އައިއެސްގެ އަތްދަށުން މޮސޫލް ހިފުމުގެ ހަނގުރާމަ ފަށައިފި

ބަޣުދާދު (އޮކްޓޯބަރު 17) - އިސްލާމިކް ސްޓޭޓް (އައިއެސް) ގެ އަތް ދަށުން އިރާގުގެ މޮސޫލް ހިފުމުގެ ބޮޑު ހަނގުރާމަ ފަށާފައިވާ ކަމަށް އެ ގައުމުގެ ބޮޑު ވަޒީރު ހައިދަރު އަލް އަބާދީ އިއުލާން ކުރައްވައިފި އެވެ.

އިރާގުގެ ދެ ވަނަ އަށް އެންމެ ބޮޑު ސިޓީ ހިފުމަށް ދޭ ހަމަލާތަކުގައި ކުރުދީންގެ ޕެޝްމާގާ ޖަމާއަތުގެ ހަނގުރާމަވެރިންނާއި އިރާގު ސިފައިން ދަނީ ބައިވެރިވަމުންނެވެ. ހަމަލާ ދެމުންދާ އިރު އެމެރިކާ ކޯލީޝަނުން ދަނީ ވައިގެ ހަމަލާތައް ވެސް ދެމުންނެވެ.

އައިއެސްގެ ބާރުގެ ދަށަށް މޮސޫލް ގެންދިޔައީ ޖޫން 2014 ގަ އެވެ. އަދި އެއީ އިރާގުން އައިއެސްގެ ބާރުގެ ދަށުގައި މިހާރު އޮތް ހަމައެކަނި ސިޓީ ވެސް މެ އެވެ. އައިއެސްގެ ޚިލާފަތު އެ ޖަމާއަތުގެ ލީޑަރު އަބޫ ބަކްރު އަލް ބަޣުދާދީ އިއުލާން ކުރީ ވެސް މޮސޫލުންނެވެ.

މޮސޫލް ހިފުމުގެ އޮޕަރޭޝަން ފެށިކަން އިއުލާން ކުރައްވަމުން ބޮޑު ވަޒީރު އަބާދީ މިއަދު ވަރަށް ހެނދުނާ އިރާގު ޓީވީން ދެއްވި ބަޔާނެއްގައި ވިދާޅުވީ ކާމިޔާބު އަތުވެއްޖެ ކަމަށާއި މޮސޫލް ހިފުމުގެ ހަނގުރާމަ ފަށައިފި ކަމަށެވެ.

"އައިއެސްގެ އަތް ދަށުން މޮސޫލް ހިފުމުގެ މުހިންމު އޮޕަރޭޝަން ފަށައިފިކަން އަޅުގަނޑު އިއުލާން ކުރަން،: އަބާދީ ވިދާޅުވި އެވެ. "މާތްﷲ ގެ އިރާދަފުޅުން މޮސޫލް މިނިވަންވުމުގެ އުފާފާޅު ކުރަން ވަރަށް އަވަހަށް އެ ސިޓީގައި ބައްދަލުވާނެ."

އިރާގުގެ ސީނިއާ އޮފިސަރުންގެ ހާޒިރުގައި އަބާދީ ވިދާޅުވީ މޮސޫލް އަށް ވަންނާނީ އިރާގު ސިފައިން އެކަނި ކަމަށެވެ.

އުތުރުގެ ނިނެވާހު ޕްރޮވިންސްގެ ވެރިރަށް ހިފުމުގެ ހަނގުރާމަ އަށް އިރާގު ސިފައިން ތައްޔާރުވަމުންދާތާ އެތައް ދުވަހެއް ވެއްޖެ އެވެ. މޮސޫލްގެ އުތުރުން 37 މޭލު ދުރުގައި އޮންނަ ގައްޔާރާ ޓައުން އިރާގު ސިފައިން ވަނީ އޮގަސްޓް މަހު ހިފައިފަ އެވެ.

ބްރިގޭޑިއާ ޖެނެރަލް ހައިދަރު ފާދިލް އޭޕީ އަށް ވިދާޅުވީ މޮސޫލް ހިފުމުގެ އޮޕަރޭޝަނުގައި 25،000 ސިފައިން ބައިވެރިވަމުންދާ ކަމަށެވެ.

ތަޖްރިބާކާރުން ބުނަނީ މޮސޫލް ހިފުމަށް މަސްތަކެއް ހޭދަވާނެ ކަމަށެވެ. މޮސޫލް ހިފުމުގެ އޮޕަރޭޝަން ފެށުމުގެ ކުރިން އާއްމުން ސަމާލުވެ ތިބުމަށް އިލްތިމާސްކޮށް، އެތައް ހާސް ލީފްލެޓެއް އިރާގު ސިފައިން ވަނީ އެ ސިޓީ އަށް އަޅައިފަ އެވެ.

މޮސޫލްގައި މިހާރު ތިބީ ކިހާ އަދަދެއްގެ މީހުން ކަމެއް ނޭނގެ އެވެ. މީގެ ދެ އަހަރު ކުރިން އައިއެސް އިން މޮސޫލް ހިފި އިރު އެ ސިޓީގައި ދެ މިލިއަން މީހުން ތިއްބެވެ.