ތެޔޮ ހުސްވެގެން ވެއްޓުނު ބޯޓުން ފަސް މީހުން މަރުވެއްޖެ

ކިއޭވް (އޮކްޓޯބަރު 4) - ޔޫކްރޭނުގެ ހުޅަނގުން އޮންނަ ލިވިވް އެއާޕޯޓަށް ޖައްސަން ދިޔަ ކާގޯ މަތިން ބޯޓެއް އެއާޕޯޓާ ހަމައަށް ފޯރުމުގެ ކުރިން ތެޔޮ ހުސްވެގެން މިއަދު ވެއްޓި ފަސް މީހުން މަރުވެއްޖެ އެވެ.

ޔުކްރޭން އެއާ އެލަޔަންސްގެ އެންޓަނޯފް-12 ގެ ބޯޓު ދަތުރު ކުރީ ސްޕޭނުގެ ވީގޯ އިން ތުރުކީގެ އިސްތަންބޫލަށެވެ. ޔުކްރޭނުގެ އެއާޕޯޓުގައި އެ ބޯޓު ޖައްސަން ދިޔައީ ތެޔޮ އެޅުމަށެވެ.

ޔުކްރޭނުގެ އިމަޖެންސީ މިނިސްޓްރީން ބުނީ ވެއްޓުނު ބޯޓުގައި ހަތް ފަޅުވެރިން ތިބި ކަމަށެވެ. ބޯޓުގައި ހުރީ ކޮން ބާވަތެއްގެ ކާގޯއެއް ކަމެއް ނޭނގެ އެވެ.

ސޯވިއެޓް-ޑިޒައިންގެ ހަތަރު އިންޖީނުލީ ބޯޓު ރާޑަރުން ގެއްލުނީ ލިވިވް އެއާޕޯޓާ 1.5 ކިލޯ މީޓަރު (އެއް މޭލު) އަށް ކައިރިވެފައި ވަނިކޮށެވެ. ބޯޓު ވެއްޓުނީ ފުޓުބޯޅަ ސްޓޭޑިއަމެއްގެ ކައިރީގައިވާ ދަނޑަކަށެވެ. ބޯޓުގައި އަލިފާން ރޯވެފައެއް ނުވެ އެވެ.