ހިޔާނާތުގެ ތަހުގީގު ލަހެއް ނޫން، ހެކި ހޯދުން އުނދަގޫ މަސައްކަތެއް: ޕީސީސީއާރު

އެމްއެމްޕީއާރުސީ މެދުވެރިކޮށް ހިންގި ބޮޑު ޚިޔާނާތުގެ ތަހުގީގަށް ކުރަން ޖެހޭ މަސައްކަތްތަކާ އަޅާބަލާއިރު މައްސަލަ ލަސްވެއްޖެ ކަމަށް ގަބޫލުނުކުރައްވާ ކަމަށާއި އެ ލަސްކަން ފެންނަނީ މައްސަލަތައް ސާބިތުކުރެވޭވަރަށް ހެކި ހޯދަން ކުރާ މަސައްކަތުގައި ކަމަށް އެސެޓް ރިކަވަރީ ކޮމިޝަން (ޕީސީސީއާރު)ގެ ރައީސް އަހުމަދު އަސްއަދު މިއަދު ވިދާޅުވެއްޖެ އެވެ.

އެމްއެމްޕީއާރުސީގެ ތަހުގީގު ލަސްވުމުގެ ޝަކުވާތަކާ ގުޅިގެން މަޖިލީހުގެ މިނިވަން މުއައްސަސާތަކާ ބެހޭ ކޮމިޓީ އަށް މިއަދު ވަނީ ޕީސީސީއާރުގެ އިތުރުން ޕްރޮސިކިއުޓަ ޖެނެރަލް ހުސެއިން ޝަމީމާއި އޭސީސީގެ މެމްބަރުން ހާޒިރުކޮށް ސުވާލުކޮށްފަ އެވެ. ގުޅިގެން ހިންގާ މި ތަހުގީގުގެ ބޮޑު ދައުރެއް އަދާކުރާ ފުލުހުން ހާޒިރެއް ނުކުރެ އެވެ.

ކޮމިޓީގައި، މެމްބަރުންގެ ސުވާލުތައް ޕީޖީ އާއި އޭސީސީ އަދި ޕީސީސީއާރަށް އަމާޒުވީ ހިޔާނާތުގެ ތަހުގީގު ދިގުލައި އިތުބާރު ގެއްލެމުންދާ މައްސަލައިގަ އެވެ. އެކަން ކުރިއަށް ގެންދަން ހަވާލުކޮށްފައި ތިބި މުއައްސަސާތައް ފޭލްވަމުންދާ މަންޒަރު ފެނުމަކީ، މަޖިލީހުގެ މެމްބަރުން ވެސް ފެއިލްވުން ކަަމަށް ވިދާޅުވެ ތިނަދޫ ދެކުނު ދާއިރާގެ އެމްޑީޕީގެ މެމްބަރު އަބްދުﷲ ސަނީފް ހިތްހަމަނުޖެހުން ފާޅުކުރެއްވި އެވެ.

އޭސީސީގެ ރައީސް ފާތުމަތު ޝިއުނާ ވިދާޅުވީ ޚިޔާނާތުގައި ޚާއްސަ އިސްކަމެއް ދީގެން، 30 މީހެއްގެ މައްސަލަ އަންނަނީ ބަލަމުންނެވެ. އެއީ ގުޅިގެން ހިންގާ ތަހުގީގަކަށް ވުމާއެކު، މައްސަލަތަކުގައި އިސްކަންދޭނެ ތަރުތީބެއް ވެސް މިހާރު ކަނޑައަޅާފައިވާ ކަން ފާހަގަކުރެއްވި އެވެ.

ޕްރޮސިކިއުޓަ ޖެނެރަލް ހުސެއިން ޝަމީމް ވިދާޅުވީ އެމްއެމްޕީއާރުސީގެ ޚިޔާނާތުގެ ތަހުގީގަށް ޚާއްސަ އެ އޮފީހުގައި ޓީމެއް އެބައޮތް ކަމަށެވެ. މައްސަލައެއް ފޮނުވުމާ އެކު ދެތިން ހަތަރު ދުވަސްތެރޭގައި ދިރާސާކޮށް ނިންމައި ހެކި ހުރި ނަމަ ދައުވާ އުފުލޭ މިންވަރަށް އެ އޮފީސް ތައްޔާރު ކަމަށް ވިދާޅުވި އެވެ.

