"ޕްލާސްޓިކާ ނުލައި" ކެމްޕެއިން ލޯންޗުކޮށްފި

އެއް ފަހަރު ބޭނުންކޮށްފައި ހުންނަ ޕްލާސްޓިކްގެ މައްސަލައަށް ހައްލެއް ހޯދުމަށް "ޕްލާސްޓިކާ ނުލައި" ގެ ނަމުގައި އާންމުން ހޭލުންތެރިކުރުވުމަށް ގައުމީ ކެމްޕެއިނެއް މިރޭ އިފްތިތާހުކޮށްފި އެވެ.

އެއްފަހަރު ބޭނުންކޮށްފައި އުކާލާ ޕްލާސްޓިކްގެ މައްސަލައަށް ހައްލު ހޯދުމަށްޓަކައި ސަރުކާރުން ކުރަމުންދާ މަސައްކަތްތަކުގެ ދަށުން މި ކެމްޕެއިން އިފްތިތާހުކޮށްދެއްވީ ވާޗުއަލްކޮށް ބޭއްވި ރަސްމިއްޔާތެއްގައި އެންވަޔަރަމަންޓް މިނިސްޓަރު ޑރ، ހުސެއިން ރަޝީދު ހަސަން އެވެ.

މިނިސްޓަރު ވިދާޅުވީ ރަށްރަށަށް ދިމާވެފައިވާ އެންމެ ބޮޑު މައްސަލައަކީ ކުނީގެ މައްސަލަކަމުން، އެކަމަށް ހައްލެއް ހޯދުމަށް އެންމެ ގިނައިން ކުނި އުފެދިފައިވާ 20 ރަށުގެ ކުނިގޮނޑުތައް ނެގުމުގެ މަސައްކަތްކުރަމުން އަންނަ ކަމަށެވެ.

"ބޮޑެތި ކުނިގޮނޑުތައް އުފެދި ކުންޏަކީ ގިނަ ރަށްރަށަށް ދިމާވެފައިވާ ތިމާވެށީގެ އެންމެ ބޮޑު މައްސަލައަށްވީ ކުނި މެނޭޖްކުރުމަށް އެކަށީގެންވާ ވަސީލަތްތައް ވޭތުވެދިޔަ ތަނުގައި ފޯރުކޮށްދެވިފައި ނުވާތީ،" މިނިސްޓަރު ވިދާޅުވެ އެވެ. 'އެ މަސައްކަތްކުރަން ބޭނުންވާ ސާމާނު ރަށްރަށަށް ފޯރުކޮށްދެވިގެން ނޫންް ގޮތަކަށް ކުނީގެ މައްސަލައަށް ހައްލެއް ނުލިބޭނެ."

މިނިސްޓަރު ވިދާޅުވީ 2019 ވަނަ އަހަރާ ހަމަައަށް ރާއްޖޭގެ ހަތަރު ބައިކުޅަ ތިން ބައި ރަށުގައި ކުނި މެނޭޖްކުރާނެ މަރުކަޒު ގާއިމުކޮށްދެވިފައި ނުވާ ކަމަށެވެ. އެކަމަކު 2020 ވަނަ އަހަރު އެކަމަށް ހައްލެއް ހޯދުމުގެ މަސައްކަތް ފެށިކަން ފާހަގަކުރައްވަމުން މިނިސްޓަރު ވިދާޅުވީ، މިދިޔަ އަހަރު އެކަމަށް މާބޮޑު ކުރިއެރުމެއް ނުލިބުނީ ކޮވިޑް-19 އާ ގުޅިގެން ކަމަށެވެ.

އެކަމަކު 2022 ވަނަ އަހަރުގެ ނިޔަލަށް ރާއްޖެއަށް ދިމާވެފައިވާ ކުނީގެ މައްސަލައަށް ހައްލެއް ހޯއްދަވާނެ ކަަމަށް މިނިސްޓަރު ވިދާޅުވެ އެވެ.

"2021 ވަނަ އަހަރު އަޅުގަނޑުމެން އަމާޒު ހިފާފައި މިހުރީ ރާއްޖޭގެ ދެބައި ކުޅަ އެއްބައި ރަށުގައި އޭގެ މަރުކަޒުތައް އަޅައި ގިނަ ރަށްރަށަށް ބޭނުންވާ ކުނި އުފުލައި އުޅަނދާއި އިކުއިޕްމަންޓްސް ޕޯރުކޮށްދިނުމަށް. އިރާދަކުރެއްވިއްޔާ 2022 ވަނަ އަހަރުގެ ނިޔަލަށް މި މައްސަލަ ރާއްޖޭގައި ހައްލުކުރެވޭނެ،" މިނިސްޓަރު ވިދާޅުވި އެވެ.

އެއްފަހަރު ބޭނުންކޮށްފައި އުކާލާ ޕްލާސްޓިކް ރާއްޖެއަށް އެތެރެކުރުން މަނާކުރާ ގޮތަށް ރާއްޖޭގެ އެކްސްޕޯޓް އިމްޕޯޓް ގާނޫނަށް ވަނީ އިސްލާހު ގެނެސްފަ އެވެ. އެއްފަހަރު ބޭނުންކޮށްފައި އުކާލެވޭ ޒާތުގެ 12 ބާވަތެއްގެ ޕްލާސްޓިކް ރާއްޖެއަށް އެތެރެކުރުން މަނާވާނެ އެވެ.

"ސިންގަލް ޔޫސް ޕްލާސްޓިކް ފޭސްއައުޓް ޕްލޭން" ތަންފީޒުކުރަން ކުރާ މަސައްކަތް ކާމިޔާބުވާނީ އެކަމުގެ މައުލޫމާތު އާންމުންނަށް ފޯރުކޮށްދެވިގެން ކަމަށް މިނިސްޓަރު ވިދާޅުވެ އެވެ. އަދި އެކަމަށް ރައްޔިތުން އެއްބާރުލުން ދިނުމަށް ވެސް މިނިސްޓަރު އެދިވަޑައިގަތެވެ.

މިރޭގެ އިވެންޓްގައި ވަނީ ޕްލާސްޓިކާ ނުލައި ކެމްޕެއިންގެ ލޯގޯ އާއި ސިންގްލް ޔޫސް ޕްލާސްޓިކް ފޭސްއައުޓް ޕްލޭން ރަސްމީކޮށް ދައްކާލައިފަ އެވެ.