ރައީސްގެ ހިތާބުން އަންނަ އަހަރުގެ މިސްރާބު ސާފުވެއްޖެ: ނަޝީދު

ޖުމްހޫރީ ދުވަހުގެ މުނާސަބަތުގައި ރައީސް އިބްރާހިމް މުހައްމަދު ސޯލިހު ދެއްވި ހިތާބުން ކުރިއަށް އޮތް އަހަރުގެ މިސްރާބު ސާފުވެއްޖެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

ރައީސް ދެއްވި ހިތާބުގައި ވަނީ އަންނަ އަހަރު ކުރަން ރާވާފައިވާ ވަރަށް ގިނަ ކަންކަމާ ބެހޭ ގޮތުން ވާހަކަ ދައްކަވައިފަ އެވެ. އެގޮތުން ވެރިކަމުގެ ފުރަތަމަ އަހަރު ގައުމުގައި އޮތް ސިޔާސީ އަދި އިޖްތިމާއީ ހަމަނުޖެހުން ހައްލުކޮށް، މިއަހަރު ކޮވިޑް-19ގެ ކަންކަމުން އަރައިގަތުމަށް ފަހު އަންނަ އަހަަރަކީ މީހުން ބިނާކުރުމާއި މަޝްރޫއުތަކުގެ އަހަރު ކަމަށް ރައީސް ވިދާޅުވި އެވެ.

ރާއްޖޭގެ 53 ވަނަ ޖުމްހޫރީ ދުވަހުގެ މުނާސަބަތުގައި ކުރީގެ ރައީސް މުހައްމަދު ނަޝީދުކުރެއްވި ޓުވީޓުގައި ވިދާޅުވީ ރައީސްގެ ހިތާބުން ރައްޔިތުންގެ އުންމީދު އާވާނެ ކަމަށެވެ.

މި ސަރުކާރުގެ ހުރިހާ ވައުދެއް ވެސް ފުއްދާނެ ކަން ފާހަގަކުރައްވައި ނަޝީދު ވިދާޅުވީ "މާތް ﷲ އިރާދަފުޅުން ހުރިހާ ވައުދެއް ރަނުން ރަނަށް ފުއްދޭނެ،" ކަމަށެވެ.

ރައީީސް ވިދާޅުވި ގޮތުގައި އަންނަ އަހަރު ހުރިހާ ދާއިރާއެއްގެ ތަރައްގީއަށް ވެސް ޕްލޭންތައް އެބަހުއްޓެވެ. އެގޮތުން ސިއްހީ ދާއިރާ ލާމަރުކަޒުކުރުމުގެ 56 މަޝްރޫއަކާއި ފެނާއި ނަރުދަމާގެ މަސައްކަތް ނުފެށި ހުރި ހުރިހާ ރަށެއްގައި އަންނަ އަހަރު އެ މަޝްރޫއުތައް ފެށުމުގެ އިތުރަށް މަސްވެރިކަމާއި ދަނޑުވެރިކަން އިތުރަށް ތަރައްގީކޮށް އިގްތިސާދު ފުޅާކުރުމުގެ މަސައްކަތްތާއި ތައުލީމީ ދާއިރާ އަދި ކުޅިވަރުގެ ދާއިރާ އަށް ހުރި ކަންކަމުގެ ވާހަކަ ވެސް ދެއްކެވި އެވެ.