އެމްއެޗް370 ހޯދަން އުޅެނިކޮށް ދެ އާގު ބޯޓު ވަނީ ފެނިފައި

ކުއާލަ ލަމްޕޫރު (މެއި 4) - ގެއްލިފައިވާ މެލޭޝިއާ އެއާލައިންސްގެ ފްލައިޓް އެމްއެޗް370 ހޯދަން ކުރަމުންދާ މަސައްކަތުގައި ކަނޑަށް ފެތިފައިވާ ދެ އާގު ބޯޓު ފެނިފައިވާ ކަމަށް އޮފިޝަލުން ބުނެފި އެވެ.

އިންޑިއާ ކަނޑުގެ ދެކުނުން ފެނިފައި ވަނީ ބޯޓު ދެލި ހިފައިގެން ދަތުރުކުރި 19 ވަނަ ވަނަ ގަރުނުގެ ދެ ބޯޓު ކަމަށް ވެސްޓަން އޮސްޓްރޭލިއަން މިއުޒިއަމުން ބުނެފައިވެ އެވެ. މިއުޒިއަމްގެ ކިއުރޭޓާ އޮފް މެރިޓައިމް އާކިއޮލޮޖީ ރޮސް އެންޑަސަން ވިދާޅުވީ އެ ސަރަހައްދުން ދަތުރުކުރި ކާގޯ ބޯޓު ފަހަރުގައި އާއްމުކޮށް 15-30 މީހުން ތިބޭ ކަމަށެވެ. އަދި ބައެއް ފަހަރު ކެޕްޓަނުން އެ މީހުންގެ އަނބިންނާއި ދަރިން ގޮވައިގެން ދަތުރުކުރާ ކަމަށް ވެސް އޭނާ ވިދާޅުވި އެވެ. މީގެ ތެރޭން އެއް ބޯޓު ފެނިފައި ވަނީ 3،900 މީޓަރު (13،000 ފޫޓް) އަޑިންނެވެ. ބޯޓުތައް ފެނިފައި ވަނީ 2015 ވަނަ އަހަރު އެވެ.

މެލޭޝިއާ އެއާލައިންސްގެ ޖެޓް މާޗް 8، 2014 ގައި ގެއްލުނީ ކުއާލަ ލަމްޕޫރުން ބެއިޖިން އަށް ދަތުރު ކުރަނިކޮށެވެ. ބޯޓުން 239 މީހުން ދަތުރުކުރި އެވެ.

ބޯޓު ހޯދަން ވަނީ އިންޑިއާ ކަނޑުގެ އަޑިން 120،000 އަކަ ކިލޯ މީޓަރު (46،000 އަކަ މޭލު) ގެ ސަރަހައްދެއް ބަލައިފަ އެވެ. މިއީ ދުނިޔޭގެ އޭވިއޭޝަން ތާރީޚުގައި ވެސް ބޯޓެއް ހޯދަން ކަނޑު އަޑިން ބެލި އެންމެ ބޮޑު ސަރަހައްދެވެ.

ކަނޑު އަޑިން ފެނުނު ލަކުޑި ބޯޓަކީ ސްކޮޓްލެންޑުން އެޑެލައިޑީ އަށް 1876 ވަނަ އަހަރު ދަތުރުކުރަނިކޮށް ގެއްލުނު ޑަބްލިއު. ގޯޑަން ނުވަތަ ވޭލްސް އިން އިންޑޮނީޝިއާ އަށް ދަތުރުކުރަނިކޮށް ގެއްލުނު މަގްދަލާ ބޯޓު ކަމަށް ވެދާނެ ކަމަށް ވެސް ލަފާކޮށްފައިވެ އެވެ.

އެމްއެޗް370 ހޯދުމުގެ މަސައްކަތް އަލުން ފެށީ މި އަހަރުގެ ޖެނުއަރީ މަހު އެވެ. މިހާރު ބަލަމުންދަނީ ކުރިން ބެލި ސަރަހައްދުގެ އުތުރުގެ އޭރިއާއެކެވެ. އެމްއެޗް370 ހޯދުމުގެ މަސައްކަތް މެލޭޝިއާ ސަރުކާރުން ހަވާލުކޮށްފައި ވަނީ އެމެރިކާގެ އޯޝަން އިންފިނިޓީއާ އެވެ. އެމްއެޗް370 އާ ބެހޭ އެއްވެސް މައުލޫމާތެއް އަދި ލިބިފައެއް ނުވެ އެވެ.