ސްކޫލު ބަންދު ނިމެންދެން އެމްއެމްއޭ އިން އެކަނި ޑޮލަރު ވިއްކާ ގޮތަށް ނިންމައިފި

މިހާރު ބޭންކުތަކުން ދަތުރުވެރިންނަށް ވިއްކާ ޑޮލަރު، މާދަމާ އިން ފެށިގެން ބޮޑު ޗުއްޓީ ނިމެންދެން އެމްއެމްއޭ އިން އެކަނި ވިއްކާ ގޮތަށް ހަމަޖައްސައިފި އެވެ. އަދި ބޮޑު ޗުއްޓީ ނިމުމުން ދަތުރުވެރިންނަށް ޑޮލަރު ވިއްކާނީ އެއާޕޯޓްގައި ކަމަށް ވެސް މަރުކަޒީ ބޭންކުން ބުނެފި އެވެ.

އެމްއެމްއޭގައި މިހާރު ކުރިއަށް ދާ ނޫސްވެރިންގެ ބައްދަލުވުމެއްގައި ގަވަރުނަރު އަޒީމާ އާދަމް ވިދާޅުވި ގޮތުގައި ޓިކެޓާއި ޕާސްޕޯޓް ހިފައިގެން އެ ތަނަށް ދިއުމުން ދިވެހި ކޮންމެ ދަތުރުވެރިޔަކަށް، މިހާރެކޭ އެއްގޮތަށް، 500 ޑޮލަރު ލިބޭނެ ކަމަށެވެ. މިހާރު ވެސް އަމަލު ކުރާ އުސޫލުން، ގިނަ ބަޔަކު ދަތުރުކުރާ ނަމަ އޭގެ ތެރެއިން ކޮންމެވެސް އެކަކު އެންމެންގެ ޓިކެޓާއި ޕާސްޕޯޓް ހިފައިގެން އައުމުން ޑޮލަރު ލިބޭނެ ކަމަށާއި އެކަމަކު ކޮންމެ މީހަކަށް ގެނެވޭނީ ގިނަވެގެން ފަސް ޓިކެޓު ކަމަށް އޭނާ ވިދާޅުވި އެވެ.

މާދަމާ އިން ފެށިގެން އެމްއެމްއޭ އިން ޑޮލަރު ވިއްކާނީ، އަޒީމާ ވިދާޅުވި ގޮތުގައި، އަބަދު ވެސް ކުރިއަށް އޮންނަ ހަތް ދުވަހުގެ ތެރޭގައި ފުރާ މީހުންނަށް އެކަންޏެވެ. އެ ގޮތަށް ހަމަޖެއްސީ، އޭނާ ފާހަގަކުރެއްވި ގޮތުގައި، ޑޮލަރު ގަންނަން ހަދާ ކިޔޫ ކުޑަކޮށް، ޑޮލަރު ގަންނަން ބޭނުންވާ ހުރިހާ ދަތުރުވެރިންނަށް ވެސް ފަސޭހަ އިން ލިބޭނެ އިންތިޒާމު ހަމަޖެއްސުމަށެވެ.

އެމްއެމްއޭ އިން ހަމަޖައްސާފައި ވަނީ ކޮންމެ ދުވަހެއްގެ ހެނދުނު 9 އިން ފެށިގެން ހަވީރު ހަޔަކާ ދެމެދު ޓިކެޓާއި ޕާސްޕޯޓް ޗެކްކުރާ ގޮތަށެވެ. އެކަން ކުރުމަށް އެމްއެމްއޭގެ ދެވަނަ ބުރީގައި ހުންނަ އޮޑިޓޯރިއަމްގައި ދިހަ ކައުންޓަރު ބަހައްޓައިފަ އެވެ. އެ ތަނުން ޓިކެޓާއި ޕާސްޕޯޓުގެ ސައްހަކަން ކަށަވަރުކުރުމަށް ފަހު ދޭ ސުލިޕް ކޮޅަށް ޑޮލަރު ވިއްކަން ފަށާނީ ހަވީރު ހަތަރެއް ޖަހާއިރު އެވެ. ސުލިޕްކޮޅުގައި އެ މީހަކު އަންނަން ޖެހޭ ގަޑި އޮންނާނެ އެވެ.

