ރާއްޖޭގައި ބާއްވާ އެންމެ ބޮޑު ޓޫރިޒަމް ޖޮބް ފެއާ ފަށައިފި

ރާއްޖޭގައި މިހާތަނަށް ބާއްވާ އެންމެ ބޮޑު ޓޫރިޒަމް ޖޮބް ފެއާ މިރޭ ފަށައިފި އެވެ.

ޓޫރިޒަމް ދާއިރާގެ 67 ރިސޯޓް ބައިވެރިކޮށްގެން، ޓޫރިޒަމް މިނިސްޓްރީން އިންތިޒާމްކުރާ މި ޖޮބް ފެއާ ފައްޓަވައިދެއްވީ އިކޮނޮމިކް މިނިސްޓަރު ފައްޔާޒު އިސްމާއިލް އެވެ. މި ފެއާގައި ދިވެހިންނަށް ހާއްސަކޮށްގެން 500 އަށްވުރެ ގިން ވަޒީފާ ވަނީ ހުޅުވާލައިފަ އެވެ.

މިރޭ ފެށި މި ފެއާ ކުރިއަށްގެންދިއުމަށް ހަމަޖެހިފައި ވަނީ ފަރުކޮޅުފުށީގަ އެވެ. މި ފެއާގައި ބައިވެރިވާން ބޭނުންވާ މީހުންނަށް މާލޭގެ 2 ނަންބަރު ޖެޓީން ކޮންމެ 30 މިނެޓަކުން ޓްރާންސްފާ ހަމަޖެހިފައިވާނެ ކަމަށް ޓޫރިޒަމް މިނިސްޓްރީން ވަނީ ބުނެފަ އެވެ.

ޓޫރިޒަމް މިނިސްޓަރު އަލީ ވަހީދު ވިދާޅުވީ މި އަހަރު ފަށާ މި ފެއާގައި ދިވެހިންނަށް ހާއްސަ ވަޒީފާތައް ހުޅުވާލާފައިވާއިރު ވީހާވެސް ގިނަ ޒުވާނުން ފެއާގައި ބައިވެރިވުމަށް އެދޭ ކަމަށެވެ. އަދި މި ފެއާ މީގެ ފަހުން ކޮންމެ އަހަރަކު ވެސް ކުރިއަށްގެންދާނެ ކަމަށް މިނިސްޓަރު ވިދާޅުވި އެވެ.

މިއީ ޓޫރިޒަމް ދާއިރާގައި ދިވެހިންގެ ރޯލު އިތުރުކުރުމަށް ޓޫރިޒަމް ދުވަހާއި ގުޅިގެން ސަރުކާރުން ފެށި ފެއާއެކެވެ. މި ފެއާ ކުރިއަށްގެންދިއުމަށް ހަމަޖެހިފައިވަނީ ތިން ދުވަހުގެ މުއްދަތަށެވެ.

ޓޫރިޒަމް ޖޮބް ފެއާ ބޭއްވުމަށް މިރޭ ބޭއްވި ހަފްލާގައި އިކޮނޮމިކް މިނިސްޓަރާއި ޓުރިޒަމް މިނިސްޓަރުގެ އިތުރުން އާޓްސް، ކަލްޗާ އަދި ހެރިޓޭޖް މިނިސްޓަރު ޔުމްނާ މައުމޫން އާއި ރައްޔިތުންގެ މަޖިލީހުގެ ބައެއް މެމްބަރުން ވަނީ ބައިވެރިވެވަޑައިގެންފަ އެވެ.