ހަޒާޑް ނެތްތަން ފޫބައްދާނީ ކުޓީނިއޯ؟

ލަންޑަން (އޭޕްރިލް 23) – ރެއާލް މެޑްރިޑް ބަދަލުވާނެ ކަމަށް ބެލެވޭ ޕްލޭމޭކަރު އެޑެން ހަޒާޑް ނެތްތަން ފޫބައްދަން ޗެލްސީން ބާސެލޯނާގެ ފިލިއްޕެ ކުޓީނިއޯ ގެންނަން ވިސްނާ ކަމަށް މީޑިއާ ރިޕޯޓްތައް ބުނެފި އެވެ.

އަންނަ ސީޒަނަށް ރެއާލް މެޑްރިޑް ވަރުގަދަކުރަން ކުރާ މަސައްކަތުގައި ހަޒާޑާކީ އެ ޓީމުގެ އެންމެ މުހިއްމު ޓާގެޓެވެ. ރިޕޯޓްތައް ބުނާ ގޮތުގައި އޭނާ މެޑްރިޑަށް ބަދަލުވުމާ ގުޅޭ މަޝްވަރާތައް ނިމި ދެން އޮތީ ހަމައެކަނި އެއްބަސްވުންތަކުގައި ސޮއިކޮށްލުމެވެ.

އެއާ އެކު ޗެލްސީ އަށް ވަނީ ބަދަލުގައި ކުޅުންތެރިޔަކު ހޯދަން މަޖުބޫރުވެފަ އެވެ. އެގޮތުން އެ ޓީމުގެ ލޯ އެންމެ ބޮޑަށް އަމާޒުވެފައިވަނީ ކުޓީނިއޯ އަށް ކަމަށްވެ އެވެ. ކުރިން ލިވަޕޫލަށް ކުޅުނު ކުޓީނިއޯ އަކީ އިނގިރޭސި ލީގުގެ ތަޖުރިބާ ހުރި ކުޅުންތެރިޔެކެވެ.

މިދިޔަ އަހަރުގެ ޖެނުއަރީ މަހު ބާސެލޯނާ އަށް ބަދަލުވި ކުޓީނިއޯ އަށް އެ ޓީމުން އެކަށީގެންވާ ފުރުސަތު ނުލިބޭތީ އޭނާ ވެސް ހުރީ ކްލަބް ބަދަލުކުރަން ބޭނުންވެފައި ކަމަށްވެ އެވެ. އޭނާ އަލުން ގަތުމަށް ލިބުނު ފުރުސަތުގެ ބޭނުން ލިވަޕޫލުން ވެސް ދޫކޮށްލާފައިވާ ކަމަށް ރިޕޯޓްތައް ބުނެ އެވެ. އޭނާ އަށް ޝައުގުވެރިވާ އެހެން ކްލަބްތަކަކީ މެންޗެސްޓާ ޔުނައިޓެޑާއި ޕީއެސްޖީ އެވެ.

އެކަމަކު ޗެލްސީ އަށް މިކަން ކުރެވެން އޮތީ ކުޅުންތެރިން ނުގެނެވޭ ގޮތަށް ފީފާ އިން ދީފައިވާ އަދަބުން ސަލާމަތްވެއްޖެ ނަމަ އެވެ. އެ މައްސަލަ ދެ ވަނަ ފަހަރަށް އިސްތިއުނާފްކޮށްފައިވާއިރު، ލުޔެއް ލިބޭނެ ކަމަށް ބެލެވެ އެވެ.