ކުޅުދުއްފުށީ ހޮސްޕިޓަލުގައި ކޮވިޑް-19 އަށް ޓެސްޓު ކުރަން ފަށައިފި

ހދ. ކުޅުދުއްފުށީ ރީޖަނަލް ހޮސްޕިޓަލުގައި ކޮވިޑް-19 އަށް ޓެސްޓު ކުރަން މިއަދު ފަށައިފި އެވެ.

އެ ހޮސްޕިޓަލުން ބުނީ ޕީސީއާރު ސިސްޓަމުން ދުވާލަކު 72 ސާމްޕަލް ޓެސްޓު ކުރެވޭނެ ކަމަށެވެ.

ކުޅުދުއްފުށީ ހޮސްޕިޓަލްގައި ކޮވިޑަށް ޓެސްޓު ކުރަން ފެށިއިރު، އެ ތަނުގެ ދެ މުވައްޒަފަކު ވަނީ ސަރުކާރުގެ މައި ހޮސްޕިޓަލް، އައިޖީއެމްއެޗުގައި ތިން ހަފުތާގެ ތަމްރީނު ޕްރޮގްރާމެއް ފުރިހަމަކޮށްފަ އެވެ.

މިވަގުތު ތަމްރީނު ފުރިހަމަކޮށްފައި ވަނީ ލެބޯރެޓަރީގެ ދެ ޓެކްނޮލޮޖިސްޓުންނަށް ވުމުން ފުލް ކެޕޭސިޓީގައި އޮޕަރޭޓް ނުކުރެވޭނެ ކަމަށާއި ނަމަވެސް ކުރިމަގުގައި އިތުރު މީހުން ތަމްރީނު ކުރާނެ ކަމަށް ކުޅުދުއްފުށީ ހޮސްޕިޓަލުން ބުނެ އެވެ.

ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ފަންޑުކޮށްގެން ކުރިއަށް ގެންދިޔަ ޕީސީއާރު ލެބްގެ މަސައްކަތް ކޮށްފައި ވަނީ ވޭވް ލެންތު ކޮމްޕެނީންނެވެ.

"..މިހާރު މި ހޮސްޕިޓަލުން ވެސް ރިއަލް ޓައިމް ޕީސީއާރު ޓެސްޓު ކުރެވޭނެ. މިއީ މި ސަރަހައްދުގެ ރައްޔިތުންނަށް ލިބިގެންދާނެ ވަރަށް ބޮޑު ލުއި ފަސޭހައެއްކަން ޔަގީން. ކުރިއަށް އޮތް ތަނުގައި ޖީން އެކްސްޕާޓް ކާޓްރިޖުތައް ވެސް މި ކޮޅަށް ލިބޭނެ،" ކުޅުދުއްފުށީ ހޮސްޕިޓަލުން ވާހަކަ ދެއްކެވި އޮފިޝަލަކު ވިދާޅުވި އެވެ.

ކޮވިޑް-19 އަށް މިހާރު ޓެސްޓު ކުރަމުން އަންނަނީ ކުޅުދުއްފުށީ ހޮސްޕިޓަލްގެ އިތުރުން އައިޖީއެމްއެޗާއި އޭޑީކޭ ހޮސްޕިޓަލާއި ޕޮލިސް ފޮރެންސިކް ސާވިސްގެ އިތުރުން އައްޑޫ އިކްއެޓޯރިއަލް ހޮސްޕިޓަލުގަ އެވެ. ޖީން އެކްސްޕާޓް މެޝިން ބަހައްޓައިގެން އިތުރު ހަ ރަށެއްގައި ކޮވިޑް-19 އަަށް ޓެސްޓުކުރަން ވަނީ ތައްޔާރުވެފަ އެވެ.

އެއީ ށ. ފުނަދޫގައި ހުންނަ އެ އަތޮޅު ހޮސްޕިޓަލް، ރ. އުނގޫފާރު ރީޖަނަލް ހޮސްޕިޓަލް، ބ. އޭދަފުށީގައި ހުންނަ އެ އަތޮޅު ހޮސްޕިޓަލް، ލ. ގަން ރީޖަނަލް ހޮސްޕިޓަލް، ގއ. އަތޮޅު ހޮސްޕިޓަލް އަދި ގދ. ތިނަދޫގައި ހުންނަ އަބްދުއްސަމަރު މެމޯރިއަލް ހޮސްޕިޓަލެވެ. އެ ރަށްތަކާއެކު ރާއްޖޭގެ ނުވަ ސަރަހައްދެއްގައި ކޮވިޑް-19 އަށް ޓެސްޓު ކުރެވޭނެ އެވެ. ހެލްތު މިނިސްޓްރީން ކުރިން ބުނެފައިވާ ގޮތުގައި، ރާއްޖޭގެ އެކި ސަރަހައްދުތަކުގައި ކޮވިޑް-19 އަށް ޓެސްޓުކުރަން ފެށުމުން ބަލި މީހުންގެ ސާމްޕަލްތައް އެންމެ ކައިރީގައި ހުންނަ ޓެސްޓު ސެންޓަރަކަށް ގެންގޮސް، ނަތީޖާ ލިބުން އަވަސް ވާނެ އެވެ.