ކެބިނެޓަށް މާދަމާ ބައެއް ބަދަލު ގެންނަނީ

ރައީސް އިބްރާހީމް މުހައްމަދު ސޯލިހުގެ ކެބިނެޓަށް މާދަމާ ބައެއް ބަދަލުތައް ގެނެސްް އެކަން އިއުލާނުކުރާނެކަމަށް މައުލޫމާތު ލިބިއްޖެ އެވެ.

"މިހާރު"އަށް އެނގިފައިވާ ގޮތުގައި ކެބިނެޓްގެ ހަތަރު މަގާމަކަށް މާދަމާ ބަދަލު ގެންނަން ރައީސް އިބްރާހީމް މުހައްމަދު ސޯލިހު ވަނީ ނިންމަވައިފަ އެވެ. އެއީ އެންވަޔަރްމެންޓް މިނިސްޓްރީއާއި ފިޝަރީޒް މިނިސްޓްރީ އަދި ރައީސް އޮފީހުގެ މިނިސްޓަރުކަމުގެ މަގާމެވެ. އެނގިފައިވާ ގޮތުގައި އެންވަޔަރްމަންޓް މިނިސްޓަރުކަމުގެ މަގާމުގައި މިހާރު ހުންނެވި ޑރ. ހުސައިން ރަޝީދު ހަސަން ފިޝަރީޒް މިނިސްޓަރުކަމުގެ މަގާމަށް ބަދަލުކުރައްވައި އެ މިނިސްްޓްރީގައި މިހާރު ހުންނެވި ޒަހާ ވަހީދު ބަދަލުކުރައްވާނީ ރައީސް އޮފީހުގެ މިނިސްޓަރުކަމުގެ މަގާމަށެވެ. އެއަށް ފަހު އެންވަޔަރްމެންޓް މިނިސްޓަރުކަމަށް ހަމަޖައްސަަވާނީ ރައީސް އޮފީހުގެ ޕޮލިސީ ސެކްރެޓަރީ އާމިނަތު ޝައުނާ އެވެ.

ހުސްވެފައިވާ ޓެލެކޮމިއުނިކޭޝަން ސައިންސް އެންޑް ޓެކްނޮލޮޖީގެ މަގާމަށް ވެސް މާދަމާ ބޭފުޅަކު ހަމަޖައްސަވާނެ ކަމަށް "މިހާރު"އާ ވާހަކަ ދެއްކެވި އޮފިޝަލް ވިދާޅުވި އެވެ. އެހެން ނަމަވެސް އެ މަގާމަށްް ހަމަޖައްސަވާނެ ބޭފުޅަކު އަދި ނުނިންމަވަ އެވެ. އެމަގާމަކީ ސަރުކާރު ހިންގާ ކޯލިޝަނުގައި ހިމެނޭ ޖުމްހޫރީ ޕާޓީގެ ސްލޮޓެއް ކަމަށް ވާތީ އެމަގާމަށް ހަމަޖައްސަން ޖޭޕީން ބޭފުޅެއްގެ ނަން ވަނީ އެކަމަކު ފޮނުވައިފަ އެވެ.

ކެބިނެޓަށް ބަދަލުތަކެއް ގެންނަވާނެ ކަން މީގެ ދެތިން ދުވަސްކުރިން ރައީސް ވަނީ ކޯލިޝަން ޕާޓީތަކަށް އަންގަވައިފަ އެވެ.