ވަކި ޓީމެއް އެކަމަށް ޚާއްސަކޮށްފައި ވަނީ، އޭނާ ވިދާޅުވި ގޮތުގައި، ދައުވާ އުފުލަން މައްސަލަަތައް ފޮނުވުމާ އެކު ކޯޓުތަކުގައި ވެސް ބިޒީވިޔަސް، ދެން ފޮނުވާ މައްސަލަތައް ދިރާސާކުރަން ވެސް ބަޔަކު ތިބެން ޖެހޭނެތީ އެވެ.

"އަޅުގަނޑުމެންނަށް އެކަށީގެންވާ ހެއްކާ އެކު ހުށަހަޅައިފިއްޔާ ލަސްނުކޮށް ކޯޓަށް ހުށަހަޅާނަން،" ޝަމީމް ވިދާޅުވި އެވެ.

ތަހުގީގާ ގުޅޭ ގޮތުން ޖުމްލަކޮށް ވާހަކަ ދައްކަވަމުން އަސްއަދު ވިދާޅުވީ މުޅި ތަހުގީގުގެ ބޭނުމަކީ ބަޔަކު ކުށްވެރިކޮށް ފިޔަވަޅު އެޅުން ނޫން ކަމަށާއި މުޅި ދައުލަތް ފޫއަޅުވާލައި އެފަދަ އިތުރު ކަމެއް ހިނގިޔަ ނުދިނުމުގެ މަސައްކަތް ވެސް ކުރުން ކަމަށެވެ. ފައިސާއާ ގުޅިފައިވާ މިފަދަ ތަހުގީގަކީ ފަސޭހަކަމެއް ނޫން ކަމަށާއި މިކަމުގައި އެއްބާރުލުން ނުލިބުމަކީ ވެސް މައްސަލަ ލަސްވުމުގައި ދިމާވި ކަމެއް ކަމަށް އަސްއަދު ވިދާޅުވި އެވެ.

"ފުރިހަމަ ނުވާ ތަހުގީގެއް ފޮނުވުމުން، ޕީޖީން އަނެއްކާ އަޅުގަނޑުމެންނާ ދިމާލަށް އަނބުރާ ފޮނުވާލާނެ. އެހެންވާކަށް ވެސް ބޭނުމެއް ނޫން،" އަސްއަދު ވިދާޅުވި އެވެ.

އޭނާ ވިދާޅުވި ގޮތުގައި މައްސަލަތަކުގައި މިހާރު އަންނަނީ ހެކި ހޯދުމުގެ މަސައްކަތް ކުރަމުންނެވެ. ކޮންމެ މީހަކާ ގުޅިގެން ވެސް ވަރަށް ގިނަ ކަންކަން ބަލަމުން އަންނަ ކަމަށާއި އެގޮތަށް ބަލާއިރު ތަހުގީގުގެ މިސްރާބު ބަދަލުވެ ފުޅާ ވެސް ވަމުން ދާ ވިދާޅުވި އެވެ.

ތަހުގީގަށް ބައެއް އިދާރާތަކުން އެއްބާރުލުން ނުދިނުމަކީ ވެސް ލަސްވުމެއް ކަމަށް ވިދާޅުވެ އެއްބާރުލުން ނުދިނުމުގެ އެންމެ ބޮޑު ތުހުމަތެއް އޭނާ އަމާޒުކުރެއްވީ، ބޭންކް އޮފް މޯލްޑިވްސް (ބީއެމްއެލް)އަށެވެ. އެމްއެމްޕީއާރުސީ ފައިސާ އިން ޚިޔާނާތް ހިންގަން ބޭންކްގެ ބައެއް މުވައްޒަފުން އެހީވެދިން ކަމުގެ ތުހުމަތު، އަންނަނީ ތަހުގީގު ވެސް ކުރަމުންނެވެ.

އަސްއަދު ވިދާޅުވީ ހިޔާނާތާ ގުޅޭ މީހުންގެ މައުލޫމާތު ހޯދަން ބީއެމްއެލަށް ފޮނުވުމުން، އުޒުރުތަކެއް ދައްކައި މައުލޫމާތު ނުދީ ލަސްކުރި ކަމަށެވެ.

"އޮގަސްޓް، 7، 2019 އާ ހަމައަށް، އެންމެ މުހިއްމުކޮށް މައުލޫމާތު ލިބެން ޖެހޭ ބޭންކް އޮފް މޯލްޑިވްސް އިން ނުދޭ. ކޯޓު މެދުވެރިކޮށް މައުލޫމާތު ލިބެން ފެށީ،" އަސްއަދު ވިދާޅުވި އެވެ.

