ވިލާ ކޮލެޖުގެ ސްކޮލަޝިޕަށް ކުރިމަތިލާން ހުޅުވާލައިފި

ވިލާ ކޮލެޖުގެ ސްކޮލަޝިޕް ސްކީމަށް ކުރިމަތިލުމުގެ ފުރުސަތު މިއަދު ހުޅުވާލައިފި އެވެ.

މީގެ ތިން އަހަރު ކުރިން ފެށިގެން ދެމުން އަންނަ ސްކޮލަޝިޕްތަކަށް ކުރިމަތިލުމުގެ ފުރުސަތު ވަނީ އަންނަ މަހުގެ 15 ވަނަ ދުވަހާ ހަމައަށް ދީފަ އެވެ.

ވިލާއިން ހުޅުވާލާފައިވާ ސްކޮލަޝިޕްގެ ތެރޭގައި ހިމެނެނީ ވިލާ ކޮލެޖު އޯޕަން ސްކޮލަޝިޕާއި ވިލާ ކޮލެޖު/ ވިލާ އިންޓަނޭޝަނަލް ހައި ސްކޫލު ސްކޮލަޝިޕާއި ވިލާ ކޮލެޖު އެލަމްނައި ސްކޮލަޝިޕް އަދި ވިލާ ކޮލެޖު ކޮމިއުނިޓީ އެންގޭޖްމަންޓް ސްކޮލަޝިޕެވެ.

ވިލާ ކޮލެޖު އޯޕަން ސްކޮލަޝިޕް

މި ކެޓަގަރީން ހުޅުވާލާފައިވަނީ ތިން ސްކޮލަޝިޕެވެ. އެއީ ފައުންޑޭޝަނާއި ޑިގްރީ އަދި މާސްޓާސް ފެންވަރުން ސްކޮލަޝިޕެވެ. އެ ފުރުސަތުތަކަށް ދަރިވަރުން ހޮވުމުގައި ބަލާނީ އެންމެ މަތީ ފާސް ހޯދާފައިވާ ދަރިވަރުންނަށް ކަމަށް ކޮލެޖުން ބުންޏެވެ.

ވިލާ ކޮލެޖު/ ވިލާ އިންޓަނޭޝަނަލް ހައި ސްކޫލު ސްކޮލަޝިޕް

ހައި ސްކޫލުން އޭ ލެވެލް ހަދާ ދަރިވަރުންގެ ތެރެއިން ދެ ދަރިވަރަކަށް ވިލާ ކޮލެޖުގައި ޑިގްރީއަށް ކިޔެވޭނެ އެވެ. މި ސްކޮލަޝިޕަށް ކުރިމަތިލެވޭނީ ވިލާ ހައި ސްކޫލުން އޭ ލެވެލް ނިންމިތާ ދެ އަހަރަށް ވުރެ ގިނަ ދުވަސްނުވާ ދަރިވަރުންނަށް އެކަންޏެވެ.

ވިލާ ކޮލެޖު އެލަމްނައި ސްކޮލަޝިޕް

ވިލާ ކޮލެޖުން ކިޔެވުން ނިންމާފައިވާ ދަރިވަރުންނަށް އަމާޒުކޮށްގެން ހުޅުވާލާފައިވާ މި ފުރުސަތުގައި މާސްޓާސް އާއި ޑިގްރީ ފެންވަރަށް ކިޔެވުމަށ،ް ކޮންމެ ކެޓަގަރީއަކުން ފުރުސަތެއް ލިބޭނެ އެވެ. އެގޮތުން ކޯހަށް ދަރިވަރުން ހޮވުމުގައި ބަލާނީ އެންމެ މަތީން ފާސް ހޯދާފައިވާ ދަރިވަރުންނަށެވެ.

ކޮމިއުނިޓީ އެންގޭޖްމަންޓް ސްކޮލަޝިޕް

ކޮމިއުނިޓީ އެންގޭޖްމަންޓް ސްކޮލަޝިޕް ދެނީ ރަށްރަށުގައި ހުންނަ ކެމްޕަސްތަކަށް ހާއްސަކޮށްގެންނެވެ. ވިލާއިން ބުނިގޮތުގައި އެ ސްކޮލަޝިޕް ދޭނީ ދަރިވަރުން ތިބޭ ނިސްބަތަށެވެ.

މިހާރު ކިޔަވަމުން އަންނަ ދަރިވަރުންނަށް ވެސް ކުރިމަތިލެވޭ ވިލާ ކޮލެޖު ސްކޮލަޝިޕްތައް ހާއްސަކޮށްފައިވަނީ ޖެނުއަރީ އިންޓޭކަށް އެކަންޏެވެ.