"އެއްގޮތަކަށް ވެސް ނުވައެއްގެ ކުރިން ކިއޫ ހެދުމާއި އަވަހަށް ވަނުން ކަހަލަ ކަމެއް ނޯންނާނެ. ހައެއްގެ ކުރިން އެމްއެމްއޭ އަށް އެތެރެވެވިއްޖިއްޔާ ހަމަ ގައިމު ވެސް އެ ދުވަހަކު ޑޮލަރު ލިބޭނެ،" އަޒީމާ ވިދާޅުވި އެވެ.

އެމްއެމްއޭ އިން ޑޮލަރު ވިއްކުން:

- ވިއްކާނީ މާދަމާ އިން ފެށިގެން ޖެނުއަރީ ހަތެއްގެ ނިޔަލަށް.

- ކޮންމެ ދުވަހަކު ވެސް ވިއްކާނީ ކުރިއަށް އޮތް ހަތް ދުވަހުގެ ތެރޭގައި ފުރާ މީހުންނަށް އެކަނި.

- ޓިކެޓަކަށް 500 ޑޮލަރު

- ގިނަ މީހުންގެ ގްރޫޕެއް ނަމަ ދަތުރުކުރާ އެކަކަށް އެންމެންގެ ޓިކެޓު ހިފައިގެން ދެވޭނެ (އެކަކަށް ގިނަވަގެން ފަސް ޕާސްޕޯޓް).

- ޕާސްޕޯޓާއި ޓިކެޓު ޗެކުކުރުން: ހެނދުނު 9 އިން އިރުއޮއްސި 6 އަށް.

- ޑޮލަރު ވިއްކުން: ހަވީރު 4 އިން ފެށިގެން (ސްލިޕުގައިވާ ގަޑިއަކަށް)

- އިރުއޮއްސި 6 ގެ ކުރިން ޓިކެޓާއި ޕާސްޕޯޓު ހުށަހަޅާ ނަމަ، އެ ދުވަހަކު ޑޮލަރު ލިބޭނެ.

ސްކޫލު ބަންދު ފެށިފައި ވާއިރު، ޑޮލަރު ލިބުން ތާށިވެ، އެސްޓީއޯ ޓްރޭޑް ސެންޓަރުގައި ހުންނަ ބޭންކު އޮފް މޯލްޑިވްސް (ބީއެމްއެލް)ގެ ބްރާންޗު ދޮށުގައި ދިގު ކިއޫ އޮންނަތާ މިހާރު ދުވަސްތަކެއް ވެއްޖެ އެވެ. އަދި ދަތުރު ނުކުރާ އެތައް ބަޔަކު ހެނދުނުއްސުރެ ކިއޫ އަށް ވަދެ، ނަންބަރު ލިބުމުން ބޮޑު އަގުގައި އެ ނަންބަރު ވިއްކުމުގެ މައްސަލަ ވެސް ވަނީ ކުރިމަތިވެފަ އެވެ.

"އެއީކީ އެމްއެމްއޭ އިން އެކަން އެ ގޮތަށް ކުރިއަށް ގެންދަން ބޭނުންވާ ގޮތެއް ނޫން،" އަޒީމާ މިއަދު ވިދާޅުވި އެވެ.

ގަވަރުނަރު ވިދާޅުވި ގޮތުގައި ދަތުރުވެރިންނަށް ހާއްސަކޮށް ބޭންކުތަކަށް ކޮންމެ ހަފުތާއަކު ވިއްކާ 1.2 މިލިއަން ޑޮލަރާ އެކު، ބޭންކުތަކަށް ޖުމްލަ 4.3 މިލިއަން ޑޮލަރު ހަފުތާއަކު ވިއްކާ ކަމަށެވެ. އަހަރެއްގެ ތެރޭގައި އެ އަދަދު 200 މިލިއަން ޑޮލަރާ ގާތް ކުރާއިރު، އާއްމު މަސްތަކުގައި 15،000 އާއި 18،000 އާ ދެމެދު އުޅޭ ދަތުރުވެރިންގެ އަދަދު ބޮޑު ޗުއްޓީގައި ދެ ގުނަ އަށް އިތުރުވެ، ގާތްގަނޑަކަށް 35،000 އަށް އަރާކަން އޭނާ ފާހަގަކުރެއްވި އެވެ.