އޭނާ ވިދާޅުވި ގޮތުގައި ހެކި ހޯދައި ތަހުގީގު އަވަސްވީ އެ ހިސާބުންނެވެ.

އަސްއަދު ވިދާޅުވީ ނަގުދު ފައިސާ އިން ގިނަ މުއާމަލާތްތަކެއް ހިންގާފައިވާ އެމްއެމްޕީއާރުސީ ސްކީމުގައި ހޯދި މުދާވެރިކަން ގިނަ މީހުންގެ ހުރީ އަމިއްލަ ނަމަކު ނޫން ކަމަށެވެ. އާއިލާގެ މީހެއް ނުވަތަ ގާތް މީހެއްގެ ނަން މަތީގައި ކަމަށާއި އެ ފައިސާ އެންމެ ގިނައިން ބަދަލުކޮށްފައި ހުރީ ގޯތިގެދޮރާއި އުޅަނދު ފަދަ ތަކެއްޗަށް ކަމަށް ވިދާޅުވި އެވެ.

"ބައެއް ފަހަރަށް އެބަހުރި ގޯއްޗެއް ގަނެފައި ރަޖިސްޓްރީ ނުކޮށް ވެސް ބާއްވާފައި. ނޫނީ ގަތުމުގެ ބަދަލުގައި ދިގު މުއްދަތަކަށް ކުއްޔަށް ވެސް ނަގާފައި،" އަސްއަދު ވިދާޅުވި އެވެ.

އެސެޓް ރިކަވަރީން އެކުލަވާލި ރިޕޯޓުގައިވާ ތަފްސީލަށް މެމްބަރުން އެދިވަޑައިގަތުމުން އަސްއަދު ވިދާޅުވި ގޮތުގައި އެމްއެމްޕީއާރުސީގެ ޚިޔާނާތުގެ ތަހުގީގު ކުރިއަށްދާއިރު ވެސް، ކުރީގެ ސަރުކާރުން ގާނޫނީ އިމުން ބޭރުގައި ދޫކޮށްފައިވާ 37 ރަށަކާއި 12 ފަޅެއް އެބައޮތް ކަަމަށެވެ. ޓޫރިޒަމްގެ ގާނޫނުގެ 5 ވަނަ މާއްދާއާ ޚިލާފަށް ދޫކުރި މި ރަށްތަކާއި ފަޅުތަކުގެ ތެރެއިން ބައެއް ތަންތަނުގައި ވަނީ ރިސޯޓް ހަދައިފަ އެވެ. ބައެއް ރަށްތައް ނިމި ރިސޯޓެއްގެ ގޮތުގައި ހުޅުވަން ތައްޔާރުވެފައިވާއިރު، އެއްވެސް ގޮތަކަށް މަސައްކަތްތައް ކުރިއަށް ނުދާ ރަށްތައް ވެސް ހުރި ކަން އަސްއަދު ފާހަގަކުރެއްވި އެވެ.

ގާނޫނީ ގޮތުން ބަލާއިރު މިކަމާ މެދު ގޮތެއް ނިންމުމަކީ، އަސްއަދު ވިދާޅުވި ގޮތުގައި، ވަރަށް ބޮޑު މައްސަލައެކެވެ. އެއީ، އާމްދަނީ އެންމެ ގިނައިން ވަންނަ ޓޫރިޒަމް ދާއިރާއާ ގުޅި ރަށްތައް ދޫކުރި މީހުންގެ ތެރޭގައި މި ދާއިރާގެ ވިޔަފާރީގައި އެންމެ ބޮޑަށް ހަރަކާތްތެރިވާ މީހުން ހިމެނޭތީ ކަމަށް ވިދާޅުވި އެވެ.

"ވަޒީފާ އެބަ އުފެދޭ، ޓެކްސް ފައިސާ އެބަލިބޭ. އޭގެ ސަބަބުން މުޅި އިގްތިސާދަށް ފައިދާވޭ. މިހެން އޮތް މައްސަލައެއްގައި އަޅުގަނޑުމެން ހައްލެއް ހޯދަން ޖެހިފައިވާކަން އޮންނާނީ ފާހަގަކޮށްފައި،" އަސްއަދު ވިދާޅުވި އެވެ.