ޔޫޓިއުބުން ކުޑަކުދިންގެ ރައްކާތެރިކަމަށް އާ ބީޓާ ވާޝަނެއް

ޔޫޓިއުބަކީ އެ ބޭނުންކުރާ ކުޑަކުދިންނަށް ރައްކާތެރި ޕްލެޓްފޯމަކަށް ހެދުމަށް ގިނަ މަސައްކަތްތަކެއް ކުރަމުން އަންނަ އިރު އަނެއްކާ ވެސް އިތުރު ރައްކާތެރިކަމެއް ގެނެސްދޭން ނިންމައިފި އެވެ.

ޔޫޓިއުބުން މި ފަހަރު ދެނީ ކުދިން ބަލާ އެއްޗެހި މިހާރަށް ވުރެ ބޮޑަށް ބެލެނިވެރިންނަށް "ސުޕަވައިޒްކުރެވޭނެ" ގޮތެކެވެ. މީގެ ބީޓާ ވާޝަނުގައި އަލަށް ތައާރަފުކުރަނީ ޔޫޓިއުބް ކިޑްސް އާއި އާންމު ޔޫޓިއުބާ ދެމެދު ފާލަން އެޅޭ ހިދުމަތެކެވެ. މީގެ ސަބަބުން، ކުދިން ބަލާ އެއްޗިއްސަށް ގޫގުލް އެކައުންޓެއް މެދުވެރިކޮށް އެކްސެސްވުމުގެ ފުރުސަތު ބެލެނިވެރިންނަށް އޮންނާނެ އެވެ. އަދި ކުދިންގެ އެކައުންޓްތަކުގައި ހުންނަ ބައެއް ފީޗާތަކާ ބެލެނިވެރިންނަށް ކުޅެލެވޭނެ އެވެ. އޭގެ ތެރޭގައި އިން-އެޕް ޕާޗޭސަސް، ކްރިއޭޝަން އަދި ކޮމެންޓް ފަދަ ފީޗާތައް ހިމެނެ އެވެ. އެގޮތުން ކުދިންގެ އުމުރާ އެންމެ ގުޅޭ ގޮތަށް ބެލެނިވެރިންނަށް އެކައުންޓްތައް ބައްޓަންކުރެވޭނެ އެވެ.

މިކަމަށް ހާއްސަ ތިން އޮޕްޝަން ސެޓިންއެއް ވެސް ޔޫޓިއުބުން ދޭނެ އެވެ. އެއީ އުމުރަށް އަންނަ ބަދަލުތަކާ އެކު އެކްސެސްވެވޭނެ ކޮންޓެންޓްތަކަށް ލުއިދެވޭ ގޮތަށެވެ. އެ ތިން އޮޕްޝަނަކީ "އެކްސްޕްލޯ" އާއި "އެކްސްޕްލޯ މޯ" އަދި "މޯސްޓް އޮޔް ޔޫޓިއުބް" އެވެ.

މި ސެޓިން އޮޕްޝަންތައް ހާއްސަކޮށްފައި ވަނީ 9 އަހަރުން މައްޗާއި 13 އަހަރުން މަތި އަދި 13 އަހަރުން މަތީގެ ފުރާތަކުގެ ކުދިން ބަލަން އެކަށީގެންވާ ކޮންޓެންޓްތަކަށް ރިއާޔަތްކޮށެވެ.

މިކަމާ ބެހޭ ގޮތުން ޔޫޓިއުން ބުނީ އެ ބޭނުންކުރާ ކުދިންގެ ބެލެނިވެރިންގެ ފަރާތުން އަބަދު ވެސް ގިނަ ޝަކުވާތަކެއް ލިބެމުންދާ ކަމަށާއި އަމާޒަކީ ބެލެނިވެރިންގެ ހުރޮހާ ކަންބޮޑުންތަކެއް ހައްލުކޮށްދީ، ޔޫޓިއުބަކީ އަބަދު ވެސް ކުދިންނަށް ރައްކާތެރި އެއްޗެއްކަން ކަށާވަރުކޮށް ދިނުން ކަމަށެވެ.

"މީގައި އެންމެ މުހިއްމު ކަމަކީ އުމުރުފުރާތަކާ ގުޅޭ ގޮތަށް ޔޫޓިއުބް ވީހާ ވެސް ރައްކާތެރިކޮށް ބޭނުންކުރެވޭނެ ގޮތް ފަހިވެފައި އޮތުން. ބެލެނިވެރިންގެ އެންމެ ބޮޑު ޑިމާންޑަކީ ވެސް އެއީ،" ޔޫޓިއުބްގެ ޕްރޮޑަކްޓް މެނޭޖްމަންޓްގެ ޑިރެކްޓަރު ޖޭމްސް ބީޒާ ވިދާޅުވި އެވެ.