"އެހެންވީމަ، މިވާ ގޮތަކީ ބޭންކުތަކަށް އަޅުގަނޑުމެން ޑޮލަރު ފޯރުކޮށްދިން ކަމަށް ވިޔަސް، ތާށިތަކެއް އެބަ އާދޭ ބޭންކުތަކުގެ ލޮޖިސްޓިކްސް އަށް. އެއީ ބޭންކުތަކުން ހަމައެކަނި މި ދެނީ ޑޮލަރު ވިއްކުމުގެ ހިދުމަތެއް ނޫން،" އަޒީމާ ވިދާޅުވި އެވެ.

ބޮޑު ޗުއްޓީ ނިމުމުން، ޖެނުއަރީ އަށަކުން ފެށިގެން ދަތުރުވެރިންނަށް އެއާޕޯޓުން ޑޮލަރު ވިއްކަން ހަމަޖައްސާފައިވާކަން ވެސް އެމްއެމްއޭ އިން މިއަދު އިއުލާންކުރި އެވެ. އެ ގޮތުން، ބޯޑިން ޕާސް ލިބުމުން، ޑޮލަރު ގަންނަން ބޭނުންވާ ފަރާތްތަކުން އެއާޕޯޓުގެ ޑިޕާޗާގައި ހުންނަ ބީއެމްއެލްގެ ކިއޮސްކަކަށް ދިއުމުން ކޮންމެ ބޯޑިން ޕާހަކަށް 500 ޑޮލަރުގެ މަގުން ލިބޭނެ ކަމަށް އަޒީމާ ވިދާޅުވި އެވެ.

"ގިނަ ޓިކެޓަކީ އީ-ޓިކެޓު. ވަރަށް ގިނަ ފަރާތްތަކުން އިންޓަނެޓުން ވެސް ޓިކެޓު އެބަ ނަގާ. އެންވީމަ، އޭގެ ވެލިޑިޓީ ހޯދުމަކީ އެއްވެސް ފަރާތަކަށް އެހާ ފަސޭހަކަމެއް ނޫން،" މާލޭގައި ހުންނަ ބޭންކުތަކުގެ ބްރާންޗުތަކުން ދަތުރުވެރިންނަށް ޑޮލަރު ވިއްކުން ހުއްޓާލައި އެއާޕޯޓުން އެކަން ކުރަން ފަށަން ޖެހުނު ސަބަބާ ގުޅޭ ގޮތުން އަޒީމާ ވިދާޅުވި އެވެ.

އެމްއެމްއޭ އިން ބުނީ ފުރާ މީހުންނަށް ދަތި ނުވާ ގޮތަށް ޑޮލަރު ފަސޭހަކަމާ އެކު އަދި އަވަހަށް ލިބޭނެ އިންތިޒާމު އެއާޕޯޓުގައި ހަމަޖެއްސުމުގެ މަސައްކަތް ބީއެމްއެލް އިން މިހާރު ކުރަމުން އަންނަ ކަމަށެވެ. އަދި އެކަމާ ގުޅޭ އިތުރު ތަފްސީލު އެ ބޭންކުން ވަރަށް އަވަހަށް ހާމަކުރާނެ ކަމަށް ވެސް އެ އިދާރާ އިން ބުންޏެވެ.

ފުރާ މީހުންނަށް އެއާޕޯޓުން އެކަނި ޑޮލަރު ވިއްކާ ގޮތަށް ހަމަޖައްސަން އުޅޭ ކަމުގެ ވާހަކަ މީޑިއާގައި ދައްކަމުން އަންނަތާ ދުވަސްކޮޅެއް ވެއްޖެ އެވެ. އެކަމަކު އެމްއެމްއޭ އާއި ބީއެމްއެލް އިން ވެސް އެ ވާހަކަ ދޮގުކުރި އެވެ.