ވަރަށް އުމުރުދިގު މީހުން އުޅޭ ރަށެއް: ސިއްރަކީ ކޮބާ؟

ސައިންސްވެރިންނަށް އިޓަލީގެ މި ކުޑަކުޑަ އަވަށަށް އެހާ ބޮޑު ޝައުގުވެރިކަމެއް ދެވުމުގެ ސިއްރަކީ އެ އަވަށު މީހުންގެ އުމުރު ދިގު ވުމެވެ. އުމުރުން 100 އަހަރަށް ވުރެ ގިނަ ދުވަސްވީ ވަރަށް ގިނަ ބަޔަކު އެ އަވަށުގައި އުޅެ އެވެ.

އާޗިއަރޮލީ ކިޔާ މި އަވަށުގައި އުޅޭ އުމުރުން ދުވަސްވީ މީހުންގެ ދިރާސާތައް ކުރުމަށްޓަކައި ހައެއްކަ މަސް ވަންދެން ސައިންވެރިން އެތަނުގައި ތިބެގެން މަސައްކަތް ކޮށްފައިވެ އެވެ. މި ދިރާސާގައި އާޗިއަރޮލީ އާއި އެ އަވަށާ ގުޅިފައިވާ ކުދިކުދި ކޮމިއުނިޓީ ތަކުގެ މީހުންގެ އުމުރު އާދަޔާޚިލާފަށް ދިގުވާން ދިމާވާ ސަބަބުތައް ދެނެގަންނަން މަސައްކަތް ކުރި އެވެ.

ސައިންސްވެރިންނަށް މި ރަށުން ފާހަގަކުރެވުނު ވަރަށް މުހިއްމު ކަންތައްތަކެއް އެބަހުއްޓެވެ. ހަނދާން ނެތޭ ބަލީގެ މީހުން އެއްގޮތަކަށް ނެތޭ ބުންޏަސް ރަނގަޅުވާނެ އެވެ. ހިތުގެ ބަލިތަކާއި ދުނިޔޭގެ ހުޅަނގުގެ ގައުމުތަކުގެ މީހުންނަށް އުމުރުން ދުވަސް ވުމުން އާއްމުކޮށް ޖެހޭ ބޮޑެތި ބަލިތައް ވެސް މިރަށުގެ މީހުންގެ ވަރަށް މަދެވެ.

ރޯމްގެ ސަޕެންޒާ ޔުނިވަސިޓީ އާއި ސެން ޑިއޭގޯ ސްކޫލް އޮފް މެޑިސިންގެ ސައިންސްވެރިން މި އަވަށުގައި ކުރި ތަޖުރިބާތައް މިދިޔަ އާދިއްތަ ދުވަހު ވަނީ އެ އަވަށުގައި އޮތް ކޮންފަރެންސެއްގައި ހާމަކޮށްފަ އެވެ. އާޗިއަރޮލީ އަކީ އިޓަލީގެ ޗިލެންޓޯގެ އައްސޭރިފަށުގެ ބައެކެވެ. އިންޑަސްޓްރިއަލް މަސައްކަތުން މުޅިން ހުސްވެފައިވާ ހިސާބެކެވެ. ގުދުރަތީ ރީތިކަމުގެ ސަބަބުން ނެޝަނަލް ޕާކެއްގެ ހިމާޔަތްކުރެވިފައިވާ މަގާމު ލިބިފައިވާ ރަށެކެވެ.

ޒައިތޫނި ތެލާއި ތަރުކާރި އާއި މޭވާ އަދި މަހުން މުއްސަނދިވެފައިވާ މެޑިޓެރޭނިއަން ކެއުމަކީ ސިއްހަތަށް ގިނަގުނަ ފައިދާތަކެއް ލިއްބައިދޭ ކެއުމެއްކަން މިހާރު އާޗިއަރޮލީގެ މީހުންގެ ހާލަތުން ޔަގީންވެ އެވެ.

