ވަކިކުރި ސިޔާސީ މުވައްޒަފުންގެ މައުލޫމާތު ހާމަކުރަން އައިކޮމުން އަންގައިފި

ދައުލަތުގެ ހަރަދު ކުޑަކުރުމަށްޓަކައި ސިޔާސީ މުވައްޒަފުން މަދުކުރަން ފަށާފައިވާ މަސައްކަތުގެ ދަށުން އެކި މިނިސްޓްރީތަކުން ވަކިކުރި ކަމަށް ސަރުކާރުން ބުނެފައިވާ 248 ސިޔާސީ މުވައްޒަފުންގެ މައުލޫމާތު ފަސް ދުވަހުގެ ތެރޭގައި ހާމަކުރަން އިންފޮމޭޝަން ކޮމިޝަނަރު އަހުމަދު އާހިދު މިއަދު އަންގަވައިފި އެވެ.

އިގުތިސާދީ ރިފޯމް އެޖެންޑާގެ ތެރެއިން، އެކި މިނިސްޓްރީތަކުން 228 ސިޔާސީ މުވައްޒަފުން ވަކިކުރަން ނިންމާފައިވާކަން ރައީސް ޑރ. މުހައްމަދު މުއިއްޒު އިއުލާން ކުރެއްވީ މިދިޔަ އޮކްޓޯބަރު 15 އިގަ އެވެ. އެކަމަށް ކަނޑައެޅި މުއްދަތު ހަމަވިއިރު 248 ސިޔާސީ މުވައްޒަފުން ވަކިކޮށްފައިވާ ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވަނީ އެކްސްގައި ކުރެއްވި ޕޯސްޓެއްގައި ވިދާޅުވެފަ އެވެ.

ނަމަވެސް ސިޔާސީ މުވައްޒަފުން ވަކިކުރީ ކޮން މިނިސްޓްރީތަކަކުން ކަމެއް އަދި އެއީ ކޮން ބައެއް ކަން ހާމައެއް ނުކުރެ އެވެ. އެ މައުލޫމާތު ހޯދަން "މިހާރު" އިން މައުލޫމާތު ހޯދައި ލިބިގަތުމުގެ ގާނޫނުގެ ދަށުން ހުށަހެޅުމުން ރައީސް އޮފީހުން ވަނީ އެއީ ޒާތީ މައުލޫމާތު ކަމަށް ބުނެ، މައުލޫމާތު ހާމަކުރަން ދެކޮޅު ހަދައިފަ އެވެ.

އެ ނިންމުން އިންފޮމޭޝަން ކޮމިޝަނަރުގެ އޮފީހުގައި ރިވިއު ކުރުމުން މިއަދު ބޭއްވި އަޑުއެހުމުގައި އެކަމާ ގުޅޭ ގޮތުން ވާހަކަ ދައްކަން ފުރުސަތު ދިނުމަށް ފަހު، ކޮމިޝަނަރުގެ އޮފީހުން ވަނީ މައްސަލާގައި ގޮތެއް ނިންމައިފަ އެވެ.

އިންފޮމޭޝަން ކޮމިޝަނަރު ނިންމެވުމުގައި ވިދާޅުވީ، ވަކިކުރި ސިޔާސީ މުވައްޒަފުންގެ ދާއިމީ އެޑްރެހަކީ ޒާތީ މައުލޫމާތެއް ކަމަށާއި އެ މައުލޫމާތު ހާމަކުރަން ނުޖެހޭނެ ކަމަށެވެ. ނަމަވެސް، ސިޔާސީ މުވައްޒަފުންނަކީ ގާނޫނުއަސާސީގެ ދަށުން ރައީސުލްޖުމްހޫރިއްޔާ އައްޔަން ކުރާ މުވައްޒަފުންގެ މައުލޫމާތަކީ އާންމު މަސްލަހަތުގެ ދަށުން ހިފެހެއްޓޭނެ މައުލޫމާތެއް ނޫން ކަމަށް ކޮމިޝަނަރު ކަނޑައެޅުއްވި އެވެ.

ރައީސްގެ ރިފޯމް އެޖެންޑާގެ ދަށުން ވަކިކުރި ސިޔާސީ މުވައްޒަފުންގެ ނަމާއި މަގާމާއި ލިބުނު މުސާރަ އަދި ވަކިކުރި ތާރީހަކީ ހާމަކުރަން ޖެހޭނެ މައުލޫމާތު ކަމަށާއި އެއީ އާންމު މަސްލަހަތު ހިމެނޭ ކަމެއް ކަމަށް ކޮމިޝަނަރުގެ ނިންމުމުގައިވެ އެވެ. އެހެންވެ، ރަސްމީ ފަސް ދުވަސް ތެރޭ މައުލޫމާތު ހާމަކުރަން ރައީސް އޮފީހުގެ މައްޗަށް ކޮމިޝަނަރު އަމުރު ކުރެއްވި އެވެ.

އެ ނިންމުން ހައި ކޯޓުގައި އިސްތިއުނާފު ކުރަން ބޭނުންވާ ނަމަ އެކަން ކުރަން ރައީސް އޮފީހަށް 30 ދުވަހުގެ މުއްދަތެއް ލިބެ އެވެ.

