އުނގޫފާރުގައި 500،000ރ. ވަގަށް ނެގި މީހަކު ހައްޔަރުކޮށްފި

ރ. އުނގޫފާރުގައި މިއަދު 500،000ރ. ވަގަށް ނެގި މައްސަލައެއްގައި މީހަކު ހައްޔަރުކޮށްފި އެވެ.

ފުލުހުން ބުނީ މިއަދު މެންދުރު ވައްކަން ކޮށްފައި ވަނީ، އުނގޫފާރު ވެސްޓް ބީޗް ރެސްޓޯރެންޓް ހިންގާ މީހާގެ ގޭގައި ހުރި ތިޖޫރިއަކުން ކަމަށެވެ. އެ މައްސަލައިގެ ތުހުމަތުގައި ކޯޓު އަމުރެއްގެ ދަށުން މިއަދު 27 އަހަރުގެ ފިރިހެނަކު ހައްޔަރުކޮށްފައިވާ ކަމަށް ފުލުހުން ބުންޏެވެ.

އެކަމަކު ވަގަށް ނެގި ފައިސާ ފެނުނު ކަން ނުވަތަ ނޫން ކަމެއް ފުލުހުން ނުބުނެ އެވެ.

ފުލުހުން އަންނަނީ އެ މައްސަލަ ތަހުގީގު ކުރަމުންނެވެ.