އެމްއެޗް370 ކަނޑަށް ތިރިކޮށްފައިވާ ކަމަށް ބުނާ ރިޕޯޓް ދޮގުކޮށްފި

ސިޑްނީ (ނޮވެމްބަރު 2) - ގެއްލިފައިވާ މެލޭޝިއަން އެއާލައިންސްގެ ފްލައިޓް އެމްއެޗް370 ގަސްދުގައި މޫދަށް ޖައްސާފައިވާ ކަމަށް ބެލެވޭ ކަމަށް ކުރިން ބައެއް ރިޕޯޓްތައް ބުނި ނަމަވެސް އެފަދަ ކަމެއް ހިނގާފައި ނުވާ ކަމަށް ފަހުގެ ހޯދުންތަކުން ދައްކައިފި އެވެ.

އެކި ގައުމުތަކަށް ލައްވެފައިވާ އެމްއެޗް370 ގެ ބައިތައް ދިރާސާ ކުރުމަށް ފަހު އޮސްޓްރޭލިއާގެ ތަހުގީގު ކުރާ ފަރާތްތަކުން ތައްޔާރުކުރި ރިޕޯޓެއްގައި ބުނެފައި ވަނީ ބޯއިން 777 ގެ ފިޔަގަނޑު ހުރި ޕޮޒިޝަނަށް ބަލާއިރު ކަނޑަށް ބޯޓު ތިރިކޮށްފައިވާ ކަމަށް ނުބެލެވޭ ކަމަށެވެ. ބޯޓު ކަނޑުގައި ޖެހުނު އިރު ފިޔަގަނޑު ހުރީ ބޯޓުގެ ސްޕީޑް ދަށްކުރަން ހުޅުވާލުމުގެ ބަދަލުގައި ނިއުޓްރަލް ޕޮޒިޝަނުގައި ކަމަށް ފަހުގެ ރިޕޯޓުގައި ބުނެފައިވެ އެވެ. ކުރީގެ ރިޕޯޓްތަކުން ބުނެފައި ވަނީ ކޮންމެވެސް މީހަކު ބޯޓު ކޮންޓްރޯލްކޮށް ކަނޑުގައި ޖައްސާފައިވާ ކަމަށް ބެލެވޭ ކަމަށެވެ.

ކުއާލަ ލަމްޕޫރުން ފުރައިގެން ބެއިޖިން އަށް ދަތުރު ކުރި ބޯޓުން 239 މީހުން ދަތުރުކުރި އެވެ. މި ބޯޓުގެ ބައިތައް ކަމަށް ބެލެވޭ 20 އައިޓަމެއް މިހާތަނަށް ވަނީ ފެނިފަ އެވެ.

އޮސްޓްރޭލިއާ އިން ފަހުގެ ރިޕޯޓް އާއްމުކޮށްފައިވާ އިރު ގެއްލިފައިވާ ބޯޓު ހޯދުމުގެ މަސައްކަތް ދެން ކުރިއަށް ގެންދާނެ ގޮތަކާ ބެހޭ ގޮތުން މަޝްވަރާ ކުރުމަށް ބައިނަލްއަގުވާމީ އޭވިއޭޝަން ތަޖްރިބާކާރުން ކެންބަރާގައި ބައްދަލު ކުރުމަށް ވަނީ ހަމަޖެހިފަ އެވެ. ބޯޓު ހޯދުމުގެ މަސައްކަތް ކުރަނީ އޮސްޓްރޭލިއާ، މެލޭޝިއާ އަދި ޗައިނާ އިންނެވެ. ބޯޓު ހޯދުމަށް ކަނޑު އަޑިން 120،000 އަކަ ކިލޯ މީޓަރުގެ ސަރަހައްދެއް ބަލާ ގޮތަށް ވަނީ ހަމަޖެހިފަ އެވެ. ބޯޓާ ބެހޭ އެއްވެސް މައުލޫމާތެއް ނުލިބިއްޖެ ނަމަ ބޯޓު ހޯދުމުގެ މަސައްކަތް މި އަހަރުގެ ނިޔަލަށް ހުއްޓާލާ ގޮތަށް ވަނީ ހަމަޖެހިފަ އެވެ.