ސިޔާސީ މުވައްޒަފުންގެ މައުލޫމާތު ނުދޭން ރައީސް އޮފީހުން ދައްކާ ސަބަބަކީ، ވަކިކުރި މުވައްޒަފުންގެ ނަމަކީ ސުޕްރީމް ކޯޓުގެ ހުކުމެއްގައި ބަޔާންކޮށްފައިވާ ފަދައިން ގާނޫނުއަސާސީގެ 24 ވަނަ މާއްދާ އިން ކަށަވަރު ކޮށްދީފައިވާ ހައްގުގެ ތެރޭގައި ހިމެނޭ ޒާތީ މައުލޫމާތެއް ކަމަށް ބުނެ އެވެ. އެހެންވެ، އެއީ ދޫކުރެެވެން ނެތް މައުލޫމާތެއް ކަމަށް ރައީސް އޮފީހުން ވަނީ ބުނެފަ އެވެ.

ވަކިކުރި މުވައްޒަފުން މަސައްކަތް ކުރި މިނިސްޓްރީތަކުގެ ނަންތަކާއި މަގާމާއި ވަނަވަރު ހާމަކޮށްފި ނަމަ އެ މީހުންގެ ޒާތީ މައުލޫމާތުތަކެއް ހާމަވެދާނެ ކަމަށް ރައީސް އޮފީހުން ބުންޏެވެ. ތިންވަނަ ފަރާތެއްގެ ޒާތީ މައުލޫމާތު އެ ފަރާތެއްގެ ރުހުމެއް ނެތި ހާމަނުކުރެވޭނެ ކަމަށް ގާނޫނުގައި ބަޔާންކުރާތީ، އެ މައުލޫމާތު ވެސް ދެވެން ނެތް ކަމަށް އެ އޮފީހުން ބުންޏެވެ.

ގާނޫނުއަސާސީގެ 24 ވަނަ މާއްދާގައި ބުނަނީ ކޮންމެ މީހެއްގެ ޒާތީ އަދި އާއިލީ ދިރިއުޅުމާއި ގޮވަތިގެދޮރާއި އަނެކުންނާ ކުރާ ޒާތީ މުއާސަލާތުތަކަކީ ހުރުމަތްތެރިވެގެންވާ ކަންކަމާއި ތަންތަން ކަމަށެވެ. ހަމަ ކޮންމެ މީހަކުމެ، އަނެކުންގެ މި ބުނެވުނު ހައްގުތަކަށް ހުރުމަތްތެރިކޮށް ހިތާން ވާނެ ކަމަށް މާއްދާގައި ބުނެ އެވެ.

ރައީސް އޮފީހުން އެ މާއްދާއާ ހަވާލާދީ، ފާހަގަކުރި ސުޕްރީމް ކޯޓުގެ ހުކުމަކީ މައުލޫމާތު ހޯދައި ލިބިގަތުމުގެ ގާނޫނުގެ ދަށުން ބީއެމްއެލްގެ މުވައްޒަފުންތަކެއްގެ މަގާމާއި މުސާރައިގެ ތަފްސީލު ހޯދަން އެދުނު މައްސަލައެއްގައި ބީއެމްއެލްއިން ކޯޓަށް ދިޔުމުން ކުރި ހުކުމެއް ކަމަށެވެ. އެ ހުކުމުގައި ބީއެމްއެލްގެ މުވައްޒަފުންގެ މައުލޫމާތަކީ ޒާތީ މައުލޫމާތު ކަމަށް ކަނޑައަޅައި، ހާމަކުރަން ނުޖެހޭ ކަމަށް ނިންމާފައިވެ އެވެ.

މައުލޫމާތު ހޯދައި ލިބިގަތުމުގެ ގާނޫނުގައި ބުނެފައިވާ ގޮތުން، ތިންވަނަ މީހެއްގެ ޒާތީ މައުލޫމާތު ދޫކުރުމަކީ އާންމު މަސްލަހަތު ދެމެހެއްޓުމަށް މުހިންމު ކަމެއް ކަމަށް ފެނިއްޖެ ނަމަ އެ ތިންވަނަ ފަރާތުގެ ރުހުމާ ނުލައި އެ މައުލޫމާތެއް އެ ސަބަބަށްޓަކައި އެ ނިސްބަތަށް ދޫކުރެވިދާނެ އެވެ.

ރައީސް މުއިއްޒު ކުރިން ވިދާޅުވެފައިވާ ގޮތުން، ވަކިކުރާ ސިޔާސީ މުވައްޒަފުންގެ ތެރޭގައި ހިމެނެނީ ހަތް ސްޓޭޓް މިނިސްޓަރުންނާއި 43 ޑެޕިއުޓީ މިނިސްޓަރުންނާއި 109 ސީނިއާ ޕޮލިޓިކަލް ޑިރެކްޓަރުން އަދި 69 ޕޮލިޓިކަލް ޑިރެކްޓަރުންނެވެ. އެ ނިންމެވުމާއެކު، ދައުލަތުގެ ބަޖެޓުން މަހަކު 5.7 މިލިއަނަށް ވުރެ ގިނަ ރުފިޔާ ސަލާމަތް ކުރެވޭނެ ކަމަށް ރައީސް ވިދާޅުވެފައިވެ އެވެ.

ސަރުކާރުގެ އެކި އިދާރާތަކުން "މިހާރު" އާ ހިއްސާ ކޮށްފައިވާ މައުލޫމާތުތަކަށް ބަލާއިރު، މިވަގުތު ސިޔާސީ މުވައްޒަފުންގެ އަދަދު އުޅެނީ 1،400 އަށް ވުރެ މަތީގަ އެވެ. ބައެއް މިނިސްޓްރީތަކުން މިހާތަނަށް ސިޔާސީ މުވައްޒަފުންގެ އަދަދު ހާމަކޮށްފައެއް ނުވެ އެވެ. މި ސަރުކާރުގައި ސިޔާސީ މުވައްޒަފުންގެ އަދަދު 700 އަށް ވުރެ މަތި ނުވާނެ ކަމަށް ކުރިން ވަނީ ބުނެފަ އެވެ.