ރިއާއާ އެކު ރޫމީ އާ ފިލްމެއްގެ މަސައްކަތް ފަށަނީ

މިދިޔަ އަހަރު ބޮލީވުޑްގެ އެކްޓަރު ސުޝާންތު ސިންގް ރާޖްޕޫތު ދަންޖެހިގެން މަރުވުމާ ގުޅިގެން ބޮޑެތި ތުހުމަތުތަކެއް ކުރެވުނު ބަތަލާ ރިއާ ޗަކްރަބަތީއާ އެކު އާ ފިލްމެއްގެ މަސައްކަތް ފަށަން ތައްޔާރުވަމުން އަންނަ ކަމަށް ޑައިރެކްޓަރު ރޫމީ ޖެފްރީ ބުނެފި އެވެ.

އަބަދު ވެސް ރިއާގެ ދިފާއުފައި ވާހަކަ ދައްކަމުން އަންނަ ޑައިރެކްޓަރު ބުނި ގޮތުގައި މިދިޔަ އަހަރުގެ ޖޫން މަހުގެ 14 ވަނަ ދުވަހު ސުޝާންތު މަރުވީ އޭނާ އާއި ރިއާއާ އެކު ފިލްމެއް ހަދަން ތައްޔާރުވަމުން ދަނިކޮށެވެ. ލަންޑަންގައި ޝޫޓްކުރާ ގޮތަށް އޮތް ލޯބީގެ އެ ފިލްމަކީ ވާޝޫ ބަގްނާނީ ޕްރޮޑިއުސްކުރާ އެއްޗެއް ކަމަށް ވެސް ރޫމީ ބުންޏެވެ.

"ލޮކްޑައުން އަށް ފަހު އެ ފިލްމުގެ މަސައްކަތް ފަށަން ތައްޔާރުވަމުން ދަނިކޮށް ސުޝާންތު މަރުވީ،" އޭނާ ބުންޏެވެ.

ރޫމީ ބުނިގޮތުގައި ރިއާ އަކީ ވަރަށް ހުނަރުވެރި ރީތި ބަތަލާއެކެވެ. އެހެންވެ އޭނާއާ އެކު މަސައްކަތްކުރާނެ އެވެ. އެގޮތުން ރިއާ އާއި ސުޝާންތާ އެކު ހަދަން އުޅުނު ފިލްމަށް އެހެން އެކްޓަރަކު ނަގައިގެން އެ ފިލްމު ހަދާނެ ކަމަށް ބުންޏެވެ.

"ރިއާ އަކީ އަދިވެސް ހަމަ އިތުރު ފުރުސަތެއް ދޭން ޖެހޭ ބަތަލާއެއް،" ރޫމީ ބުންޏެވެ.

ސުޝާންތު މަރުވި އިރު ރިއާ އަކީ އޭނާ ލޯބީގެ ގޮތުން ގުޅިގެން އުޅުނު ބަތަލާ އެވެ. އަދި ސުޝާންތު މަރުވީ ރިއާ އާއި ސުޝާންތު އެކީގައި އެއް އެޕާމަންޓެއްގައި އުޅެމުން ދިޔަތާ އެތައް ދުވަހެއް ފަހުން ޖެހުނު މައްސަލެއްގައި ރިއާ އެޕާޓްމަންޓުން ދޫކޮށްދިޔަތާ ހަފުތާއެއްހާ ދުވަސް ފަހުންނެވެ. އެ މައްސަލާގައި ރިއާގެ މައްޗަށް ސުޝާންތު މަރާލުމާއި މަސްތުވާތަކެތި ދިނުން ފަދަ އެތައް ތުހުމަތެއް ކުރެވުނެެވެ. އަދި އެ މައްސަލާގައި އޭނާ ޖަލުގައި މަސް ދުވަހު ބަންދުކުރުމަށް ފަހު ކަފާލާތުގެ ދަށުން ދޫކޮށްލީ މިދިޔަަ އަހަރުގެ އޮކްޓޯބަރުގަ އެވެ.

