"އުޅްތާ ޕަންޖާބު" ދެއްކުން މަނަލެއް ނުކުރޭ: ޕްރޮޑިއުސަރު

އިންޑިއާގެ ސެންސަރު ބޯޑުން "އުޅްތާ ޕަންޖާބު" ދެއްކުން މަނާ ނުކުރާ ކަމަށް ފިލްމުގެ އެއް ޕްރޮޑިއުސަރު އަނުރާގް ކަޝޭޕް ބުނެފި އެވެ.

އަނުރާގް މިހެން ބުނީ ސެންސަރު ބޯޑުން "އުޅްތާ ޕަންޖާބު" ރިލީޒްކުރުމުގެ ހުއްދަ ނުދޭން ނިންމާފައިވާ ކަމަށް އިންޑިއާގެ ނޫސްތަކުގައި ޖަހާފައިވާ ޚަބަރުތަކާ ގުޅިގެން ކޮށްފައިވާ ޓުވިޓްތަކެއްގަ އެވެ.

އަބީޝެކް ޗައުބޭ ޑައިރެކްޓްކޮށްފައިވާ މި ފިލްމަކީ ޕަންޖާބުގައި އޮތް މަސްތުވާތަކެތީގެ ވިޔަފާރިކުރުމުގެ މައްސަލަތަކާ ގުޅޭ ގޮތުން އުފައްދާފައިވާ ފިލްމެކެވެ. ފިލްމު ފާސްކުރި ކަމުގެ ލިޔުންދޭން ސެންސަރު ބޯޑުން ދެކޮޅު ހަދާފައިވާ ކަމަށް ވެ އެވެ. ނަމަވެސް އަނުރާގް ބުނަނީ ފިލްމެއް މަނާ ކުރީ ކަމަށް ނިންމޭނީ އެ ފިލްމެއް އަލުން ބަލައި އިސްލާހު ގެނެސް އަދި ފިލްމު ސެޓްފިކެޓް އެޕިލެޓް ޓްރައިބިއުނަލް (އެފްސީއޭޓީ) އާއި ތިން ބައި މީހުން ވެސް ފިލްމު ފާސް ކޮށްދިން ކަމުގެ ސެޓްފިކެޓް ދޭން ދެކޮޅު ހެދުމުން ކަމަށެވެ. އޭގެ ފަހުން ވެސް ސުޕްރީމް ކޯޓުގައި ވެސް ފިލްމު ރިލީޒްކޮށްދިނުމުގެ ހުއްދަ އަށް އެދުމުގެ ފުރުސަތު އެބައޮތް ކަމަށް އޭނާ ބުންޏެވެ. އެހެންކަމުން މި ހުރިހާ މަރުހަލާއެއް ކަޑައްތުކުރަން ވަގުތު ނަގާނެތީ ފާޑުފާޑުގެ ވާހަކަތައް ދެއްކުން ހުއްޓާލުމަށް އޭނާ އެދުނެވެ.

އިންޑިއާގެ ތަފާތު މީޑިއާތަކުގައިވާ ޚަބަރުތައް ބުނާ ގޮތުން އެ ގައުމުގެ ސެންސަރު ބޯޑުން ފިލްމު ފާސް ނުކޮށްދޭން ވަނީ ނިންމާފަ އެވެ. ފިލްމުގައި ހުތުރު ބަސްތަކުން ހަޅޭއްލެވުމާއި ހުތުރު ބަހުރުވަ ބޭނުންކުރުން އަދި މަސްތުވާތަކެތި ބޭނުންކުރާ ތަން މާ ގިނަ އިން ދެއްކުން މިއީ ފިލްމު ފާސްކޮށްދޭން ސެންސަރު ބޯޑުން އިންކާރު ކުރާ ސަބަބުތަކެވެ. ސާޅީހަށް ވުރެ ގިނަ ތަން އެޑިޓްކޮށް ބަދަލު ގެނެސްގެން ނޫނީ ފިލްމު ފާސްނުކޮށްދޭނެ ކަމަށް ސެންސަރު ބޯޑުން އަންގާފައިވާ ކަމަށް ވެއެވެ.

މިކަމާ ގުޅިގެން "ސޭވް އުޅްތާ ޕަންޖާބު"ގެ ނަމުގައި ސޯޝަލް މީޑިއާގައި ވަރަށް ވަރުގަދަ ކެމްޕޭނެއް ވެސް މިހާރު ފަށައިގެން ކުރި އަށް އެބަ ދެ އެވެ.

ޝާހިދު ކަޕޫރާއި އާލިއާ ބަޓް، އަދި ކަރީނާ ކަޕޫރާއި ދިލްޖީތު ދޮސާންޖް ލީޑް ރޯލުތައް ކުޅެފައިވާ މި ފިލްމުގައި ދައްކުވައިދެނީ ޕަންޖާބުގައި މަސްތުވާތަކެތި ބޭނުންކުރުން ޒުވާނުންގެ މެދުގައި އާއްމުވެފައިވާ މިންވަރެވެ.