ހެވީ ވެހިކަލް ދުއްވަން، އެލަވަންސް ވެސް ލިބޭ ގޮތަށް ދިވެހިން ތަމްރީިން ކުރަނީ

ބިދޭސީންގެ ބަދަލުގައި ދިވެހިންނަށް ވަޒީފާގެ ފުރުސަތު ހޯދައިދިނުމަށް، ހެވީ ވެހިކަލް އޮޕަރޭޓް ކުރުމުގެ ތަމްރީން ޕްރޮގްރާމެއް އެމްޓީސީސީން ތައާރަފުކޮށްފި އެވެ.

"ހުނަވަރު"ގެ ނަމުގައި ކުރިއަށްގެންދާ މި ޕްރޮގްރާމްގައި 18 އަހަރުން މަތީގެ ކޮންމެ ދިވެއްސަކަށް ވެސް ބައިވެރިވެވޭނެ އެވެ. މި ޕްރޮގްރާމުގައި ބައިވެރިވާ މީހުންނަށް ޕްރޮގްރާމް ކުރިއަށްދާ މުއްދަތުގައި ކޮންމެ މަހަކު އެލަވަންސްގެ ގޮތުގައި 5،000ރ. ލިބޭނެ އެވެ. މިއީ ތިން މަސް ދުވަހުގެ ޕްރޮގްރާމެކެވެ.

އެމްޓީސީސީގެ ސީއީއޯ އާދަމް އާޒިމް ވިދާޅުވި ގޮތުގައި މި ފުރުސަތު ދިވެހިންނަށް ހުޅުވާލީ މިވަގުތު އެ ކުންފުނީގައި ހެވީ ވެހިކަލް އޮޕަރޭޓް ކުރަން ތިބި ހުރިހާ ބިދޭސީ މުވައްޒަފުންގެ ބަދަލުގައި ދިވެހިންނަށް އެ ފުރުސަތު ހޯދައި ދިނުމަށެވެ. އެހެންކަމުން އިންޖިނިއަރިން ދާއިރާ އިން ކުރިއަށްދާން ބޭނުންވާ ވީހާ ވެސް ގިނަ ޒުވާނުން ޕްރޮގްރާމުގައި ބައިވެރިވުމަށް އެދި ހުށަހެޅުމަށް އޭނާ އެދިވަޑައިގަތެވެ.

"އަޅުގަނޑުމެންގެ މުވައްޒަފުންގެ ތެރޭގައި 130 ބިދޭސީން އެބައުޅޭ މި މަސައްކަތްތައް ކުރާ. މި މަސައްކަތަކީ ފަސޭހައިން ދަސްވެ ފުދޭވަރަކަށް ރަނގަޅު އާމްދަނިއެއް ލިބޭ މަސައްކަތެއް،" އާޒިމް ވިދާޅުވި އެވެ.

އާޒިމް ވިދާޅުވި ގޮތުގައި މި ދާއިރާއިން ތަމްރީން ލިބިގެން ވަޒީފާގެ މާހައުލަށް ނުކުންނަ މީހުންނަށް މަހަކު 12،000ރ. އާއި 20،000ރ. އާ ދެމެދުގެ މުސާރައެއް ލިބޭނެ ކަމަށެވެ.

މި ޕްރޮގްރާމް ފެށުމުގެ ގޮތުން ރާއްޖޭގެ އެންމެ ދެކުނުން ފުވައްމުލަކާއި އައްޑޫގައި އޯޕަން ޑޭއެއް ބާއްވަން ވަނީ ހަމަޖެހިފަ އެވެ. އެގޮތުން، ފުވައްމުލަކުގައި މި މަހުގެ ނުވަވަނަ ދުވަހު އޯޕަން ޑޭ ބާއްވާއިރު އައްޑޫގައި ބާއްވާނީ މި މަހުގެ 11 ވަނަ ދުވަހު އެވެ. މީގެ އިތުރުން ކުޅުދުފުއްޓާއި މާލޭގައި ވެސް އޯޕަން ޑޭ ބާއްވާނެ އެވެ. ނަމަވެސް އޯޕަން ޑޭ ބާއްވާ ތާރީހު އެމްޓީސީސީން އިއުލާން ނުކުރެ އެވެ.

އޯޕަންޑޭގައި ބައިވެރިވާ މީހުންގެ ތެރެއިން މިވަގުތު އެމްޓީސީސީން އިއުލާން ކޮށްފައިވާ ވަޒީފާތަކަށް އެދި ހުށަހަޅަން ބޭނުންވާ މީހުންނަށް އެ ފުރުސަތު ވެސް ހުޅުވާލާނެ ކަމަށް އެ ކުންފުނިން ބުންޏެވެ. އަދި އޯޕަން ޑޭ ބާއްވާ ރަށް ނޫން އެހެން ރަށަކުން މީހަކު ބައިވެރިވާން ބޭނުންވާ ނަމަ އެ ކުންފުންޏަށް އީމެއިލަކުން އެކަން އަންގަން ވަނީ އެދިފަ އެވެ.

މި ޕްރޮގްރާމުގެ ދަށުން ތަމްރީން ދޭނީ އެމްޓީސީސީގެ ސައިޓުތަކުގަ އެވެ. އެހެންކަމުން ސައިޓު ހުންނަ ރަށް ނޫން އެހެން ރަށެއްގެ މީހަކު ޕްރޮގްރާމުގައި ބައިވެރިވާ ނަމަ ހުރުމާއި ކެއުމުގެ ހަރަދު ވެސް އެމްޓީސީސީން ހަމަޖައްސާނެ ކަމަށް އާޒިމް ވިދާޅުވި އެވެ.

އާޒިމް ވިދާޅުވީ މި ޕްރޮގްރާމުގައި ބައިވެރިވާ މީހުންނަކީ މަސައްކަތަށް ފަރުވާތެރި މީހުންނަށް ހެދުމަށް އިސްކަން ދޭނެ ކަމަށެވެ. އެހެންވެ، ޕްރޮގްރާމް ނިންމާ ލައިސަންސް ދޭއިރު ހާޒިރީއަށް ވެސް ބަލާނެ ކަމަށް އޭނާ ވިދާޅުވި އެވެ.

"އެ ކުދިން ކިޔަވަމުންދާ މުއްދަތުގައި އެޓެންޑެންސް ބެލެހެއްޓޭނެ. 100 ޕަސެންޓް އެޓެންޑެންސް ލިބޭނެ ކަމަށް އަޅުގަނޑުމެން ގަބޫލުކުރަން. އެއީ އަޅުގަނޑުމެން ބޭނުންވަނީ މުރާލި ކުދިން ވަޒީފާތަކަށް ނެރެން،" އާޒިމް ވިދާޅުވި އެވެ.