ކޮވިޑް-19 ފެތުރޭތީ އެމްޑީޕީން ވެސް އަމަލީ ކެމްޕޭން ހުއްޓާލައިފި

އެމްޑީޕީން ލޯކަލް ކައުންސިލް އިންތިހާބަށް ކުރަމުން އައި އަމަލީ ކެމްޕޭން ހުއްޓާލައި، ކެމްޕޭންގެ މަސައްކަތް ހަމަ އެކަނި ސޯޝަލް މީޑިއާގައި ކުރާ ގޮތަށް އެންމެ ފަހުން ނިންމައިިފި އެވެ.

އެމްޑީޕީގެ ކެމްޕޭން މިގޮތަށް ބަދަލުކޮށްފައިވާކަން އެ ޕާޓީގެ ޗެއާޕާސަން އަދި ރައްްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފް "މިހާރު" އަށް ކަށަވަރު ކޮށްދެއްވީ، ރާއްޖޭގައި މަސައްކަތް ކުރާ ބިދޭސީ ދެ މީހަކު ކޮވިޑް-19 އަށް ޕޮޒިޓިވް ވިކަން ސަރުކާރުން މިރޭ ހާމަކުރުމުގެ ކުރިންނެވެ.

ހަސަން ވިދާޅުވީ އަމަލީ ކެމްޕޭން ހުއްޓައިލުމަަށް ފަހު، އެމްޑީޕީން ދެން ކެމްޕޭން ކުރާނީ ޓްވިޓާ، ފޭސްބުކް، ސްކައިޕް، ވަޓްސްއެޕް އަދި ވައިބާ ފަދަ ސޯޝަލް މީޑިއާ ޕްލެޓްފޯމްތަކުގައި ކަމަށެވެ.

އެ ޕާޓީން މިހާރު ވަނީ ރަސްމީކޮށް އެކަން އިއުލާނުކޮށްފަ އެވެ.

އެމްޑީޕީން މިހެން ނިންމި އިރު، އެ ޕާޓީގެ އަންހެނުންގެ ރޫހުން ގެންދިޔައީ ވިލިމާލޭގައި ކެމްޕޭންގެ ބޮޑު ހަރަަކާތެއް ހިންގަމުންނެވެ. ގިނަ ބަޔަކާ އެކު، ކުރިއަށް ގެންދިޔަ އެ ހަރަކާތުގައި ރައީސް އިބްރާހިމް މުހައްމަދު ސޯލިހާއި ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވެސް އަމަލީ ގޮތުން ބައިވެރިވެވަޑައިގަތެވެ.

ކޮވިޑް-19 އަށް ރާއްްޖޭން ދެ މީހަކު ޕޮޒިޓިވް ވިކަން ހެލްތު މިނިސްޓަރު އަބްދުﷲ އަމީން ހާމަކުރެއްވީ މިރޭ ދަރުބާރުގޭގައި ބޭއްވި ނިއުސް ކޮންފަރެންސެއްގަ އެވެ. އަމީން ވިދާޅުވީ އެ ރޯގާއަށް ޕޮޒިޓިވް ވި ދެމީހުންނަކީ ކުރެއްދޫ އައިލެންޑް ރިސޯޓްގައި މަސައްކަތްކުރަމުން އަންނަ ބިދޭސީ ދެމީހުން ކަމަށެވެ.

އެ ދެމީހުން ބައްޔަށް ޕޮޒިޓިވް ވުމުން އެމީހުންނާ ބައްދަލުވި މީހުން ދެނެގަނެ، ރައްކާތެރިކަމުގެ ގޮތުން އަޅަން ޖެހޭ ފިޔަވަޅުތައް އަޅަމުން އަންނަ ކަމަށް ވެސް އޭނާ ވިދާޅުވި އެވެ.

ކޮވިޑް-19 އާ ހެދި އިދިކޮޅުން ވެސް ވަނީ އަތޮޅުތަކުގައި ކުރަމުން އައި ކެމްޕޭން ހުއްޓައިލާފަ އެވެ. އަދި ސަރުކާރު ހިންގާ ކޯލިޝަންގައި ހިމެނޭ ޖުމްހޫރީ ޕާޓީން ވެސް ވަނީ ކެމްޕޭން ހުއްޓައިލާފަ އެވެ.

ރާއްޖޭން ބައްޔަށް މީހަކު ޕޮޒިޓިވް ވުމުގެ މާކުރިން ފެށިގެން ވެސް ސިއްހީ މާހިރުން އައީ ކެމްޕޭން ހުއްޓާލައި، އިންތިހާބު ލަސްކުރަން ގޮވައިލަމުންނެވެ. އެކަމަކު، އެކަމަށް ސަރުކާރާއި އިލެކްޝަންސް ކޮމިޝަނުން ވެސް އިޖާބައެއް ނުދިނެވެ. އަދި އެންމެ ފަހުން، ރާއްޖެ އިން ދެ މީހަކު ކޮވިޑް-19 އަށް ޕޮޒިޓިވް ވުމުން ވެސް އިންތިޚާބު ފަސްކުރާކަށް އަދިވެސް ނުނިންމަ އެވެ.