ޕީއެސްއެމްގެ ބޮޑު ހިޔާނާތެއްގެ މައްސަލަ އޭސީސީން އަލުން ބަލަނީ

ޕަބްލިކް ސާވިސް މީޑިއާ (ޕީއެސްއެމް) އިން ހިންގާ ޓްރޭނިން އިންސްޓިޓިއުޓް ކަމަށްވާ “މޯލްޑިވްސް މީޑިއާ އިންސްޓިޓިއުޓް (އެމްއެމްއައި)”ގެ އިމާރާތެއް ހޯދުމުގައި ބޮޑު ކޮރަޕްޝަންގެ އަމަލެއް ހިންގާފައިވާ މައްސަލަ އޭސީސީން އަނެއްކާ ވެސް ތަހުގީގު ކުރަން ފަށައިފި އެވެ.

އެމްއެމްއައި ހިންގުމަށް އިމާރާތެއް ހޯދުމަށް 2015 ވަނަ އަހަރު ޕީއެސްއެމުން އިއުލާން ކުރުމުން ބިޑް ކާމިޔާބު ކުރީ ހ. ޖޯޖެޑް ވިލާ، ދިގު މުއްދަތަކަށް ހަދައިގެން އުޅުނު މީހެކެވެ. އޭނާ ޕީއެސްއެމްއަށް އެތަން ކުއްޔަށް ދީފައިވަނީ މަހަކު 37،000 ރުފިޔާގެ ކުއްޔަކަށެވެ. ޕީއެސްއެމްއިން އެއިމާރާތް ކުއްޔަށް ހިފިއިރު އިމާރާތްކޮށް ނުނިމެ އެވެ.

ދެހާސް ފަނަރަ ވަނަ އަހަރުގެ ޑިސެމްބަރު މަހުން ފެށިގެން ހަތް މަސް ދުވަހުގެ ކުލި ޕީއެސްއެމްއިން ގޭ ވެރިފަރާތަށް ދައްކާފައިވާއިރު އިމާރާތް އެކުންފުންޏާ ހަވާލުކޮށްފައިނުވާ ކަމަށް އޭސީސީން ބުނެ އެވެ. އެގޮތުން 481000 ރުފިޔާ ކުލީގެ ގޮތުގައި ގަވައިދާ ހިލާފަށް ހަރަދުކޮށްފައިވާ ކަމަށް އޭސީސީން ބުނެ އެވެ.

އެ މައްސަލާގައި އޭސީސީން ވަނީ ޕީއެސްއެމްގެ ޕްރޮކިއުމަންޓް ޑިޕާޓްމަންޓްގެ ޑިރެކްޓާ މުހައްމަދު ހާޝިމްގެ މައްޗަށް ދައުވާ ކުރަން މިދިޔަ އަހަރުގެ ޖެނުއަރީ މަހު ފޮނުވާފަ އެވެ. ޕްރޮސިކިއުޓާ ޖެނެރަލް އަނބުރާ އެ މައްސަލަ އޭސީސީއަށް ފޮނުވާލީ ތަހުގީގު ފުރިހަމަ ކުރުމަށެވެ. އޭސީސީން މިހާރު އަންނަނީ އެ މައްސަލަ އިތުރަށް ބެލުމަށްޓަކައި ޕީއެސްއެމްގެ ވެރިންގެ ބަޔާންތައް ނަގަމުންނެވެ.

އޭސީސީއަށް މިއަދު ބަޔާން ދެއްވި ޕީއެސްއެމްގެ ކުރީގެ ލީގަލް އެންޑް ރެގިއުލޭޓަރީ އެފެއާޒްގެ ހެޑް، އަބްދުﷲ ހިލްމީ "މިހާރު" އަށް ވިދާޅުވީ އިމާރާތެއް ކުއްޔަށް ހިފަން ވެގެން ތިން ފަހަރެއްގެ މަތިން އިއުލާން ކުރިއިރު އެ ބިޑް ކާމިޔާބު ކުރި ފަރާތުން ހުށަހެޅީ ސައްހަ މައުލޫމާތު ނޫން ކަމަށެވެ.

އިއުލާން ކުރި އިރު އަދި އެގްރިމެންޓުގައި ވެސް އެޑްވާންސްގެ ގޮތުގަ އާއި ސެކިއުރިޓީ ޑިޕޮސިޓް ދޭން އެއްބަސްވެފައި ނުވާ ކަމަށާއި ނަމަވެސް ޕީއެސްއެމުން އެ ފައިސާ ދޫކޮށްފައިވާ ކަމަށް އޭނާ ވިދާޅުވި އެވެ.

"އަޅުގަނޑު އޭރު ވެސް ބުނިން އެ ފައިސާ ނުދެވޭނެ ކަމަށް. އެކަމަކު އެ ފައިސާ ދިން. ދިނީ ކިހާ އަދަދެއް ކަމެއް އަޅުގަނޑަކަށް ނޭންގެ. އެކަމަކު ފައިސާ ދިންކަން ޔަގީން،" ހިލްމީ ވިދާޅިވި އެވެ.

އޭނާ ވިދާޅުވީ ހަދައި ނުނިމޭ އިމާރާތެއް ކުއްޔަށް ހިފައި ކޮންމެ މަހަކު 37،000 ރ.ގެ ކުއްޔެއް ދައްކަމުން ދިޔައީ ޕީއެސްއެމްގެ ޑެޕިއުޓީ މެނޭޖިން ޑިރެކްޓަރު މުހައްމަދު އިކްރާމްގެ ނުފޫޒުން ކަމަށެވެ.

ނަމަވެސް އިކްރާމް އެ ތުހުމަތުތަކާ ދެކޮޅު ހަދައެވެ. އޭނާ ވިދާޅުވި ގޮތުގައި އެ މަސައްކަތްތަކަކީ އޭނާއަށް އެނގިވަޑައިގެން ހިނގާފައިވާ ކަންތައްތަކެއް ނޫނެވެ. އޭނާ ބޮޑަށް ބަލަހައްޓަވަމުން ގެންދެވީ ކޮންޓެންޓާ ގުޅުން ހުރި ކަންކަން ކަމަށްވާތީ އިމާރާތެއް ކުއްޔަށް ހިފުމުގައި ހިނގާފައިވާ މުއާމަލާތެއްގެ މައުލޫމާތު ލިބިފައިނުވާ ކަމަށް އޭނާ ވިދާޅުވި އެވެ.

އޭސީސީގެ މީޑިއާ އޮފިޝަލް ވިދާޅުވީ އެ މައްސަލާގައި ތުހުމަތު ކުރެވޭ މީހުންގެ މައުލޫމާތު ހިއްސާ ކުރެވެން ނެތް ކަމަށެވެ. އޭސީސީން އެ މައްސަލަ އިތުރަށް ތަހުގީގު ކުރަމުން އަންނަނީ ދައުވާ ކުރުމަށް ބޭނުންވާ އިތުރު ހެކިތައް ހޯދުމަށް ކަމަށް އޭނާ ވިދާޅުވި އެވެ.