އިންފޮމޭޝަން ކޮމިޝަނަރަކު އައްޔަން ނުކުރެވި އެތައް ދުވަހެއް، އަނެއްކާވެސް އިއުލާންކޮށްފި!

އިންފޮމޭޝަން ކޮމިޝަނަރުގެ މަގާމު ހުސްވެ، ގާނޫނުގައި ބުނާ މުއްދަތު ހަމަވިތާ 100 ދުވަސް ފަހުން، އެ މަގާމަށް ކުރިމަތިލުމަށް ރައީސް އޮފީހުން އަަނެއްކާވެސް ފުރުސަތު ހުޅުވާލައިފި އެވެ.

އިންފޮމޭޝަން ކޮމިޝަނަރުގެ މަގާމު ހުސްވީ ކުރިން އެ މަގާމުގައި ހުންނެވި ހުސައިން ފިޔާޒު މޫސާ މި އަހަރުގެ މާޗު 21 ގައި އިސްތިއުފާ ދެއްވުމުންނެވެ. އޭނާ އިސްތިއުފާ ދެއްވިތާ މިއަދަށް 106 ދުވަސް ހަމަވާނެ އެވެ.

ގާނޫނުގައިވާ ގޮތުން އިންފޮމޭޝަން ކޮމިޝަނަރުގެ މަގާމު ހުސްވެއްޖެ ނަމަ އެ މަގާމަށް 60 ދުވަހުގެ ތެރޭގައި ބޭފުޅަކު އައްޔަނު ކުރަން ޖެހެ އެވެ.

ރައީސް އޮފީހުން މިއަދު ކުރި އިއުލާނެއްގައި ބުނީ، މިދިޔަ ޖޫން މަހުގެ ދެވަނަ ދުވަހު އެ އޮފީހުން އިންފޮމޭޝަން ކޮމިޝަނަރު ކަމަށް ކުރިމަތިލުމަށް ފުރުސަތު ހުޅުވައިލި ނަމަވެސް އެ މަގާމަށް އެކަށީގެންވާ އަދަދަކަށް އެއްވެސް ފަރާތަކުން ކުރިމަތިލާފައި ނުވާތީ އަލުން އެ ފުރުސަތު ހުޅުވައިލީ ކަމަށެވެ.

ރައީސް އޮފީހުން ބުނިގޮތުގައި، އިންފޮމޭޝަން ކޮމިޝަނަރުގެ މަގާމަށް ކުރިމަތިލާން ބޭނުންވާ މީހުން މި މަހުގެ 12-13 ވަނަ ދުވަހުގެ ހެނދުނު 10:30 އިން މެންދުރު 12:30 އަށް ހުށަހެޅޭނެ އެވެ.

އިންފޮމޭޝަން ކޮމިޝަނަރުގެ މަގާމަށް ބޭފުޅަކު އައްޔަން ނުކުރެވި މިހާ ދިގުލައިގެން ދިޔަ އެއް ސަބަަބަކީ އެ މަގާމަށް މީހަކު ހޯދަން ފުރަތަމަ އިއުލާނު ކުރުމުން ހުށަހެޅި މީހުންގެ ތެރެއިން ރައީސް އޮފީހުން ރައްޔިތުންގެ މަޖިލީހަށް ހުށަހެޅި ތިން ނަމަށް މިނިވަން މުއައްސަސާތަކުގެ ކޮމިޓީން ރުހުން ނުދިނުމުންނެވެ.

އިންފޮމޭޝަން ކޮމިޝަނަރަކީ މީގެ ހަތް އަހަރު ކުރިން ފާސްކުރި، މައުލޫމާތު ހޯދައި ލިބިގަތުމުގެ ގާނޫނުގެ ދަށުން ރައްޔިތުންގެ މަޖިލީހުން އައްޔަންކުރާ މަގާމެކެވެ.