އެސްޓީއޯގެ ސާފު ފައިދާ 95 މިލިއަނަށް

އެސްޓީއޯގެ ތިން ވަނަ ކުއާޓާގެ ސާފު ފައިދާ 95 މިލިއަން ރުފިޔާ އަށް އަރައިފި އެވެ.

މިއީ ދެވަނަ ކުއާޓާގެ ސާފު ފައިދާއާ އަޅާ ބަލާއިރު 25 ޕަސެންޓުގެ އިތުރުވުމެކެވެ. މި އަހަރުގެ ދެވަނަ ކުއާޓާގައި އެ ކުންފުންޏަށް ސާފު ފައިދާގެ ގޮތުގައި ލިބިފައިވަނީ 77 މިލިއަން ރުފިޔާ އެވެ.

އެސްޓީއޯއިން އިއްޔެ ނެރުނު ކުއާޓާލީ ރިޕޯޓުގައި ބުނެފައިވާގޮތުގައި އެ ކުންފުނީގެ ސާފު ފައިދާ ތިން ވަނަ ކުއާޓާގައި އިތުރު ވެފައި ވަނީ ހަރަދުތައް ކުޑަ ކުރުމުގެ ސަބަބުންނެވެ.

މި ކުއާޓާގައި އެ ކުންފުންޏަށް ލިބުނު އާމްދަނީ 2.2 ބިލިއަން ރުފިޔާ އަށް އަރާއިރު މިއީ ދެވަނަ ކުއާޓާގައި ލިބުނު އާމްދަނީ އަށް ވުރެ 131 މިލިއަން ރުފިޔާ ދަށް އަދަދެކެވެ. އާމްދަނީ ދަށްވެފައި ވަނީ ތެލުގެ އަގަށް އައި ބަދަލުގެ ސަބަބުން ކަމަށް އެސްޓީއޯއިން ވަނީ ބުނެފަ އެވެ. ނަމަވެސް އެ ކުންފުނީގެ އެހެނިހެން ވިޔަފާރިތަކުން ލިބުނު އާމްދަނީ އިތުރުވި ކަމަށް އެސްޓީއޯއިން ބުންޏެވެ.

ތިންވަނަ ކުއާޓާގައި އެސްޓީއޯގެ ފައިދާ އިތުރުވެފައިވާއިރު މި އަހަރުގެ ތިން ކުއާޓާގެ ފައިދާ އެއްކޮށްލުމުން މިދިޔަ އަހަރު އެ ކުންފުންޏަށް ލިބުނު ޖުމްލަ ފައިދާ އަށް ވުރެ 30 ޕަސެންޓް އިތުރުވާ ކަމަށް ވެސް އެ ކުންފުނިން ބުނެ އެވެ.

އެސްޓީއޯއިން ބުނީ މި ކުއާޓާގެ ފައިދާ އެ ކުންފުނިން އިތުރުވެފައި ވަނީ މަސްވެރިންނަށް ދިމާވެފައިވާ މައްސަލަތައް ހައްލުކުރުމަށް މިފްކޯ އަށް 150 މިލިއަނަށް ވުރެ ގިނަ ރުފިޔާ ދިނުމަށް ފަހު ކަމަށެވެ.