ސެނެޓްގެ ޝަރީއަތް: ޓްރަމްޕަށް ހުކުމް އަންނަން ޖެހޭ، އެހެން ނޫނީ ދެން ވެސް އެކަން ކުރާނެ

އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ މައްޗަށް ހުކުމް އިއްވަން ޖެހޭ ކަމަށާއި އެހެން ނޫނީ ކުރިމަގުގައި ވެސް "މި އަމަލް އޭނާ ހިންގަވާނެ" ކަމަށް ވިދާޅުވަމުން، ސެނެޓްގައި ޑިމޮކްރެޓިކް ޕާޓީގެ ވަކީލުން އެ ބޭފުޅުންގެ ވާހަކަތައް ރޭ ނިންމާލައްވައިފި އެވެ.

ޖެނުއަރީ 6 ވަނަ ދުވަހު ކޮންގްރެސްގެ ދެ ގެ ހިންގާ މައި އިމާރާތް، ދަ ކެޕިޓަލްއަށް ޓްރަމްޕްގެ ސަޕޯޓަރުން ވަދެގަނެ ހިންގި ހަމަނުޖެހުންތަކަކީ ސީދާ ރައީސް ހިތްވަރުދެއްވައި، ރޯކުރެއްވި ރުޅިވެރިކަމުގެ ހުޅުގަނޑެއް ކަމަށް ސާބިތުކުރަން ސެނެޓްގައި ހިންގާ ޝަރީއަތަކީ، އެމެރިކާގެ ތާރީހުގައި ވެސް މިހާތަނަށް ފެނުނު މަންޒަރެއް ނޫނެވެ. ކުރީގެ ރައީސަކާ މެދު އިމްޕީޗްމެންޓް ޝަރީއަތެއް ސެނެޓްގައި ކުރިއަށް ގެންދާ މިއީ ފުރަތަމަ ފަހަރެވެ.

ހައުސް އޮފް ރެޕްރެޒެންޓޭޓިވްސް ނުވަތަ ކޮންގްރެސްގެ ތިރި ގެއިން ވަނީ ޓްރަމްޕް އިމްޕީޗްކޮށްފަ އެވެ. ޑިމޮކްރެޓިކް ޕާޓީގެ އަގުލަބިއްޔަތު އޮތް ހައުސްގެ ހަ މެމްބަރަކު، އިމްޕީޗްމެންޓް ޝަރީއަތުގައި ކިޔާ ގޮތުން ނަމަ މެނޭޖަރުން، މިދިއަ ދެ ދުވަހު ވީޑިއޯ އާއި އޯޑިއޯ ބޭނުންކުރައްވައިގެން އާދަޔާ ހިލާފު ހުށައެޅުންތަކެއް ހުށައެޅުއްވި އެވެ. އެއީ އެ ދުވަހު ހިންގި ހަމަނުޖެހުންތައް އަސަރާއި އެ ހޫނުކަންމަތީގައި އަލުން ފެނުން ކަމަށް، ރިޕަބްލިކަން ޕާޓީގެ ސެނެޓަރުން ވެސް ގަބޫލުކުރައްވަ އެވެ. އެކަމަކު ސެނެޓްގައި ޓްރަމްޕްގެ މައްޗަށް ކުށް ސާބިތުކުރަން ބޭނުންވާ ވަރަށް އެ ޕާޓީގެ ސެނެޓަރުންގެ ވޯޓު ނުލިބޭނެކަން މިހާރު ވަނީ ޔަގީންވެފަ އެވެ.

ރުޅުވެރިކަމާއި ހަމަނުޖެހުން އުފެއްދުމުގެ ކުށް ޓްރަމްޕްގެ މައްޗަށް ސާބިތުކުރަން ރިޕަބްލިކަން ޕާޓީގެ 17 މެމްބަރެއްގެ ވޯޓު ބޭނުންވެ އެވެ. މިހާތަނަށް ޔަގީންވެފައި ވަނީ އެންމެ ހަ ސެނެޓަރުންގެ ވޯޓެވެ.

