ފިނޭންސް މިނިސްޓްރީގެ ނައިބަކަށް ބޭފުޅަކު އައްޔަންކުރައްވައިފި

ރައީސް އިބްރާހިމް މުހައްމަދު ސޯލިހް، ފިނޭންސް މިނިސްޓްރީގެ ނައިބަކަށް ބޭފުޅަކު އައްޔަންކުރައްވައިފި އެވެ.

ރައީސް އޮފީހުން މިއަދު ބުނީ ފިނޭންސް މިނިސްޓްރީގެ ނައިބަކަށް ހަމަޖެއްސީ މާފަންނު ސެވެންސްޓާ، އަހުމަދު އިމާން މޫސާ ކަމަށެވެ. އިމާން ވަނީ އޮސްޓްރޭލިޔާގެ ޔުނިވަސިޓީ އޮފް ކުއީންސްލޭންޑުން އިންޓަނޭޝަނަލް އިކޮނޮމިކްސް އެންޑް ފައިނޭންސްގެ ދާއިރާއިން މާސްޓާސް ޑިގްރީ ހާސިލް ކުރައްވައިފަ އެވެ.

އިމާން އެންމެ ފަހުން އަދާކުރެއްވީ ސްކަލް ފިޝިންގެ މެނޭޖިން ޑިރެކްޓަރުގެ މަގާމެވެ. އޭނާ ވަނީ ދިރާގާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ އިސް މަގާމުތަކެއް ފުރުއްވައިފަ އެވެ.

ޑެޕިއުޓީ މިނިސްޓަރަކަށް މުސާރަ އާއި އެލަވަންސްގެ ގޮތުގައި ކޮންމެ މަހަކު ލިބިވަޑައިގަންނަވާނީ 30،500ރ. އެވެ. އެއީ 18،000ރ. ގެ މުސާރަ އާއި 12،500ރ. ގެ އެލަވަންސެކެވެ.

މި ބޭފުޅުންނާ އެކު ރައީސް އޮފީހުގައި ތިއްބެވި ޑެޕިއުޓީ މިނިސްޓަރުން ފެންވަރުގެ ބޭފުޅުން ހިމެނޭ ގޮތުން މި ސަރުކާރުގެ ޑެޕިއުޓީ މިނިސްޓަރުގެ އަދަދު މިހާރު 50 އަށް ވުރެ މައްޗެވެ.