ބަންގާޅު ކަނޑުގައި އުފެދުނު ކޮޅިގަނޑު ބާރުގަދަ ތޫފާނަކަށް ބަދަލުވެއްޖެ

ބަންގާޅު ކަނޑުގައި އުފެދުނު ކޮޅިގަނޑުގެ ބާރުގަދަވެ، ތޫފާނަކަށް ބަދަލުވެފައިވާ ކަމަށާއި އެކަމަކު އެ ތޫފާނުގެ ސީދާ އަސަރު ރާއްޖެއަށް ނުކުރާނެ ކަމަށް މޫސުމާ ބެހޭ ގައުމީ އިދާރާ (މެޓް) އިން މިއަދު ބުނެފި އެވެ.

މެޓުން ބުނީ ތޫފާން ދަނީ އުތުރުހުޅަނގު އުތުރުން ރާއްޖެއާ ދުރަށް ކަމަށެވެ. މި ތޫފާނުގެ ސީދާ އަސަރު ރާއްޖެއަށް ނުކުރިޔަސް، ހުޅަނގު މޫސުމުގެ ބާރުގަދަވުމާ ގުޅިގެން ކުރިއަށް އޮތް ދެ ދުވަހު ރާއްޖެއަށް މޫސުން ގޯސްވާނެ ކަމަށް ވަނީ ލަފާކޮށްފަ އެވެ.

މެޓުން ބުނި ގޮތުގައި ކުރިއަށް އޮތް ދެ ދުވަހު ވެސް ވައި ގަދަވެ، އަދި ކަނޑުތައް ގަދަވާނެ ކަމަށް ލަފާކުރެވެ އެވެ. އެގޮތުން އުތުރާއި މެދު ރާއްޖެ ތެރޭގެ ކަނޑުތައް އާންމު ގޮތެއްގައި ގަދަވާނެ ކަމަށާއި ރާޅުގެ އުސްމިން އުޅޭނީ 4-7 ފޫޓާ ދެމެދުގައި ކަމަށް ވެސް މެޓުން ބުންޏެވެ.

މިވަގުތު ރާއްޖޭގެ އެއްވެސް ސަރަހައްދަކަށް މޫސުން ގޯސްވެގެން އެލާޓެއް ނެރެފައެއް ނެތެވެ.