އެމެރިކާގެ ޑިމޮކްރަސީއަށް އެތައް ގޮންޖެހުންތަކެއް ކުރިމަތިކޮށް އަދި އިންތިހާބުގެ ކުރިންނާއި ފަހުން ވެސް ސާބިތު ނުހިފޭ ދޮގު އެތައް ވާހަކަތަކެއް ޓްރަމްޕް ދެއްކެވިޔަސް، އޭނާއަށް އަދިވެސް ވަފާތެރި ސެނެޓަރުން ވިދާޅުވާ ގޮތުގައި ޖެނުއަރީ 6ގެ ހަމަނުޖެހުންތަކަކީ، ގާނޫނީ ބޮޑު ކުށެކެވެ. ނަމަވެސް އެކަމުގައި ސީދާ ޓްރަމްޕް ޒިންމާ ނަންގަވަން ޖެހޭ ފަދަ ކަމެއް ޑިމޮކްރެޓިކް ޕާޓީގެ މެނޭޖަރުންނަށް ދެއްކެވިފައި ނުވާ ކަމަށް، ރިޕަބްލިކަން ޕާޓީގެ ސެނެޓަރުން ވިދާޅުވެ އެވެ.

ޑިމޮކްރެޓިކް ޕާޓީގެ ހަ މެނޭޖަރުން ދެއްކެވި ވީޑިއޯތަކާއި އަޑުތަކުން ސާބިތުކޮށްދެނީ އިމާރާތަށް ވަދެގަތް މީހުން އެކަން ކުރީ ހަމައެކަނި ޓްރަމްޕަށް ކަމެވެ. އެ ތަނަށް ދިޔައީ ވެސް ރައީސް އެގޮތަށް އެދިވަޑައިގަތުމުން ކަމަށް، ބައެއް މީހުން ބުނެފައިވެ އެވެ. އަދި އިމާރާތް ހިމާޔަތްކުރަން ތިބި ފުލުހުންނާ ދިމާއަށް "އަހަރެމެން އަޑުއަހާނީ ރައީސް ދައްކަވާ ވާހަކަ" ކަމަށް ވެސް، އަޑުހަރުކޮށް މީހުން ގޮވި އެވެ.

ޖެނުއަރީ 6 ގައި ކޮންގްރެސްގެ ދެ ގޭގައި ހިނގަމުން ދިޔައީ ޑިމޮކްރެޓިކް ޕާޓީގެ ކެންޑިޑޭޓް ޖޯ ބައިޑަން ކާމިޔާބުކުރެއްވި ރިޔާސީ އިންތިހާބުގެ ނަތީޖާ ރަސްމީކުރުމުގެ ޖަލްސާ އެވެ. ޖަލްސާގެ ރިޔާސަތު ބެލެހެއްޓެވީ ނައިބު ރައީސް މައިކް ޕެންސެވެ. އެކަމަކު ޓްރަމްޕްގެ ބައެއް ސަޕޯޓަރުން އިމާރާތަށް ވަދެ ގަދަ އަޑުން "ޕެންސް ދަންޖައްސާ، ޕެންސް ދަންޖައްސާ"އޭ ވެސް ގޮވި އެވެ. ނައިބު ރައީސް ސަލާމަތްވެވަޑައިގަތީ ވެސް ކިރިޔާ އެވެ.

އޭނާގެ އިތުރުން ހައުސްގެ ރައީސް ޑިމޮކްރެޓިކް ޕާޓީގެ ނެންސީ ޕެލޯސީ އަތުލައިގަންނަން ވެސް އެ މީހުން މަސައްކަތްކުރި އެވެ.

މި ވަރުގެ ބޮޑު ހަމަނުޖެހުމެއް ހިނގީ، ވައިޓް ހައުސް ކުރިމަތީގައި ހުންނަވައި، ޓްރަމްޕް އޭނާގެ ސަޕޯޓަރުން ލޭކައްކުވާނެ އެތައް ވާހަކައެއް ދެއްކެވި ފަހުންނެވެ. އަދި މިހާތަނަށް ވެސް އެ ހަމަނުޖެހުންތަކާ މެދު ހިތާމަކުރައްވާ ކަމަށް، ޓްރަމްޕް ވިދާޅުވެފައެއް ނުވެ އެވެ.

