ރިލްވާންގެ ތަހުގީގުގައި ކުރިއެރުން، ޔާމީން މައްސަލަ ހުއްޓިފައި!

ނޫސްވެރިޔާ އަހްމަދު ރިލްވާން ވަގަށް ނަގައި މަރާލި މައްސަލައިގައި އާ ހެކިތަކާ އެކު އިންސާފާ ގާތްވެވޭނެ ކަމުގެ ޔަގީންކަން ބޮޑުވެފައިވީ ނަމަވެސް ބްލޮގަރު ޔާމީން ރަޝީދުގެ މަރުގެ މައްސަލައިގެ ތަހުގީގު ހުއްޓިފައި އޮތުމުން ކަންބޮޑުވާ ކަމަށް މަރު ކޮމިޝަނުން މިއަދު ބުނެފި އެވެ.

ކޮމިޝަންގެ ނައިބު ރައީސް އަދި ގާނޫނީ ވަކީލް ފަރީޝާ އަބްދުﷲ "މިހާރު" އަށް ވިދާޅުވީ ފޮރެންސިކް ރިޕޯޓުން ހޯދިފައިވާ އާ ހެކިތަކާ އެކު ޕްރޮސިކިއުޓަ ޖެނެރަލް އޮފީހާ އެކު މަޝްވަރާކުރާނެ ކަމަށެވެ. ކޮމިޝަނުން ކުރިން ވިސްނާފައި އޮތީ މި މަހުގެ ނިޔަލަށް މި މައްސަލައިގައި ނިންމުންތަކަކާ ހަމައަށް ދެވޭތޯ ބަލަން ކަމަށާއި އެކަމުގައި ދިމާވި ހުރަހަކީ ކޮވިޑް-19 އާ ގުޅިގެން އިއުލާންކޮށްފައިވާ ކުއްލި ނުރައްކަލުގެ ހާލަތުގައި އިންޓަވިއުތައް ކުރިއަށް ނުގެންދެވުން ކަމަށް ވިދާޅުވި އެވެ.

"ކޮމިޝަނަށް މިހާރު ކުރެވިފައި ހުރި މަސައްކަތްތަކާއި ހޯދިފައިވާ ކަންކަމަށް ބަލައި، އިންސާފާ ގާތަށް ވެވޭނެ ކަމަށް އަޅުގަނޑުމެންނަށް ލަފާކުރެވޭ،" ފަރީޝާ ވިދާޅުވި އެވެ.

ރިލްވާނާއި ޔާމީން ރަޝީދުގެ އިތުރުން، ޑރ. އަފްރާޝީމް އަލީގެ މަރާ ގުޅިގެން ތިން މީހެއްގެ މައްޗަށް ދައުވާކުރަން މީގެކުރިން ކޮމިޝަނުން ޕީޖީ އޮފީހަށް ފޮނުވި އެވެ. މި ތިން މަރާ ގުޅިގެން ކޮމިޝަނުން ދައުވާކުރަން އެދުނީ މުހައްމަދު މަޒީދާއި ސާމިތު މުހައްމަދުގެ މައްޗަށެވެ. ހަރުކަށި ފިކުރުގެ ޖަމާއަތް ހިންގައި ހަރަކާތްތައް ފުޅާކޮށް ހިންގާ ކަމަށް ތުހުމަތުކުރާ އެ ދެ މީހުންނަކީ ތިން މަރުގެ ވެސް މޭސްތިރިން ކަމަށް މަރު ކޮމިޝަންގެ ރިޕޯޓެއްގައި ވަނީ ތުހުމަތުކޮށްފަ އެވެ.

އެކަމަކު ތަހުގީގު އިތުރަށް ފުރިހަމަކުރަން، ޕީޖީން ވަނީ މި މައްސަލަތައް އަނބުރާ ފޮނުވާލައިފަ އެވެ.

ފަރީޝާ ވިދާޅުވީ ޕީޖީން އެދުނު ގޮތަށް ތަހުގީގުތައް ފުރިހަމަކުރަމުން އަންނަ ކަމަށެވެ.

އޭނާ ވިދާޅުވި ގޮތުގައި ޔާމީންގެ މަރުގެ މައްސަލައިގެ ތަހުގީގު ކޮމިޝަނަށް މިވަގުތަކު ކުރިއަކަށް ނުގެންދެވެ އެވެ. އެއީ، މައްސަލައިގެ ޝަރީއަތް ހިނގާތީ ކަމަށާއި ލަސްވުމަކީ ކޮމިޝަންގެ ވެސް ކަންބޮޑުވުމެއް ކަމަށް ވިދާޅުވި އެވެ.

ބޮޑު، ތިން މަރުގެ މައްސަލައިގައި އިންސާފު ލިބުނު ލަސްވެފައިވާތީ، އާއިލާތަކުގެ ކަންބޮޑުވުން އޮތް ކަމަށް ކޮމިޝަނުން ގަބޫލުކުރެ އެވެ. އެ ކަންބޮޑުވުންތަކާ އެކު މަސައްކަތް ކުރަނީ، އަވަހަށް މައްސަލަތައް ނިންމަން ކަމަށް ވިދާޅުވި އެވެ. އިތުރު މައްސަލަތައް ވެސް ކޮމިޝަނުން ބަލަމުން އަންނަ ކަމަށާއި ކޮމިޝަންގެ ހުރިހާ މެމްބަރުން އެކުގައި އެ މައްސަލަތަކާ މެދު މަޝްވަރާކޮށް ގޮތްތަކެއް ނިންމަމުން އަންނަ ކަމަށް ފަރީޝާ ވިދާޅުވި އެވެ.

އަފްރާޝީމްގެ މަރާ ގުޅޭ ގޮތުން ކޮމިޝަނުގެ ތަހުގީގު ރިޕޯޓް ރައީސް އޮފީހުން ވަނީ އާއްމުކޮށްފަ އެވެ. އެ ރިޕޯޓުގައި، ރާއްޖޭގައި ހަރުކަށި ފިކުރުގެ ޖަމާއަތްތައް ބެހިފައިވާ ގޮތާއި ނުރައްކާތެރި މިންވަރާއި ހަރަކާތްތައް ހިންގާ ގޮތް ތަފްސީލްކޮށްދީފައިވެ އެވެ.

މަރު ކޮމިޝަނަށް ހުށަހަޅާ މައްސަލަތައް ތަހުގީގުކޮށް ނިންމުމަށް ކަނޑައަޅާފައި ވަނީ ދެ އަހަރުގެ މުއްދަތެކެވެ. އެ ކޮމިޝަން އުފެއްދިތާ ކުރީކޮޅު އާއްމުކުރި ގޮތުގައި، ތަހުގީގުކުރަން ޖެހޭ މައްސަލަތަކުގެ އަދަދު އޭރު އުޅެނީ 29 ގަ އެވެ.