އެ އަވަށުގެ އާބާދީ އަށް ބަލާއިރު ކޮންމެ 10 މީހަކުން އެކަކީ އުމުރުން 81 އަހަރަށް ވުރެ މަތިވެފައިވާ މީހެކެވެ. އަދި މި އަވަށުގެ އާބާދީގެ 700 އަށް ވުރެ ގިނަ މީހުންނަކީ 100 އަހަރު ފަހަނަޅާ ގޮސްފައިވާ މީހުންނެވެ. މި މީހުންގެ ތެރެއިން އެކަކީ އެންޓޯނިއޯ ވަސާލޯ، 100، އެވެ. އޭނާ ބުނި ގޮތުގައި އެމީހުން ކަނީ ސިއްހަތަށް ފައިދާހުރި ކާނާ އެކަންޏެވެ.

އާޗިއަރޮލީގައި އުޅޭ މީހެއް ކަމަށްވާ އެންޓޯނިއޯ އާއި އޭނާގެ އަންހެނުން އާމިނާ ފެޑޮއްލޯ އަށް ވެސް މިހާރު 93 އަހަރެވެ. ނަމަވެސް ޒުވާނަކާ އެއްވަރަށް ހަކަތަ އެބަހުއްޓެވެ.

އޭނާ ބުނި ގޮތުގައި އެމީހުން ވަރަށް ގިނައިން މަހުގެ ބާވަތްތައް ކައެވެ. ދެން ކަނީ ރަށްބޭރުގައި އެމީހުން އަމިއްލައަށް ގެންގުޅެ ބޮޑުކުރާ މުސަޅާއި ކުކުޅު ފަދަ އެއްޗިއްސެވެ. ހަމައެކަނި އެމީހުންގެ އަމިއްލަ އުފެއްދުންތަކެވެ. އަދި ޒައިތޫނި ތެޔޮވެސް އެމީހުން ކަނީ އަމިއްލައަށް އުފައްދައިގެންނެވެ.

ދިރާސާގައި އިސްކޮށް ހުރި ސެން ޑިއޭގޯގެ ހިތުގެ ޑޮކްޓަރެއް ކަމަށްވާ އެލަން އެސް.މައިސަލް އޮޅުންފިލުވައިދެއްވި ގޮތުގައި އާޗިއަރޮލީ މީހުންގެ އުފާވެރި މިޒާޖާއި އެމީހުންގެ ދިގު އުމުރަކީ ވަރަށް ގިނަ ކަންތައްތައް އެކުވެގެން ނިކުމެފައިވާ ނަތީޖާއެކެވެ. އޭނާ ފާހަގަ ކުރެއްވި ގޮތުގައި މި އަވަށުގެ މީހުންނަކީ ފަތްޕިލާވެލީގެ ބާވަތެއްކަމަށްވާ ރޯޒްމޭރީ ފަތް ވަރަށް ގިނައިން ކެއުމުގައި ބޭނުންކުރާ ބައެކެވެ. އަދި ވަރަށް ހަރަކާތްތެރި ދިރިއުޅުމެއް އުޅޭ ބައެކެވެ. އެ އަވަށަކީ ފަރުބަދައެއްގެ މަތީގައި އޮންނަ އަވަށަކަށް ވާއިރު މަގުތައް އެހާމެ ހަންޏެވެ. އެހެންވެ ހަނި އަދި އުސްކޮށް ކަތިވެފައި ހުންނަ މަގުތަކުން އަބަދާ އަބަދު ހިނގުމަކީ މި ރަށު މީހުން އާދަކޮށް ކުރަމުންދާ ކަމެކެވެ. ކޮންމެ މީހަކުވެސް ދުވާލަކު ކޮންމެވެސް މިންވަރަކަށް މި މަގުތަކުން ހިނގާ އުޅެ އެވެ.

