އިންޑިއާގެ ދެ މަހުޖަނުންގެ ދަރިންގެ ކައިވެނި ބޮޑު އީދަކަށް

އިންޑިއާގެ ފިލްމީ ތަރިން ކަމަށްވާ ދީޕިކާ ޕަދްކޯނާއި ރަންވީރު ސިންގްގެ އިތުރުން ޕްރިޔަންކާ ޗޯޕްޅާ އާއި އެމެރިކާގެ ނިކް ޖޯނަސް ފަދަ މަޝްހޫރު ތަރިންގެ ކައިވެނިތަކާ އެކު އިންޑިއާ އަށް އައިސްފައި އޮތް ކައިވެނީގެ އީދަށް އަދިވެސް ނިމުމެއް ނާދެ އެވެ.

މިހާރު އެންމެ ފޯރީގައި ކުރިއަށް ދަނީ އިންޑިއާގެ އެންމެ ނުފޫޒު ގަދަ ދެ މަހުޖަނުންގެ ތެރޭގައި ހިމެނޭ މުކޭޝް އަމްބާނީ އާއި ނީތާގެ އަމްބާނީގެ އަންހެން ދަރިފުޅު އީޝާ އަމްބާނީ އާއި މަޝްހޫރު ޕިރަމަލް ގްރޫޕްގެ ޗެއާމަން އަޖޭ ޕިރަމަލްގެ ދަރިފުޅު އާނަންދު ޕްރިމަލްގެ ކައިވެނީގެ ހަރަކާތްތަކެވެ.

މި ހަފުތާ ފެށިގެން ދިޔައީ އުދޭޕޫރުގައި ކުރިއަށް ގެންދާ ފޯރި ގަދަ އަދި ކުލަގަދަ ކައިވެނީގެ ޕްރީ ވެޑިން ހަރަކާތްތަކާ އެކުގަ އެވެ. މި ހަރަކާތްތަކުގައި ބޮލީވުޑްގެ އޭ ލިސްޓް ހުރިހާ ފަންނާނުންހެން ބައިވެރިވަމުން އަންނަ އިރު، ދުނިޔޭގެ މަޝްހޫރު ބައެއް މީހުން ވެސް ވަނީ އީޝާ އާއި އާނަންދުގެ ކައިވެނީގެ ހަފުލާގެ ހަރަކާތްތަކުގައި ބައިވެރިވާން އިންޑިއާ އަށް ގޮސްފަ އެވެ.

އޭގެ ތެރޭގައި އެމެރިކާގެ ކުރީގެ ސެކްރެޓަރީ އޮފް ސްޓޭޓް އަދި ކުރީގެ ރައީސް ބިލް ކްލިންޓަންގެ އަނބިކަނބަލުން ހިލަރީ ކްލިންޓަނާއި އެމެރިކާގެ މަޝްހޫރު އަންހެން ލަވަކިޔުންތެރިޔާ ބިޔޯންސޭ ފާހަގަކޮށްލެވެ އެވެ. ބިޔޯންސޭ ވަނީ އާދީއްތަ ދުވަހުގެ ރޭ ބޭއްވި ހަފުލާގައި ޕަފޯމް ވެސް ކޮށްފަ އެވެ.

ކައިވެނީގެ ހަފުލާގެ ހަރަކާތްތަކުގައި ބައިވެރިވާން އިންޑިއާ އާއި ބޭރުގެ ވަރަށް ބޮޑެތި ކުންފުނިތަކުގެ ވެރިން ވެސް ވަނީ އުދޭޕޫރަށް ގޮސްފަ އެވެ.

އީޝާ، 27، އާއި އާނަންދު، 33، ގެ ކައިވެނީގެ ރަސްމިއްޔާތު އޮންނާނީ މާދަމާ އެވެ. އެ ދެ މީހުން އެންގޭޖްވީ ދީޕިކާ އާއި ރަންވީރު ވެސް ކައިވެނި ކުރި އިޓަލީގެ ލޭކް ކޯމޯގައި މިދިޔަ ސެޕްޓެމްބަރު މަހުގެ ސެޕްޓެމްބަރު މަހުގެ 23 ވަނަ ދުވަހު އެވެ. އެ ހަފުލާ ވެސް ވެގެން ދިޔައީ ވަރަށް ކުލަގަދަ އަދި މަޝްހޫރު އެތައް ފަންނާނުންނެއް ބައިވެރިވި ހަފުލާއަކަށެވެ.

އީޝާ އާއި އާނަންދަކީ އޭޝިއާގެ އެންމެ މުއްސަނދި މީހުންގެ ތެރޭގައި ހިމެނޭ ދެ މީހުންގެ ދަރިންނަށްވާތީ އެ މީހުންގެ ކައިވެނީގެ ހަފުލާވެގެން ދާނީ ވަރަށް ވެސް އަގުބޮޑު އަދި އެހާމެ ފުރިހަމަ ހަފުލާއަކަށެވެ. ދުރާލައި ޕްރީ ވެޑިން ހަރަކާތްތައް ފެށިގެން ދިއުމަކީ ވެސް އޭގެ އެއް ހެއްކެވެ.

އުމުރުން މިހާރު 61 އަހަރުގެ މުކޭޝްއަކީ ރިލަޔަންސް އިންޑަސްޓްރީގެ ޗެއާމަން އަދި މެނެޖިން ޑިރެކްޓަރެެވެ. އޭނާގެ މިލްކިއްޔާތުގެ އަގު 45.1 ބިލިއަން ޑޮލަރަށް އަރަ އެވެ. މުކޭޝް އާއި ނީތާ، 55، ގެ ތިބެނީ ތިން ދަރިންނެވެ. އެއީ އީޝާގެ އިތުރުން އާކާޝް އަމްބާނީ، 27، އާއި އާނަންތު އަމްބާނީ، 23، އެވެ.

ރިއަލް އެސްޓޭޓާއި ފާމަސޫޓިކަލް ފަދަ ދާއިރާތަކުގައި އިންވެސްޓްކޮށްފައިވާ އަޖޭ ޕިރަމަލްގެ މިލްކިއްޔާތު 4.5 ބިލިއަން ޑޮލަރަށް އަރަ އެވެ. އަޖޭ، 63، އާއި ސްވަތީ ޕިރަމަލް، 62، ގެ ތިބެނީ ދެ ދަރިންނެވެ. އެއީ އާނަންދުގެ އިތުރުން ނަންދިނީ ޕިރަމަލް އެވެ.