މަސައްކަތު މާހައުލުގައި ދިމާވާ ޖިންސީ ފުރައްސާރައާ ދެކޮޅަށް އަޑުއުފުލައިފި

މަސައްކަތުގެ މާހައުލުގައި ކުރިމަތިވާ ޖިންސީ ގޯނާ އާއި ޖިންސީ ފުރައްސާރައާ ދެކޮޅަށް މާލޭގައި މިރޭ ޒުވާނުންތަކެއް އަޑުއުފުލައިފި އެވެ.

މަސައްކަތްތެރިންގެ ދުވަސް މިއަދު ފާހަގަކުރަމުން އަންނައިރު މަސައްކަތުގެ މާހައުލުގައި ބައެއްް މީހުންނަށް ޖިންސީ ގޯނާ އާއި ފުރަައްސާރަ އަދި ރޭޕް ފަދަ ކަންކަމާ ކުރިމަތިލާން ޖެހިފައި އެބަ ހުއްޓެވެ. އެފަދަ ކަންކަމާ ދެކޮޅަށް މިރޭ އިހުތިޖާޖު ރޭވީ "ރައިޒް އަޕް އެމްވީ" މޫވްމަންޓުންނެވެ.

ޖިންސީ ފުރައްސާރައާ ދެކޮޅަށް ޝުއޫރުތައް ލިޔެފައިވާ ޕޯސްޓަރުތަކާ އެެކު އިހުތިޖާޖު ފަށާފައި ވަނީ ރަސްފަންނު ސަރަހައްދުންނެވެ. އެކަމަކު އެ ސަރަހައްދުގައި އަޑުގަދަ ކުރާ ބޭނުންކޮށްގެން ވެސް ޝުއޫރުތައް ފާޅުކުރުމަށް ފަހު އިހުތިޖާޖުގެ ބައިވެރިން ވަނީ މަޖީދީ މަގަށް ހިނގައިގެންފަ އެވެ.

އެ ޒުވާނުން ވަނީ ޓޫރިޒަމް މިނިސްޓަރުގެ މަގާމުގައި ހުންނަވައި، އަންހެން މުވައްޒަފުންތަކަކަށް އަލީ ވަހީދު ޖިންސީ ގޯނާ ކުރި މައްސަލައާ ގުޅިގެން އޭނާ ހައްޔަރުކުރަން ގޮވާލައިފަ އެވެ.

އެ މައްސަލައިގައި އަލީ ވަހީދުގެ މައްޗަށް ދައުވާކޮށް މައްސަލައިގެ އަޑުއެހުންތައް ފަށާފައިވަނިކޮށް ކޯޓުން ވަނީ ބޭސް ފަރުވާއަށް ބޭރަށް ދިއުމުގެ ހުއްދަދީފަ އެެވެ. އޭނާ ބޭސް ފަރުވާއަށް ގޮސްފައި ވަނީ ކޮން ގައުމަކަށް ކަން ސާފެއް ނުވެ އެވެ. އެހެންވެ، މައްސަލަ ކުރިއަށް ގެންގޮސް، ޖިންސީ ގޯނާ އާއި ފުރައްސާރައިގެ ޝިކާރަކަށްވި މީހުންނަށް އިންސާފު ހޯދައިދެވޭނެތޯ ވެސް ވަނީ ސުވާލު އުފެދިފަ އެވެ.

އެކަމަކު މީގެ ކުރިން ޕްރޮސެކިއުޓާ ޖެނަރަލް ހުސެއިން ޝަމީމް ވަނީ އިންޓަޕޯލް ރެޑް ނޯޓިސް ނެރެގެން ވެސް އަލީ ވަހީދުގެ މައްސަލަ ކުރިއަށް ގެންދާނެ ކަމަށް ވިދާޅުވެފަ އެވެ.

ޖިންސީ ގޯނާ އާއި ފުރައްސާރައިގެ މައްސަލަތައް ކުރިމަތިވަމުން ދިޔަ ނަމަވެސް އިދާރާތަކުން އެކަން ކަން ބަލައި ފިޔަވަޅު އަޅަން ފަސް ޖެހޭ ކަމަށް ބުނެ އެެއްވުމުގެ ބައިވެރިން ނުރުހުން ފާޅުކުރެ އެވެ. އަދި ހެކި ނެތިގެން ކަމަށް ބުނެ އެެފަދަ މައްސަލަތައް ނުބަލައި ދޫކޮށްލަމުންދާތީ ވެސް އިހުތިޖާޖުގެ ބައިވެރިން ކަންބޮޑުވުން ފާޅުކުރި އެވެ.

ޒުވާނުން އިހުތިޖާޖު ކުރަމުންގޮސް، ގާތްގަނޑަކަށް މަޖީދީ މަގު، ސަން ފްރޮންޓް ފިހާރައާ ހަމައަށް ދިޔަ ތަނާހެން އެ ސަރަހައްްދަށް ފުލުހުން އައިސް ވަނީ އެއްވުމުގެ ބައިވެރިންނަށް ހުރަސް އަޅަައިފަ އެވެ. އަދި އެ މީހުން ދުރުކުރުމުގެ މަސައްކަތް ވެސް ކުރި އެވެ. އެނގިފައިވާ ގޮތުގައި އެއްވުމުގެ ތެރެއިން އެކަކު ފުލުހުންގެ ބެލުމުގެ ދަށަަށް ވެސް ގެންދިޔަ އެވެ.

ކޮވިޑް-19 އާ ގުޅިގެން ރައްކާތެރިވުމުގެ ފިޔަވަޅެއްގެ ގޮތުން ފަސް މީހުންނަށް ވުރެ ގިނައިން މާލެ ސަރަހައްދުގައި އެއްވުމަކީ މަނާ ކަމެކެވެ. އެކަމަކު މި އެއްވުން ކުރިއަށް ގެންދިޔައީ އެޗްޕީއޭގެ ގައިޑްލައިންގައި ބުނާ ގައިދުރުކުރުމާއި މާސްކް އެޅުން ފަދަ ފިޔަވަޅުތަކާ އެކު އެވެ.