ފައިސާ ދެއްކީ ޑރ. ޝަހީދު އެކަނި: ފިނޭންސް

ދައުލަތަށް އަނބުރާ ފައިސާ ދައްކަން ފިނޭންސް މިނިސްޓްރީން އެންގި ހަތް ބޭފުޅުންގެ ތެރެއިން، މިހާތަނަށް ފައިސާ ދެއްކީ ކުރީގެ ފޮރިން މިނިސްޓަރު ޑރ. އަހުމަދު ޝަހީދު އެކަނި ކަމަށް އެ މިނިސްޓްރީން މިރޭ ބުނެފި އެވެ.

ފިނޭންސްގެ އޮފިޝަލަކު ވިދާޅުވި ގޮތުގައި ޑރ. ޝަހީދު ފިޔަވައި އެހެން ބޭފުޅުން ފައިސާ ނުދައްކަވާ ނަމަ، މައްސަލާގައި ފިޔަވަޅު އަޅާނެ އެވެ.

ފިނޭންސުން މިދިޔަ މަހުގެ 25 ގައި އާންމުކުރި އިއުލާނެއްގައި ބުނީ، ހަތް ދުވަހުގެ ތެރޭގައި ފައިސާ ނުދައްކަވާ ބޭފުޅުންގެ މައްޗަށް ދައުވާ ކުރުމަށް ބަންޑާރަ ނައިބުގެ އޮފީހަށް ފޮނުވާނެ ކަމަށެވެ. އެކަމަކު ފައިސާ ދައްކަން އަންގައި އެކި ބޭފުޅުންނަށް ފިނޭންސުން ސިޓީ ފޮނުވާފައި ވަނީ އެކި ތާރީހުތަކުގަ އެވެ. މިދިޔަ މަހުގެ 25 އިން ފެށިގެން ސިޓީ ފޮނުވަން ފަށާފައިވާއިރު އޭގެ ތެރެއިން އެންމެ ފަހުން ސިޓީ ފޮނުވި ކަމަށް އެނގިފައި ވަނީ ޑރ. ޝަހީދަށެވެ.

އެމްޑީޕީއަށް ނިސްބަތްވާ މި ހަތް ބޭފުޅުންގެ ތެރެއިން، ދީނީ އަދި ފިކުރީ މިނިވަންކަމާ ބެހޭ އދ. ގެ ހާއްސަ މަންދޫބުގެ މަގާމުގައި ހުންނެވި ޑރ. ޝަހީދު ދައުލަތަށް އަނބުރާ ދެއްކެވި ފައިސާގެ އަދަދެއް ފިނޭންސް މިނިސްޓްރީއަކުން ނުބުންޏެވެ. އަދި އޭނާއާ ގުޅޭ ގޮތް ނުވުމުން އޭގެ ތަފުސީލެއް ވެސް ނުލިބުނެވެ.

ދައުލަތަށް ފައިސާ ދައްކަން ފިނޭންސުން އެންގީ ޑރ. ޝަހީދުގެ އިތުރުން ކުރީގެ ރައީސް މުހައްމަދު ނަޝީދާއި އެމްޑީޕީ ސަރުކާރުގެ ދެވަނަ ފޮރިން މިނިސްޓަރު އަހުމަދު ނަސީމާއި ހައުސިން މިނިސްޓަރު މުހައްމަދު އަސްލަމާއި އޭރުގެ ހޯމް މިނިސްޓަރާއި ފިނޭންސް މިނިސްޓަރުގެ މަގާމު ވެސް ފުރުއްވި އަދި މިހާރު މާލޭގެ މޭޔަރު މުހައްމަދު ޝިހާބުގެ އިތުރުން ހޯމް މިނިސްޓްރީގެ ޑެޕިއުޓީ މިނިސްޓަރުގެ ނައިބުގެ މަގާމު އަދާކުރެއްވި ހުސެއިން ރަޝީދު އަހުމަދާއި ކޮމިޝަނަ ޖެނެރަލް އޮފް ކަސްޓަމްސްގެ މަގާމު ފުރުއްވި އަހުމަދު އަސްވާނަށެވެ.

މި ބޭފުޅުން ދައުލަތަށް އަނބުރާ ފައިސާ ދައްކަން ޖެހެނީ ދައުލަތުގެ މާލިއްޔަތުގެ ގާނޫނާ ހިލާފަށް ފައިސާ ދޫކޮށްފައިވާ ކަމަށް އޮޑިޓަ ޖެނެރަލާއި އެންޓި ކޮރަޕްޝަން ކޮމިޝަން (އޭސީސީ)ގެ ތަހުގީގީ ރިޕޯޓުތަކުގައި ފާހަގަކޮށް އަދި އެ ފައިސާ ހޯދަން ދައުލަތަށް އަރުވާފައިވާތީ ކަމަށް ފިނޭންސުން ވަނީ ބުނެފަ އެވެ.

ފިނޭންސުން ބުނެފައި ވަނީ މި ހަތް ބޭފުޅުންނަށް ފައިސާ ދައްކަން މިނިސްޓަރު އަހުމަދު މުނައްވަރު އެންގެވީ، އޭނާގެ ގާނޫނީ ޒިންމާ އަދާކުރުމަށް ކަމަށެވެ. އަދި އެއީ ފެށުމެއް ކަމަށާއި އޮޑިޓަ ޖެނެރަލާއި އޭސީސީގެ ތަހުގީގީ ރިޕޯޓުތަކުގައި ފާހަގަކޮށްފައިވާ ބޭފުޅުން ދައުލަތަށް ފައިސާ ދައްކަން އަންގާނެ ކަމަށް އެ މިނިސްޓްރީން ވަނީ ބުނެފަ އެވެ. އެކަމަކު އިދިކޮޅު އެމްޑީޕީން ބުނެފައި ވަނީ އެއީ ސަރުކާރުގެ ކޮރަޕްޝަންގެ އަމަލުތައް ފޮރުވަން ކުރާ ކަމެއް ކަމަށެވެ.