މި ރަށުގެ މީހުންގެ ސިއްހަތު ރަނގަޅުވެފައި ގިނަ ދުވަހު ދުނިޔޭގައި ތިބުމުގައި އެމީހުންގެ ހަށިގަނޑުގައިވާ ޖީންއެއްގެ އެއްވެސް ދައުރެއް ވޭ ހެއްޔެވެ؟

ޑޮކްޓަރު ވިދާޅުވީ އެ އަަވަށުގެ މީހުން ރޯޒްމޭރީ ހެއްދުމަކީ އާންމު ކަމެއް ކަމަށާއި ފަހަރެއްގައި މިއީ ވެސް އެމީހުންގެ ސިއްހަތަށް ރަނގަޅު އެހިތެރިކަމެއް ފޯރުކޮށްދޭ އެއްޗަކަށް ވެދާނެ އެވެ. ރޯޒްމޭރީ އަކީ ސިކުނޑީގެ މަސައްކަތްތައް ރަނގަޅުކޮށްދޭ އެއްޗެކެވެ. އަދި މި ރަށު މީހުންނަކީ ހަށިގަނޑަށް ކަސްރަތުލިބޭ ކަންތައްތައް އަބަދުވެސް ކުރާ ބައެކެވެ. އެއީ މަސް ބޭނުން ކަމަށް ވިޔަސް ހިނގުން ކަމަށް ވިޔަސް އަދި އެކި ކާއެއްޗެތި އަޅާ ގަސްގަހާއި މާ އަޅާ ގަހާއި ފާޑުފާޑުގެ ގަސްތައް އިންދުމުގައި ވެސް މިރަށުގެ މީހުން ވަރަށް ހަރަކާތްތެރިކޮށް އުޅެ އެވެ. ކޮންމެ މީހަކުވެސް ކޮންމެވެސް ކަމެއް ކޮންމެ ދުވަހަކުވެސް ކޮށް އުޅެ އެވެ.

މި ޕްރޮޖެކްޓްގައި މަސައްކަތްކުރި ސައިންސްވެރިންނަށް ވަރަށް ހައިރާންކަން ލިބުނު އެހެން ކަމެއް ވެސް ފާހަގަ ކުރެވުނެވެ. މި ރަށު މީހުންގެ ހަށިގަނޑުގައިވާ ކެޕިލަރީ ބްލަޑް ވެސެލްސް ނުވަތަ އެންމެ ހިމަ ލޭ ނާރުތައް ވަރުގަދަ ކަމެވެ. މި ނާރުތަކަކީ އުމުރުން ދުވަސްވުމުން ހަލާކުވާ އެއްޗެކެވެ. ނަމަވެސް އެ ރަށުގެ މީހުންގެ އެ ނާރުތައް ހުރީ ގާތްގަނޑަކަށް 20 ގެ އަހަރުތައް ގުނަމުންދާ މީހުންގެ ނާރުތައް ފަދަ ޒުވާންކޮށެވެ.

މި ދިރާސާ ބޮޑަށް އަމާޒުކޮށްފައިވަނީ އުމުރުން ދުވަސްވީ 80 މީހަކަށެވެ. އޭގެ ތެރެއިން 25 މީހުންނަކީ 100 އަހަރު ފުރިފައިވާ މީހުންނެވެ. މި ދިރާސާގައި ބައިވެރިވި ސައިންސްވެރިއަކު ވިދާޅުވި ގޮތުގައި ދިރާސާގެ އަމާޒަކީ އަޗިއަރޮލީން ދުނިޔެއަށް ފޯރުކޮށްދެވިދާނެ ކަންތައްތަކެއް ހޯދުމެވެ.

"އަހަރެމެން މި ތައްޔާރުކުރަނީ ފާޑެއްގެ ކްލިނިކަލް ސްކޯ ޝީޓްތަކެއް. ގިނަ ދުވަސް ވަންދެން ދުނިޔޭގައި ހުންނަން ބޭނުންމީހުންގެ ކެއުމުގެ އާދަތައް ގެންގުޅެން ޖެހޭނެ ގޮތާއި ހަށިގަނޑަށް ހެލިފެލިވެ އުޅެވޭ ކަސްރަތުތައް ކުރަން ޖެހޭނެ މިންވަރާއި ވިސްނުން ގެންގުޅެން ޖެހޭނެ ގޮތާއި ސޯޝަލް ލައިފް ބަހައްޓާނެ ގޮތް ބުނެދޭ ޓޫލް ކަހަލަ އެއްޗެއް މިއީ،" އޭނާ ވިދާޅުވި އެވެ.