ރޫމީ ބުނީ ރިއާ މި ވަގުތު ކަފާލާތުން ދޫކޮށްފައި ހުރި އިރު ފިލްމީ މަސައްކަތްކުރާކަށް އެއްވެސް ހުރަހެއް ނެތް ކަމަށެވެ.

"އަހަރެމެން އެމްމެނަށް އެނގޭނެ ސަންޖޭ ދަތު ވެސް އޭނާގެ މައްޗަށް ހިނގަމުން ދިޔަ ޝަރީއަތުގެ ދުވަސްވަރު ކަފާލާތުގެ ދަށުން ފިލްމީ މަސައްކަތްތަކުގައި ބިޒީކޮށް އުޅުނުކަން. އެހެންވީމަ ރިއާ އަށް ވެސް އެގޮތަށް މަސައްކަތް ނުކުރެވެން ޖެހޭ ސަބަނެއް ނެތް،" ރޫމީ ބުންޏެވެ. "އަހަންނަށް ޔަގީން މީގެ އަހަރެއް ކުރިއަށް ވުރެ މިހާރު ރިިއާގެ އެކްޓިން މާ ރަނގަޅުވާނެ."

ރިއާ އެންމެ ފަހުން ފެނިފައި ވަނީ 2018 ގައި މަހޭޝް ބަޓް ޕްރޮޑިއުސްކޮށް ގެނެސްދިން "ޖަލޭބީ" އިންނެވެ.

އަންނަ މަހު ރިލީޒްކުރާ ރޫމީގެ މިސްޓްރީ ތުރިލާ "ޗެހެރޭ" އަކީ ވެސް ރިއާ ހިމެނޭ ފިލްމެކެވެ.

ރިލީޒްނުކުރެވި ދިގުލައިގެން ގޮސްފައި އޮތް ފިލްމު އަންނަ މަހުގެ 30 ގައި ގެނެސްދޭން ނިންމިކަން މީގެ ދެ ހަފުތާއެއްހާ ދުވަސްކުރިން އިއުލާންކުރި އިރު ޕޯސްޓަރުގައި ރިއާ ހިމަނާފައި ނުވާތީ އެކަމާ ވަރަށް ގިނަ ބަޔަކު ސުވާލު އުފައްދާފައިވެ އެވެ. ފިލްމުގެ މައިގަނނޑު ކާސްޓް ޕޯސްޓަރުގައި ހިމެނެ އެވެ. އެއީ އަމީތާބް ބައްޗަނާއި އިމްރާން ހާޝިމީ އާއި ކްރިސްޓަލް ޑި ސޫޒާ އާއި އައްނޫ ކަޕޫރާއި ރަގްބީރް ޔާދަވާ އަދި ދުރިތިމަން ޗެޓަޖީ އެވެ.

ބައެއް މީހުން ބުނެފައި ވަނީ "ޗެހެރޭ" ގެ ޕޯސްޓަރުގައި ރިއާ ނެތުމަކީ ފިލްމުން އޭނާ ނުފެންނާނެކަމުގެ އިޝާރާތެއް ކަމަށެވެ. ނަމަވެސް އެގޮތަށް ދެކެވުނު ވާހަކަތައް ކުރިން ވެސް ރޫމީ ދޮގުކޮށް ބުނެފައި ވަނީ ރިއާގެ ރޯލު ފިލްމުން އުނި ނުކުރާނެ ކަމަށެވެ.

އެކަމަށް އިތުރު ބާރެއް ލިބޭނީ "ޗެހެރޭ" ގެ ޓްރެއިލާ ރިލީޒްކުރުމުންނެވެ. ދެން ޓްރެއިލާ އިން ރިއާ ނުފެންނަ ނަމަ އޮންނާނެ ގޮތަކީ ފިލްމު ސްކްރީންގައި އަޅުވަންދަން ވާ ގޮތެއް ބަލަން މަޑުކޮށްލުމެވެ.