ބާ ކައުންސިލްގެ އިންތިޚާބު ބާއްވާނެ ދުވަހެއް އަންނަ ހަފުތާގައި އިއުލާން ކުރާނެ: އީސީ

ރައީސް އިބްރާހިމް މުހައްމަދު ސޯލިހު، މިދިޔަ ބުރާސްފަތި ދުވަހު ތަސްދީގު ކުރެއްވި ގާނޫނީ ފަންނުގެ ބިލުގެ ދަށުން އުފައްދަންޖެހޭ ބާ ކައުންސިލްގެ އިންތިޚާބު އޮންނާނެ ދުވަހެއް އަންނަ ހަފުތާގައި އިއުލާން ކުރާނެ ކަމަށް އިލެކްޝަންސް ކޮމިޝަން (އީސީ) ން މިއަދު ބުނެފި އެވެ.

އެ ކޮމިޝަންގެ މެމްބަރު އަހުމަދު އަކްރަމް ވިދާޅުވީ، ގާނޫނީ ފަންނުގެ ބިލް ތަސްދީގު ކުރުމާ އެކު، އެކަމާ ގުޅިގެން ބާއްވަންޖެހޭ އިންތިޚާބުގެ މަސައްކަތް ފަށާފައިވާ ކަމަށެވެ. އެގޮތުން، އިންތިޚާބާ ގުޅޭ އުސޫލުތައް ކަނޑައެޅުމާއި ކަމާ ބެހޭ އިދާރާތަކާ އެކު މަޝްވަރާ ކުރުން ކުރިއަށް ދާ ކަމަށް އޭނާ ވިދާޅުވި އެވެ.

ގާނޫނީ ފަންނުގެ ބިލް ގާނޫނަކަށް ވުމާ އެކު، ވަކީލުން ރެގިއުލޭޓް ކުރުމާއި އެ މީހުންނަށް ހުއްދަ ދިނުމުގެ ކަންކަން ދެން ކުރާނީ ބާ ކައުންސިލުންނެވެ.

އެ ގާނޫނުގެ ދަށުން ފުރަތަމަ އިންތިޚާބުކުރާ ބާ ކައުންސިލްގެ މެމްބަރުން ހޮވުމަށް، ބިލް ތަސްދީގުކުރި ދުވަހުން ފެށިގެން 21 ދުވަހުގެ ތެރޭގައި އިންތިޚާބެއް ބާއްވަން ޖެހޭނެ އެވެ. ބާ ކައުންސިލްގައި ތިއްބަވާނީ ކައުންސިލްގެ ރައީސާއި ނައިބު ރައީސާއި ބަންޑާރަ ނައިބު އަދި އިތުރު ހަ ވަކީލެކެވެ. ބަންޑާރަ ނައިބު ފިޔަވައި އެހެން ހުރިހާ މަގާމުތަކަށް ވެސް ބޭފުޅުން އިންތިޚާބު ކުރާނީ ވަކީލުންގެ މެދުގައި ނަގާ ވޯޓަކުންނެވެ.