އަލީ ވަހީދުގެ ޕާސްޕޯޓް ދޫކޮށްލި އަމުރު އިސްތިއުނާފްކުރަނީ

ކުރީގެ ޓޫރިޒަމް މިނިސްޓަރު އަލީ ވަހީދަށް ގިނަ ކުށްތަކެއްގެ ތުހުމަތުގައި ދައުވާކޮށް، އޭނަގެ ޕާސްޕޯޓް ހިފަހައްޓާފައި ވަނިކޮށް އޭނާގެ ޕާސްޕޯޓް ދޫކޮށްލަން ކްރިމިނަލް ކޯޓުން ކުރި އަމުރު ހައި ކޯޓުގައި އިސްތިއުނާފުކުރައްވާނެ ކަމަށް ޕްރޮސެކިއުޓާ ޖެެނެރަލް ހުސައިން ޝަމީމް މިއަދު ވިދާޅުވެއްޖެ އެެވެ.

ޝަމީމް މިއަދު ކުރެއްވި ޓްވީޓެއްގައި ވިދާޅުވީ އަލީ ވަހީދުގެ ޕާސްޕޯޓާ ގުޅޭ ގޮތުން ކްރިމިނަލް ކޯޓުން ނިންމި ނިންމުން ޕީޖ އޮފީހަށް ލިބުނީ މިދިޔަ ބުރާސްފަތިދުވަހުގެ 11:30 އެހާކަށް ހާއިރު ކަމަށާއި އެވަގުތުން ފެށިގެން 48 ގަޑިއިރުގެ ތެރޭގައި މައްސަލަ އިސްތިއުނާފު ކުރަން ޖެހޭ ކަމަށެވެ.

"އެ މަސައްކަތް މިދަނީ ކުރަމުން، ޖާމިނުވިގޮތާ ބެހޭ ލިޔެކިއުން އަދިވެސް ނުލިބޭ،" ޝަމީމް ވިދާޅުވި އެވެ.

ޓޫރިޒަމް މިނިސްޓަރަކަށް ހުންނަވައި އެ ތަނުގެ ގިނަ އަދަދެއްގެ މުވަައްޒަފުންނަށް ޖިންސީ ގޯނާކުރި ކަމުގެ ދައުވާ އުފުލައި ޝަރީއަތް ފަށާފައިވާ އަލީ ވަހީދުގެ ޕާސްޕޯޓް ދޫކޮށްލުމާއި އެކު އޭނާ ވަނީ ޔޫކޭއަށް ފުރާވަޑައިގެންފަ އެވެ. އޭނާގެ ޕާސްޕޯޓް ދޫކޮށްލަން ކްރިމިނަލް ކޯޓުން އަމުރުކުރީ އަނބުރާ ރާއްޖެއަށް ގެނައުމަށް، ގާތް އެކުވެރިޔާ، ޔޫތު މިނިސްޓްރީގެ ސްޓޭޓް މިނިސްޓަރު އައްސަދު އަލީ ޖާމިނުވެގެންނެވެ.

ހަތް ދައުވާއެއް އުފުލައި ޝަރީއަތް ފެށިތަނުން އޭނާ "ފުރުވާލުމުން" ސަރުކާރާއި ޕްރޮސިކިއުޓަ ޖެނެރަލް ޝަމީމްގެ އިތުރުން ކްރިމިނަލް ކޯޓަށް ވަނީ ފާޑުކިއުން އަމާޒުވެފަ އެވެ. ޖިންސީގޯނާގެ މައްސަލަތަކުގައި މުއައްސަސާތައް ސީރިއަސް މިންވަރާއި އިންސާފު ލިބުމުގައި ހަމަހަމަކަން ގާއިމްވުމާ މެދު ސުވާލުތަކެއް ދަނީ އުފައްދަމުންނެވެ.

ކުރީގެ ސަރުކާރުގައި އަމިއްލަ އަށް އަރުވާލެވިގެން އިނގިރޭސިވިލާތުގައި ހުންނަވައި މި ވެރިކަން ގެނައުމަށް ސިޔާސީ ފަރާތްތަކާ އެކު މަސައްކަތް ކޮށްދެއްވި އަލީ ވަހީދުގެ ޕާސްޕޯޓް ދޫކޮށްލަން އެއްބަސްވީ، ޕީޖީ އޮފީހުން ބުނާ ގޮތުގައި، ޑޮކްޓަރުގެ ބަހަށެވެ. ކުރިމަތިވެފައި ވަނީ އޭނާގެ ފުރާނައަށް ނުރައްކާވެދާނެ ބައްޔެއް ކަމަށް ޑޮކްޓަރު ލަފާ ދެއްވާފައިވާ ކަމަށް ޕީޖީ އޮފީހުން ބުންޏެވެ.