ރާއްޖެ ސަލާމަތްކުރަން ނަރުހުން ވަނީ ބޮޑު ގުރުބާނީއެއް: މަބްރޫކް

ބައިނަލްއަގުވާމީ ނަރުހުންގެ ދުވަސް މިއަދު ފާހަގަކުރާއިރު، ގައުމަށް ކުރިމަތިވެފައި އޮތް ބަލިމަޑުކަމުގައި އަމިއްލަ ފުރާނަ އަށް ބެލުމެއް ނެތި ރާއްޖެ ސަލާމަތްކުރަން ނަރުހުން ވަމުން އަންނަނީ ބޮޑު ގުރުބާނީއެއް ކަމަށް ކޮވިޑް-19 އަށް ސަރުކާރުން ކަނޑައަޅާފައިވާ ތަރުޖަމާން މުހައްމަދު މަބްރޫކް އަޒީޒް މިރޭ ވިދާޅުވެއްޖެ އެވެ.

ނެޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ)ގައި ބޭއްވި މީޑިއާ ބްރީފިން ފައްޓަވަމުން މަބްރޫކް ވިދާޅުވީ ކޮވިޑް-19 އާ ދެކޮޅަށް ސަރުކާރުން ކުރާ މަސައްކަތުގައި އެންމެ އިސް ރޯލެއް ކުޅޭ އެއް ބަޔަކީ ނަރުހުން ކަމަށެވެ. ބަލި މީހުންނާ އެންމެ ގާތުގައި ތިބެ ނަރުހުން ވަމުން އަންނަ އެހީތެރިކަމަށް ރާއްޖޭގެ ހުރިހާ ރައްޔިތުންގެ ފަޚުރުވެރިވާން ޖެހޭ ކަމަށް މަބްރޫކް ވިދާޅުވި އެވެ.

ރާއްޖޭގެ ސިއްހީ ނިޒާމު އެންމެ އެކަށީގެންވާ ރަނގަޅު ގޮތުގައި ހިނގުމުގެ އެއް ސަބަބަކީ ނަރުހުން ކަން މަބްރޫކް ފާހަގަކުރެއްވި އެވެ. އަދި ބަލި މީހުންނަށް ފަރުވާދިނުމުގައި 24 ގަޑިއިރު ނަރުހުން ކުރާ މަސައްކަތަކީ މި ވަގުތު ގައުމަށް ވަރަށް ބޭނުންތެރި ހިދުމަތެއް ކަަމަށް ވެސް ވިދާޅުވި އެވެ.

"އެ ބޭފުޅުން (ނަރުހުންގެ) ހުނަރާއި އިލްމާއި އަޅާލުމާ ނުލައި ދިވެހިރާއްޖޭގެ ސިއްހީ ނިޒާމެއް ނުހިނގާނެ. އަދި ކޮވިޑް-19އާ އިދިކޮޅަށް އަޅުގަނޑުމެން މިކުރާ މަސައްކަތް ނުކުރެވޭނެ. އެހެންވީމަ އެ ކުރައްވަމުންގެންދާ ގައުމީ ހިދުމަތުގެ އަގުވަޒަންކުރަންޖެހޭ. މިތާގައި މި މަސައްކަތްކުރާ ޓީމާއި ދިވެހި ހުރިހާ ރައްޔިތުންގެ ނަމުގައި ހުރިހާ ނަރުހުންނަށް ނިމުމެއް ނެތް ޝުކުރު އަދާކުރަން ބޭނުން. އެ ބޭފުޅުންނަށްޓަކަައި ގައުުމު ފަހުރުވެރިވާކަން އެބަޖެހޭ ފާހަގަކުރަން،" މަބްރޫކް ވިދާޅުވި އެވެ.

ކޮވިޑް-19 އިން ރައްކާތެރިވުމުގެ ގޮތުން ސަރުކާރުން ކުރާ މަސައްކަތުގައި އެހީތެރިވުމަށް އެކި ގައުމުތަކުގައި ތިބި މެޑިކަލް ދާއިރާއިން ކިޔަވާ ކުދިން ވަނީ ރާއްޖެ ގެނެސްފަ އެވެ. އޭގެ ތެރޭގައި ގިނަ އަދަދެއްގެ ނަރުހުން ވެސް ހިމެނެ އެވެ. ރާއްޖެ އެނބުރި އައިސް ކަރަންޓީނުގެ 14 ދުވަހުގެ މުއްދަތެއް ފުރިހަމަކުރުމަށް ފަހު ގިނަ ދަރިވަރުން އަންނަނީ ފަރުވާގައި އެހީތެރިވެދެމުންނެވެ.

ނަރުހުންގެ ދުވަހުގެ މުނާސަބަތުގައި މޯލްޑިވްސް ނާސިން އެންޑް މިޑްވައިފްރީ ކައުންސިލްގެ ފަރާތުން ވަނީ ނަރުހުންނަށް ދިމާވާ ގޮންޖެހުންތައް ފާހަގަކޮށް، މިއަދު ކުރިމަތިމަތިވެފައިވާ ހާލަތުން އިބްރަތް ހާސިލްކޮށް، ސިއްހީ ދާއިރާއަށް އިތުރަށް ފަރުވާތެރިވުމަށް އެދިފަ އެވެ.