ރާއްޖޭގައި ނަމޫނާއަކަށް ވި ނޭޕާލްގެ ޒުވާނާ އިސްލާމް ވެއްޖެ

މީގެ ކުރިން އެތައް ބައެއްގެ ލޯބި އޭނާ ހޯދީ ރާއްޖޭގައި ކުރަމުން އައި މަސައްކަތުން ލިބުނު އާމްދަނީން ބައެއް، އޭނާގެ އަމިއްލަ ގައުމު ނޭޕާލްގެ ނިކަމެތި ކުދިންނަށް ހޭދަކުރަމުން އަންނާތީ އެވެ. އެފަދަ އުފާވެރި އެހެން ހަބަރެއް މިއަދު ދިވެހިންނަށް އޭނާ ދިނީ އިސްލާމް ވިކަން އިއުލާންކޮށްގެންނެވެ.

ކުޑައިރުންސުރެ ހިންދޫއެއްގެ ގޮތުގައި ހުރި ރަޖާނީ ޝްރެސްތާއަކީ މިހާރު އައިޝަތު ރިޒްގިން އެވެ.

އިސްލާމް ވާން ބޭނުންވެގެން މި އަހަރުގެ ކުރީކޮޅު ރާއްޖޭގެ އިސްލާމިކް މިނިސްޓްރީއަށް ދިއުމުން ފުރިހަމަ ކުރަން އެންގި ހުރިހާ ކަމެއް ފުރިހަމަކޮށް މިނިސްޓްރީގެ އިލްމުވެރިންނަށް ކިޔައިދިނެވެ. އަދި މިނިސްޓްރީން ވަނީ އޭނާ އިސްލާމްވި ކަމުގެ ލިޔުން ވެސް ހަވާލުކޮށްފަ އެވެ.

"އަހަންނަކީ މިހާރު މުސްލިމެއް. ފެބްރުއަރީ މަހުގެ ހަ ވަނަ ދުވަހު އަހަރެއް އިސްލާމް ވެއްޖައިން،" ނޭޕާލްގެ ވެރިރަށް، ކަތަމަންޑު އަށް އުފަން، އުމުރުން 26 އަހަރުގެ ރިޒްގިން ބުންޏެވެ.

ރޯދަ މަހުގެ ފުރަތަމަ ދުވަހާ ގުޅިގެން އޭނާ ފޭސްބުކްގައި ވަނީ މުސްލިމްވި ސަބަބު ކިޔައިދީފަ އެވެ. ރިޒްގިން ބުނިގޮތުގައި އިސްލާމް ދީނަށް ބަދަލުވުމަކީ އޭނާއަށް ފަސޭހަވި ކަމެއް ނޫން ކަމަށެވެ. އިސްލާމް ދީނުގެ ގިނަ ކަންކަން ނޭނގޭތީ ވަރަށް ގިނަ އެއްޗެހި ކިޔަން ޖެހުނު ކަމަށް ވެސް ބުންޏެވެ.

"އިސްލާމް ދީނުގެ މައްސަލައެއް ހޯދަން މަސައްކަތް ކުރާ ކޮންމެ ފަހަރަކު އަހަންނަން ފެންނަނީ ސުވާލެއް. އެއަށް ފަހު ޖަވާބު. އެކަންކަން އެއީ ތެދެއް ނޫން ކަމަށް ބުނެވޭނެ އެއްވެސް އެއްޗެއް ނުފެނޭ،" ލައިފް ސަޕޯޓް ކުންފުނީގެ ސުޕަވައިޒަރަކަށް މަސައްކަތް ކުރަމުން އަންނަ ރިޒްގިން ބުންޏެވެ.

"އަހަރެން އިސްލާމް ދީން ގަބޫލުކުރީ އަހަރެން އަމިއްލައަށް ބޭނުން ވެގެން."

