ފޭސްބުކުން ސްމާޓްވޮޗެއް ނެރެނީ

ފޭސްބުކުން ސްމާޓްވޮޗް އުފެއްދުމުގެ މަސައްކަތްކުރަމުން އަންނަ ކަމަށާއި އަންނަ އަހަރުގެ ތެރޭގައި އެ ނެރުމުގެ ފުރުސަތު ބޮޑު ކަމަށް މީޑިއާތަކުން ބުނެފި އެވެ.

ޓެކް ޚަބަރުތައް ގެނެސްދޭ ބައެއް ނޫސްތަކުން ބުނީ މި މަސައްކަތް މާކް ޒުކަބާގްގެ ކުންފުނިން ކުރިއަށް ގެންދަނީ ވަރަށް ސިއްރިޔާތުގައި ކަމަށާއި ނެރުމާ ވަރަށް ގާތްކޮށްފައި ނޫނީ ސްމާޓްވޮޗާ ބެހޭ އެއްވެސް މައުލޫމާތެއް ރަސްމީކޮށް ހާމަނުކުރަން ނިންމާފައިވާ ކަމަށެވެ.

އެކަމަކު ފޭސްބުކްގެ ސްމާވޮޗަކީ ބާޒާރުގައި މިހާރު ލިބެން ހުރި ސްމާޓްވޮޗްތަކާ އެއްގޮތަށް ފިޓްނެސް/ހެލްތު އަށް ހާއްސަ ފީޗާތަކުގެ އިތުރުން މެސެޖިންއާ އެކު އެހެން ގިނަ އިތުރު އާ ފީޗާތަކެއް ވެސް ހިމެނެނޭ އެންޑްރޮއިޑް-ބޭސްޑް ސްމާޓްވޮޗެކެވެ.

ފޭސްބުކަކީ މިހާރު ވެސް އެ ކުންފުނީގެ ދަށުން ހިންގާ އޮކިއުލަންސް އިން ވާޗުއަލް ރިއަލިޓީ (ވީއާރް) ސްމާޓް ޑިވައިސްތައް ނެރޭ ކުންފުންޏެކެ ވެ. އަދި އިޓަލީގެ އައިނު ކުންފުނި ރޭ-ބަންއާ ގުޅިގެން ސްމާޓް އައިނު ނެރުމުގެ މަސައްކަތް ވެސް އަންނަނީ ކުރަމުންނެވެ.

މިއީ "ޕްރޮޖެކްޓް އާރިއާ" ގެ ނަމުގައި ފަށާފައިވާ އަގްމެންޓް ރިއަލިޓީ (އޭއާރް) އިނިޝިއޭޓިވްގެ ދަށުން ކުރަމުން އަންނަ މަސައްކަތެކެވެ.

ފޭސްބުކުން ވީއާރް އާއި އޭއާރް ފުޅާކޮށް ތަރައްގީކުރަން މަސައްކަތްކުރަމުން އަންނަ އިރު އެ ދާއިރާގައި މަސައްކަތްކުރާ އެ ކުންފުނީގެ އަދަދު މިހާރު 6،000 އަށް ވުރެ ގިނަ އެވެ.

މީގެ 17 އަހަރު ކުރިން އުފަންވި ފޭސްބުކްގައި ވަޒީފާ އަދާކުރާ މުވައްޒަފުންގެ އަދަދު މިހާރު 52,530 އަށް ވުރެ ގިނަ އެވެ.