"އިމްޕީޗްމެންޓާއި، ކުށް ސާބިތުކުރުމާއި [އޮފީހަކަށް] ޝަރުތު ހަމަނުވާ ގޮތަށް ހަމަޖެއްސުމަކީ މާޒީއެއް ނޫން، އެއީ ކުރިމަގަށް ކުރަން ޖެހޭ ކަމެއް،" ޑިމޮކްރެޓިކް ޕާޓީގެ އެއް މެނޭޖަރު ޓެޑް ލިއު ވިދާޅުވި އެވެ.

"އެއީ ކުރިމަގުގައި އެއްވެސް އޮފިޝަލަކު، އެއްވެސް ރައީސަކު އެފަދަ ކަމެއް ނުކުރެވޭނެކަން ކަށަވަރުކުރުން."

އެހެން މެނޭޖަރެއް ކަމަށް ވާ ޖޯ ނެގިޔުސް ވިދާޅުވީ ޓްރަމްޕަކީ މައްސަލަ ބޮޑު ވާހަކައެއް ދައްކަން "އާދައިގެ އާންމު މީހެއް" ނޫނެވެ. އޭނާއަކީ އެމެރިކާގެ ރައީސް ކަމަށާއި ނަމަވެސް އޭނާގެ ވާހަކަތަކުން ރުޅިވެރިކަން އުފެއްދެވީ ހަމަނުޖެހުމަށް ތައްޔާރަށް ތިބި ސަޕޯޓަރުންގެ މެދުގައި ކަމަށް ވެސް ވިދާޅުވި އެވެ.

އެކަން ސާބިތުކޮށްދޭން ޑިމޮކްރެޓިކް ޕާޓީގެ މެނޭޖަރުން ދެއްކެވި ވީޑިއޯތަކުގައި ޓްރަމްޕްގެ ބައެއް ސަޕޯޓަރުން ބުނަނީ ވޮޝިންޓަނަށް އެމީހުން އައުމަކީ ޓްރަމްޕް ބޭނުންފުޅުވި ގޮތް ކަމަށް ގަބޫލުކުރާ ކަމަށެވެ.

އެދުވަހުގެ ހަމަނުޖެހުންތަކަކީ އާދައިގެ ކަމެއް ނޫންކަން، މިހާތަނަށް ކޯޓަށް ހުށައެޅި މައްސަލަތަކާއި އެދުވަހު ޓްރަމްޕްގެ ބައެއް ސަޕޯޓަރުން ދެއްކި ވާހަކަތަކުން، ޝަރީއަތަށް ސާބިތުކޮށްދެއްވަން މެނޭޖަރުން މަސައްކަތްކުރެއްވި އެވެ. އެގޮތުން ނައިބު ރައީސް ޕެންސާއި ހައުސްގެ ރައީސް ޕެލޯސީ އަވަހާރަކޮށްލަން ރޭވިކަމަށް، ބައެއް މީހުން އެއްބަސްވެފައިވާކަން، ސެނެޓަށް އަޑުއިއްވި އެވެ.

"ސީދާ އެމެރިކާގެ ރައީސް އެކުލަވާލެއްވި އަނިޔާވެރިންތަކެއް ހިންގި އެފަދަ ބޮޑު ގެއްލުންތަކެއް ފެނިދާނެ ކަމަށް އަހަރެމެންގެ ތެރެއިން އެކެއްގެ ހިޔާލަށް ވެސް ގެނެވިފައެއް ނުވާނެ،" ޓްރަމްޕްގެ އަމަލް ސާބިތުކޮށްދެއްވަން ވާހަކަ ދައްކަވަމުން، އެއް މެނޭޖަރު ޑޭވިޑް ސިސިލިން ވިދާޅުވި އެވެ.

