ފިސްތޯލަ ގެންގުޅުނު މައްސަލާގައި ޖަވާބުދާރީވާން އެކަށީގެންވާ ވަގުތެއް ނުދޭ: އަދީބުގެ ވަކީލުން

މިދިޔަ އަހަރުގެ މެއި މަހުގެ ފުރަތަމަ ދުވަހު ފިސްތޯލަ ގެންގުޅުނު މައްސަލާގައި ކުރީގެ ނައިބު ރައީސް އަހުމަދު އަދީބު 10 އަހަރަށް ޖަލަށްލާން ކްރިމިނަލް ކޯޓުން ހުކުމްކުރީ ދައުވާ އަށް ޖަވާބުދާރީވާން އެކަށީގެންވާ ވަގުތު ނުދީ ކަމަށް އަދީބުގެ ވަކީލުން ހައި ކޯޓުގައި މިއަދު ބުނެފި އެވެ.

މިދިޔަ އަހަރުގެ މެއި މަހުގެ ފުރަތަމަ ދުވަހު އިދިކޮޅު ފަރާތްތަކުން ބޮޑު މުޒާހަރާ ކުރިއިރު އަދީބު ފިސްތޯލަ ގެންގުޅުނު މައްސަލާގައި އޭނާ ޖަލަށްލާން ކުރި ހުކުމް އޭނާގެ ފަރާތުން އިސްތިއުނާފް ކުރުމުން ބޭއްވި އަޑުއެހުމުގައި އަދީބުގެ ވަކީލް މޫސާ ސިރާޖް ވިދާޅުވި ގޮތުގައި ކޯޓުން ވަކީލުންނަށް އެކަށީގެންވާ ވަގުތު ދީފައެއް ނުވެ އެވެ.

ސިރާޖް ވިދާޅުވީ ގިނަ މައްސަލަތަކެއް އަދީބާ ދެކޮޅަށް އޭރު ކޯޓުގައި ހިންގިއިރު ބަންދުގައި ހުރި އަދީބާ ބައްދަލުކުރަން ލިބެނީ ހަފުތާ އަކު ދެ ދުވަހު އެކަނި ކަމަށެވެ. އެހެންވެ މައްސަލައަށް ތައްޔާރުވާން ފުރުސަތު ނުލިބޭތީ އެކަމުގެ ޝަކުވާ ކޯޓުގައި ކުރި ކަމަށާއި އެކަމަކު އެ ފުރުސަތު ނުދޭ ކަމަށް ވަކީލް ވިދާޅުވި އެވެ. އޭނާ ވިދާޅުވީ ފިސްތޯލަ ގެންގުޅުނު މައްސަލާގައި ހެކިބަސް ނެގީ ވެސް އަދީބުގެ އިތުރު ފަސް މައްސަލައެއް ކޯޓުގައި ހިނގި ދުވަހެއްގައި ކަމަށެވެ.

އެ ވާހަކަތަކަށް ރައްދު ދީ ދައުލަތުން ބުނީ އެކަށީގެންވާ ފުރުސަތު އަދީބަށް ދީފައިވާ ކަމަށާއި އެ މައްސަލައިގެ އަޑުއެހުންތައް ބޭއްވުމާއި ހެކިބަސް ނެގުމާ ދެމެދު ތިން މަސް ދުވަސް ހޭދަވެފައިވާ ކަމަށެވެ. ދައުލަތުން ބުނީ އެއީ ތައްޔާރުވާން އެކަށީގެންވާ ފުރުސަތެއް ކަމަށެވެ.

އަދީބު އަތުން ފެނުނު ކަމަށް ބުނާ ފިސްތޯލައާ ގުޅިގެން ސިރާޖް ވިދާޅުވީ އެ ފިސްތޯލަ މިހާތަނަށް ވެސް ފުލުހުންނަށް ނުހޯދޭ ކަމަށާއި އަދީބަށް ކުށް ސާބިތުކުރީ ބަޔަކު ބުނި ބުނުމެއްގެ މައްޗަށް ބިނާކޮށް ކަމަށެވެ. އަދި އެފަދަ މައްސަލަތަކުގައި މަނާ އެއްޗެއް ފެންނަންޖެހޭނެ ކަމަށާއި އަދީބު އަތުން ފެނުނު ކަމަށް ބުނާ ފިސްތޯލަ އަކީ އަސްލު އެއްޗެއް ކަން ނުވަތަ ނޫންކަން ވެސް ހެކިންނަށް ނޭނގޭ ކަމަށް އޭނާ ވިދާޅުވި އެވެ.

