުރާނެ އެވެ.

ރާއްޖޭގެ އެންމެ ބޮޑު އިންޝުއަރެންސް ކުންފުނި ކަމަށްވާ އެލައިޑުން ގިނަ ހިދުމަތްތަކެއް ފޯރުކޮށްދެ އެވެ. އޭގެ ތެރޭގައި ލައިފް އިންޝުއަރެންސާއި ހެލްތު އިންޝުއަރެންސާއި ޓްރެވަލް އިންޝުއަރެންސާއި ބިދޭސީންގެ އިންޝުއަރެންސާއި ދޯނިފަހަރުގެ އިންޝުއަރެންސްގެ އިތުރުން، އަޔާދީ ތަކާފުލްގެ ނަމުގައި އިސްލާމިކް އިންޝުއަރެންސް ޕްލޭންތަކެއް ދޫކުރާ ވިންޑޯއެއް ވެސް ވަނީ ތައާރަފްކޮށްފަ އެވެ.