ކަނޑުގެ އަޑީގައި އޮންނަ ކޯރެއް ފެނިއްޖެ

ގަލްފް އޮފް މެކްސިކޯ ސަރަހައްދުގެ ކަނޑު އަޑީގައި އޮންނަ ކޯރެއް ސައިންސްވެރިންނަށް ފެނިއްޖެ އެވެ.

ސައިންސްވެރިން ބުނަނީ މިފަދަ ތަނެއް ބަލައިލުމުގެ ޝައުގުވެރިކަން ކިތަންމެ ބޮޑަސް އެތަން ބަލަން އުޅެގެން ފުރާނަ ގެއްލިދާނެ ކަމަށެވެ.

މި ކޯރުގެ ވަށައިގެން އައްސޭރިފަށެއް ވެސް ލެވިފައިވެ އެވެ.

ޓެމްޕްލް ޔުނިވަސިޓީގެ އެސޯސިއޭޓް ޕްރޮފެސަ އޮފް ބައޮލޮޖީ އެރިކް ކޯޑްސް މި ކޯރުގެ ދިރާސާއެއް ހެއްދެވުމަށް ފަހު ވިދާޅުވެފައި ވަނީ މިއީ އަޖައިބުން ފުރިފައިވާ ތަނެއް ކަމަށެވެ.

"ކަނޑުގެ އެންމެ ފުނުގައިވާ، އިންތިހާއަށް ހައިރާންކުރުވަނިވި ތަނެއް އެއީ. ކަނޑުގެ އެންމެ އަޑިއަށް ގޮސް ބަލާލާއިރު އޮއިދެމޭ ފެންގަނޑެއް ނުވަތަ ކޯރެއް ފެނުމަކީ ބޮޑު އަޖައިބެއް. އެވަގުތު އެހެން ދުނިޔޭގައި އުޅެވޭ ކަމުގެ އިހްސާސް ކުރެވެނީ،" ޕްރޮފެސަރު ވިދާޅުވެފައިވެ އެވެ.

ސައިންސްވެރިން މިތަނަށް ދީފައިވާ ނަމަކީ "ޖަކޫޒީ އޮފް ޑިސްޕެއާ" އެވެ.

މި ކޯޜުގެ ލޮނުކަން އޭގެ ވަށައިގެންވާ ސަރަހައްދުގައި ހުންނަ ވަރަށް ވުރެ ފަސް ގުނަ އިތުރެވެ. އަދި އޮކްސިޖަން ހުރީ ވަރަށް މަދުންނެވެ. އެއްގޮތަކަށް ވެސް ނެތޭ ބުނާހާ މަދުންނެވެ. އެހެންކަމުން މި ފެންގަނޑަށް ވެއްޓޭ ދިރޭ އެއްޗަކަށް ސަލާމަތް ވުމުގެ ފުރުސަތެއް ނޯންނާނެ އެވެ.

މި ކޯރު ހަގީގަތުގައި ވަރަށް ކުޑަ އެވެ. ހުރަހަށް ހުންނަނީ ގާތްގަނޑަކަށް 25 މީޓަރެވެ.

ކޯރު އޮތީ ކަނޑުގެ އެތައް ސަތޭކަ މީޓަރެއްގެ އަޑީގަ އެވެ. ނަމަވެސް މި ކޯރާ ކައިރިވެއްޖެ ނަމަ އިންސާނާ މަރުވަނީ ފެންގަނޑުގެ ލޮނުކަމަކުންނެއް ނޫނެވެ. މި ފެންގަނޑުގައިވާ މީތޭން އާއި ހައިޑްރޯޖަން ސަލްފައިޑްގެ ވިހައިގެ ސަބަބުންނެވެ.

މި ކޯރާއި އޭގެ ވަށައިގެންވާ ފެންގަނޑު ވަކިވެފައި ވަނީ ވެސް މި މާއްދާތަކުގެ ސަބަބުންނެވެ. ކަނޑުގެ ލޮނުގަނޑުގެ ތެރޭގައި ވަކިން ފެންގަނޑެއް އޮންނަ ސިފަ ގެނެސްދެނީ ވެސް މި ފެނުގައިވާ މާއްދާތަކުގެ ސަބަބުންނެވެ.

މި ކޯރުގެ ވިހަކަމުން މިތަނުގައި އުޅެވޭނީ ހަމައެކަނި ޝްރިމްޕް އާއި ޓިއުބު ވޯމްސް އަދި ބެކްޓީރިއާ ފަދަ މިފަދަ މާހައުލުތަކުގައި އުޅެވިދާނެ ވަރަށް މަދު އެއްޗަކަށެވެ.