ޑިމޮކްރެޓިކް މެމްބަރުންގެ ވާހަކަތައް ނިންމާލުމުގެ ކުރިން، އެ ދުވަހުގެ ހަމަނުޖެހުމުން ދުނިޔޭގައި އެމެރިކާގެ ތަސައްވުރު ބަދަލުވި ގޮތާއި އެއީ ގިނަ ދުވަހަށް ދެމިގެންދާނެ ބޮޑު ގެއްލުމެއް ކަމަށް ވެސް، ސަބަބުތަކާ އެކު ކިޔައިދެއްވި އެވެ.

"ދުނިޔެ އެ ދަނީ އަހަރެމެންނާ ދިމާއަށް ބަލަމުން އަދި އަހަރެމެންނަކީ އަހަރެމެން ދައްކާ ވާހަކައާ އެއްފަދަ ބައެއްތޯ ވެސް ދުނިޔެ އެބަ ވިސްނާ،" ޑިމޮކްރެޓިކް މެމްބަރެއް ކަމަށްވާ ޖެކްއިން ކާސްޓްރޯ ވިދާޅުވި އެވެ.

މިއަދު ފަށާނީ ޓްރަމްޕްގެ ދިފާއީ ވަކީލުންގެ ވާހަކަތަކެވެ. އެ މީހުންނަށް 16 ގަޑިިއިރުގެ ވަގުތު ދީފައިވެ އެވެ. އެކަމަކު އެއަށް ވުރެ އަވަހަށް ދިފާއީ ވާހަކަތައް ނިންމާނެ ކަމަށް، ޓްރަމްޕްގެ ޓީމުން ބުނެ އެވެ.

ޓްރަމްޕްގެ ވަކީލުންނަށް ސުވާލުތަކެއް

ޑިމޮކްރެޓިކް ޕާޓީގެ ފަރާތުން ޝަރީއަތަށް ކަނޑައެޅި އިސް މެނޭޖަރު ޖެމީ ރަސްކިން، އެ ބޭފުޅުންގެ ކޭސް ހުށައަޅުއްވާ ނިންމެވުމުގެ ގޮތުން ޓްރަމްޕްގެ ވަކީލުންނަށް އަމާޒުކުރެއްވި ސުވާލުތައް ތިރީގައި އެވަނީ އެވެ.

- ކެޕިޓަލްގައި ހިންގި ހަމަނުޖެހުންތައް އެނގިވަޑައިގަތުމުން ވެސް އެކަން ހުއްޓާލަން ސަޕޯޓަރުންނަށް ޓްރަމްޕް ގޮވާނުލެއްވީ ކީއްވެގެންތޯ އެވެ؟

- ހަމަނެޖެހުންތައް ފެށުމާ އެކު އެކަން ހުއްޓުވަން މަދުވެގެން ދެ ގަޑިއެއްހާ އިރު ޓްރަމްޕް އެއްވެސް ކަމެއް ނުކުރެއްވީ ކީއްވެގެންތޯ އެވެ؟

- އަމާންކަން ގާއިމްކުރަން ތިބި އޮފިސަރުންނަށް އެހީވާން އެއްވެސް ކަމެއް ނުކުރެއްވީ ކީއްވެގެންތޯ އެވެ؟

- ޖުނުއަރީ 6 ގައި، އެ ހަމަނުޖެހުންތަކާއި ހަމަނުޖެހުން ހިންގި މީހުން ކުށްވެރިކުރައްވަން އެއްވެސް ކަމެއް ނުކުރެއްވީ ކީއްވެގެންތޯ އެވެ؟

- އަހަރެމެންގެ ސަރުކާރާ ދެކޮޅަށް އެފަދަ ހަމަނުޖެހުންތަކެއް ރައީސަކު ހިންގަވައިފި ނަމަ އެއީ އިމްޕީޗްމެންޓް ޝަރީއަތެއް ހިންގަން ޖެހޭ ވަރުގެ ކުށަކަށް ވާނެ ހެއްޔެވެ؟