އެމްއެޗް370 ވެއްޓިފައި އޮވެދާނެ ތަނާ ބެހޭ އާ މައުލޫމާތެއް ލިބިއްޖެ

ސިޑްނީ (އެޕްރީލް 21) - މެލޭޝިއާ އެއާލައިންސްގެ ފްލައިޓް އެމްއެޗް30 ފްލައިޓް ވެއްޓިފައި އޮވެދާނެ ކަމަށް ލަފާކުރެވޭ ތަނާ ބެހޭ އާ މައުލޫމާތެއް އޮސްޓްރޭލިއާގެ ސައެންސްވެރިން އާއްމުކޮށްފި އެވެ.

ޑްރިފްޓް މޮޑެލިންގެ އެހީގައި ހެދި ދިރާސާ އަށް ފަހު ސައެންސްވެރިން ބުނެފައި ވަނީ ބޯޓު ވެއްޓިފައިވާނެ ކަމަށް ލަފާކުރެވެނީ ބޯޓު ހޯދަން ބެލި ސަރަހައްދުގެ އުތުރުގައި ކަމަށެވެ. ބޯޓު ހޯދަން އެންމެ ބޮޑަށް ބަލާފައި ވަނީ އިންޑިއާ ކަނޑުގެ ދެކުނުން ބޮޑު ސަރަހައްދެކެވެ. ނަމަވެސް ފަހުގެ ހޯދުމުގައި ސައެންސްވެރިން ބުރަވެފައި ވަނީ އެ ސަރަހައްދުގެ އުތުރުން 25،000 އަކަ މިލޯމީޓަރު (9،700 އަކަ މޭލު) ގެ ސަރަހައްދެއްގައި ބޯޓު އޮވެދާނެ ކަމަށެވެ. ބޯޓު ހޯދުމުގައި އުޅުނު އޮސްޓްރޭލިއާ، މެލޭޝިއާ އަދި ޗައިނާ އިން ވަނީ އެ މަސައްކަތް ޖެނުއަރީ މަހު ހުއްޓާލައިފަ އެވެ.

ބޯޓު ހޯދުމަށް ކުރިން ވެސް ވަނީ ޑްރިފްޓް މޮޑެލިން ބޭނުންކޮށްފަ އެވެ. ނަމަވެސް ބޯއިން 777 ގެ ބޯޓެއްގެ އަސްލު ފިޔަވަގަނޑެއް ބޭނުންކޮށްގެން ހެދި ދިރާސާ އަށް ފަހު ބޯޓު އޮވެދާނެ ކަމަށް ބެލެވޭ ހިސާބު އިތުރަށް ވަނީ ޔަގީންކޮށްފަ އެވެ. ކުރީގެ މޮޑެލްގައި ބޭނުންކޮށްފައި ވަނީ ރިޔޫނިއަން އިން ފެނުނު ފިޔަގަނޑުގެ ނަމޫނާ އެކެވެ.

ކުރިން ހެދި ޑްރިފްޓް މޮޑެލިންގެ ރިޕޯޓަށް ފަހު ޑިސެމްބަރު މަހު ނެރުނު ރިޕޯޓާ ގުޅިގެން އޮސްޓްރޭލިއާގެ ޓްރާންސްޕޯޓް މިނިސްޓަރު ޑަރެން ޗެސްޓާ ވިދާޅުވެފައި ވަނީ އެއީ ބޯޓު އޮތްތަނާ ބެހޭ ސީދާ މައުލޫމާތު ލިބޭ ރިޕޯޓެއް ނޫން ކަމަށާއި އެހެންވެ އެ ސަރަހައްދު ބެލުމަށް އެ ރިޕޯޓުގެ އަލީގައި ބާރު ނުލިބޭ ކަމަށެވެ. ފަހުގެ ރިޕޯޓާ ގުޅިގެން ވެސް އޭނާ ވަނީ ކުރިން ވިދާޅުވި ވާހަކަ ތަކުރާރު ކުރައްވައިފަ އެވެ. ނަމަވެސް މެލޭޝިއާ އިން އިތުރަށް ދިރާސާ ކުރަން އެ ރިޕޯޓް ފޮނުވާފައިވާ ކަމަށް ވިދާޅުވި އެވެ. އަދި ތަހުގީގުގައި އިސްކޮށް އުޅޭ ގައުމަކީ މެލޭޝިއާ ކަމަށާއި ބޯޓު ހޯދަން އިތުރު ސަރަހައްދެއް ބަލަން އެދިއްޖެ ނަމަ އޮސްޓްރޭލިއާ އިން އެކަމާ ވިސްނާނެ ކަމަށް އޭނާ ވިދާޅުވި އެވެ.

އެމްއެޗް370 ހޯދަން ވަނީ ވެސްޓަން އޮސްޓްރޭލިއާގެ ބޭރުން 120،000 އަކަ މީޓަރު (46،000 އަކަ މޭލު) ގެ ކަނޑު އަޑީގެ ސަރަހައްދެއް ބަލައިފަ އެވެ. އެމްއެޗް370 ގެއްލިފައި ވަނީ މާޗް 2014 ގައި ކުއާލަ ލަމްޕޫރުން ބެއިޖިން އަށް ދަތުރު ކުރަނިކޮށެވެ. އެ ބޯޓުން 239 މީހުން ދަތުރު ކުރި އެވެ.