ރިޒްގިން ބުނިގޮތުގައި އިސްލާމް ދީނަށް ވަނުމުގެ އެއްވެސް ޝައުގެއް ނެތި އޮކްޓޯބަރު 7، 2018 އިން ފެށިގެން އޭނާ ޤުރުއާން ކިވަމުން އަ އެވެ. އަޑުއަހަމުން، ޤުރުއާން ކިޔަވަމުން އައީ އަރާމް ކުރުމުގެ ބޭނުމުގައި ކަމަށް ވެސް ބުންނެވެ.

"އަހަންނަން ހަމަޖެހުން އިހުސާސް ކުރެވުނު. މަޑުމަޑުން އިސްލާމް ދީން އަހަންނަން މުހިންމުވާން ފެށި. އަހަރެން އިތުރަށް ދަސްކުރަން ފެށިން،" އިސްލާމަކަށް ވާން ކުރި ދަތުރާ ބެހޭ ގޮތުން އޭނާ ކިޔައިދިނެވެ.

ރިޒްގިން ބުނިގޮތުގައި އަބަދުވެސް ދީންތަކާއި ސަގާފަތްތަކުގެ ކަންކަން ދަސްކުރުމުގެ ޝައުގު އޭނާގެ ހުރެ އެވެ. ނަމަވެސް އޭރު ވެސް މުސްލިމަކަށް ވެދާނެއޭ ހިއެއްނުކުރެ އެވެ. އިސްލާމް ދީން ދެކެ ލޯބިވާން ފެށުނީ 2016 ގައި ރާއްޖެއަށް އައި ފަހުން ކަމަށް އޭނާ ބުންޏެވެ.

އިސްލާމް ދީނަށް ބަދަލުވުމަށް ފަހު އޭނާގެ ކުރީގެ ބައެއް އާދަތައް ވަނީ ދޫކޮށްލައިފަ އެވެ. އޭގެ ތެރޭގައި ރާ ބުއިން ހުއްޓާލުން އެކަންޏެއް ނޫނެވެ. މިހާރު އޭނާ ދުންފަތުގެ އިސްތިއުމާލެއް ވެސް ނުކުރެ އެވެ. އޭގެ ސަބަބުން ހިތްހަމަޖެހުން ލިބޭ ކަމަށް ވެސް ރިޒްގިން ބުންޏެވެ.

"ﷲ ފިޔަވާ އިތުރު ކަލަކު ނުވާ ކަމަށާއި ކީރިތި ރަސޫލާއަކީ އެންމެ ފަހުގެ ރަސޫލާކަމަށް ގަބޫލު ކުރުމަކީ އަހަރެން ދެރަވާނެ ކަމެއް ނޫން. އިސްލާމް ދީންގެ ރީތިކަން ފެނި އަހަންނަށް ލޯބި ވެވިއްޖެ،" ރިޒްގިން ބުންޏެވެ.

މިއީ އޭނާ އިސްލާމް ދީން ގަބޫލުކުރި ފަހުން އައި ފުރަތަމަ ރޯދަމަހެވެ. ފުރަތަމަކޮޅު ދިމާވާނެ ކުދިކުދި ދަތިތަކާ އެކު ވެސް އޭނާ ހުރީ އުފަލުންނެވެ.

ރިޒްގިން އުމުރުން ފަސް އަހަރުގައި އޭނާގެ މަންމަ، އަދި 11 އަހަރުގައި ބައްޕަ ވަނީ މަރުވެފަ އެވެ. އޭނާ ފަދަ ޅައިރު މައިންބަފައިން މަރުވެފައިވާ ކުދިންނަށް އެހީވާން ހާއްސަ ޖަމިއްޔާއެއް އޭނާ އުފެއްދި އެވެ. އެ ޖަމިއްޔާއިން އަންނަނީ ނޭޕާލުގައި ތިބި އެފަދަ ކުދިންގެ އަސާސީ ބޭނުންތައް ފުއްދައިދެމުންނެވެ.