އާޓިސްޓުންނަށް ފަހި ފުރުސަތެއް، ކުރެހުންތައް މަޖިލީހުގައި!

ރާއްޖޭގެ އާޓިސްޓުންގެ ތެރޭގައި ހިމެނޭ ކުރެހުންތެރިންގެ ހުނަރުތައް ރައްޔިތުންގެ މަޖިލީހުގައި ދައްކައިލުމުގެ ފުރުސަތު މަޖިލީހުން ފުރަތަމަ ފަހަރަށް ދީފި އެވެ.

މޯލްޑިވްސް އާޓިސްޓްސް ކޮމިއުނިޓީން ބުނީ މަޖިލީހުގެ މާލަންތަކުގައި މިހާރު ދައްކައިލަމުން އަންނަ ކުރެހުންތަކަކީ މަޖިލީހާ ގުޅިއަށް ގެންދަން ހަމަަޖެހިފައިވާ ސިލްސިލާއެއްގެ ފުރަތަމަ ބައި ކަަމަށެވެ. ރައްޔިތުންގެ މަޖިލީހުގެ މާލަންތައް އާޓިސްޓުންގެ މަސަައްކަތްތައް ދައްކައިލަން ދޫކުރުމަކީ މީގެ ކުރިން ރާއްޖޭގައި ކޮށްފައިވާ ކަމެއް ނޫނެވެ.

"މިއީ ސުލްހަ އަށް ޓަކައި އާޓް ބަލައިގަތުމަށް ރައްޔިތުންގެ މަޖިލީހުގެ މެމްބަރުންނަށް ރަނގަޅު މާހައުލެއް އުފެދޭނެ ކަމަކަށް ވާނެ ކަަމަށް އުއްމީދުކުރަން،" މަޖިލީހުގައި ބެހެއްޓި ކުރެހުންތަކުގެ ފޮޓޯތައް ސޯޝަލް މީޑިއާގައި ހިއްސާކުރަމުން އާޓިސްޓްސް ކޮމިއުނިޓީން ބުންޏެވެ.

ރައްޔިތުންގެ މަޖިލީހުގެ މީޑިއާ ޑިރެކްޓަރު ހަސަން ޒިޔާއު ވިދާޅުވީ ކުރެހުންތައް ދައްކައިލަން މަޖިލީހުގައި ބެހެއްޓުމަކީ މަޖިލީހުގެ ރައީސް މުހައްމަދު ނަޝީދުގެ އިސްނެންގެވުމަކަށް ދެއްވި ފުރުސަތެއް ކަަމަށެވެ.

އާޓިސްޓުންގެ ކުރެހުންތައް ބަހައްޓާފައި ހުރީ ރައްޔިތުންގެ މަޖިލީހުގެ އާ އިމާރާތުގައިވާ މެމްބަރުންގެ ލައުންޖްގަ އެވެ. އެތަަނުގައި ޖުމްލަ 22 ކުރެހުމެއް ބަހައްޓާފައި އެބަހުއްޓެވެ.

"އެ މާލަމުގެ ހަތަރު ފާރުގައި ވެސް ކުރެހުންތައް އެބަހުރި. އަދި އޭގެ އިތުރުން ސްޓޭންޑްތަކެއްގައި ބަހައްޓާފައިވާ ކުރެހުންތަކާ އެކު ޖުމްލަ 22 ކުރެހުން އެބަހުރި،" ޒިޔާއު ވިދާޅުވި އެވެ.

އޭނާ ވިދާޅުވީ ކުރެހުންތައް ފުރަތަމަ ދައްކައިލީ މަޖިލިސް މި އަހަރަށް ހުޅުވުމަށް އިއްޔެ ބޭއްވި ޖަލްސާއާ ދިމާކޮށެވެ. މިފަހަރު ބެހެއްޓި ކުރެހުންތައް ބަހައްޓާނީ އެއް މަސްދުވަހަށް ކަަމަށާއި އެ މުއްދަތުގެ ތެރޭގައި މެމްބަރަކު ކުރެހުމެއް ބައްލަވައިގަންނަން އެދި ވަޑައިގަންނަވާ ނަމަ އާޓިސްޓުންނާ ގުޅުއްވައިގެން ބައްލަވައި ވެސް ގަނެވޭނެ ކަަމަށް އޭނާ ވިދާޅުވި އެވެ.

"އާޓިސްޓުންނަށް ފުރުސަތު އޮންނާނެ އެ ގޮތުން ކުރެހުންތައް އަލުން ރިޕްލޭސް ކުރަން ވެސް."

މަޖިލީހުގެ މެމްބާސް ލައުންޖްގައި ބަހައްޓާފައިވާ ކުރެހުންތަކުގެ ތެރޭގައި ރާއްޖޭގެ ކަނޑުގެ އަޑީގެ ރީތި މަންޒަރުތަކާއި ގައުމިއްޔަތު ދައްކައިދޭ މަންޒަރުތައް ހިމެނެ އެވެ. ރައްޔިތުންގެ މަޖިލީހުގެ މިހާރުގެ ބައެއް މެމްބަރުންނާ ގުޅޭ ކުރެހުންތައް ވެސް އޭގެ ތެރޭގައި ހިމެނެ އެވެ.

ފާހަގަ ކޮށްލެވޭ އެއް ކުރެހުމަކީ މަޖިލީހުގެ ރައީސް މުހައްމަދު ނަޝީދު ރާއްޖޭގެ ރައީސް ކަމުގައި ހުންނެވި އިރު، ކަނޑު އަޑީގައި ބޭއްވި ކެބިނެޓްގައި އެމަނިކުފާނު ލިއުމެއްގައި ސޮއިކުރާ މަންޒަރު ދައްކައިދޭ ކުރެހުމެކެވެ. ނައިބު ރައީސް އީވާ އަބްދުﷲގެ ތަސްވީރެއް ވެސް ބަހައްޓާފައި އެބަހުއްޓެވެ.