އެކަމާ ގުޅިގެން ދައުލަތުން ބުނީ އެ މައްސަލާގައި އަދީބަށް ޓެރަރިޒަމްގެ ދައުވާކުރީ ހަމަައެކަނި ފިސްތޯލަ ގެންގުޅެގެން ނޫން ކަމަށާއި އިދިކޮޅު ފަރާތްތަކުގެ މުޒާހަރާއަށް ގެއްލުން ދޭން ރޭވުމާއި އާންމުންގެ މެދުގައި ބިރުވެރިކަން އުފެދޭ ގޮތަށް އަމަލު ކުރުމަކީ ވެސް އެ ދައުވާގެ ބައެއް ކަމަށެވެ. ޓެރަރިޒަމްގެ ކުށެއް ސާބިތުވާނީ ހަމައެކަނި ހަތިޔާރެއް ފެނުމުން ކަމަށް އެއްވެސް ގާނޫނެއްގައި ބަޔާންކޮށްފައި ނެތް ކަމަށާއި މީހެއްގެ ބަސްމަގާއި އަމަލުތަކަކީ ވެސް ޓެރަރިޒަމްގެ އަމަލެއް ކަމަށް ބެލެވިދާނެ ކަމަށް ދައުލަތުން ބުންޏެވެ.

އެގޮތުން ބަލާއިރު އެދުވަހު ހެކިންގެ ގާތު އަދީބު ދެއްކި ވާހަކަތަކަކީ ޓެރަރިޒަމްގެ އަމަލެއް ކުރަން ރާވައިގެން ދެއްކި ވާހަކަތަކެއް ކަން އެނގޭ ކަމަށް ދައުލަތުން ބުންޏެވެ.

ބަޑިއެއް ނަމަ އޭގައި ވަކި ޝަރުތުތަކެއް ފުރިހަމަވާންޖެހޭނެ ކަމަށް ގާނޫނުލް އުގޫބާތުގައި ބުނާ ކަމަށާއި އެކަމަކު އަދީބު އަތުން ފެނުނު ކަމަށް ހެކިން ބުނާ ފިސްތޯލައަކީ އެ ޝަރުތު ހަމަވާ އެއްޗެއް ކަން ނޭނގޭ ކަމަށް ވެސް އަދީބުގެ ވަކީލް ވިދާޅުވި އެވެ. ރައްދުގައި ދައުލަތުން ބުނީ އެ ޝަރުތުތަކަކީ ގާނޫނުލް އުގޫބާތުގެ ދަށުން ދައުވާކުރާ މައްސަލަތަކުގައި އޮންނަ ޝަރުތެއް ކަމަށާއި އަދީބަށް ދައުވާކުރީ ޓެރަރިޒަމްގެ ކުށުގައި ކަމަށްވާއިރު ޓެރަރިޒަމްގެ މައްސަލަތަކުގައި ފެންނަ ބަޑިތަކުގައި އެ ޝަރުތު ފުރިހަމަވާން ނުޖެހޭނެ ކަމަށެވެ.

ދެ ފަރާތުގެ ވާހަކަތައް އަޑުއެހުމަށް ފަހު މިއަދު ވަނީ މައްސަލައިގެ އަޑުއެހުންތައް ނިންމާލައިފަ އެވެ. އެހެންވެ އިތުރު ކަމެއް ސާފުކުރަން ނުޖެހޭ ނަމަ ދެން އޮންނާނީ ހުކުމް ކުރުމެވެ.

އެ މައްސަލަ ބައްލަވަނީ އިސް ފަނޑިޔާރު އަބްދުﷲ ދީދި އާއި ފަނޑިޔާރު އަބްދުއްރައޫފް އިބްރާހިމާއި ފަނޑިޔާރު އަލީ ސަމީރު ހިމެނޭ ބެންޗަކުންނެވެ. ރިިޔާސަތު ބަލަހައްޓަވަނީ އިސް ފަނޑިޔާރު އަބްދުﷲ އެވެ.

އެ މައްސަލައިގެ އިތުރުން ތަފާތު ދެ މައްސަލައަކާ އެކު 33 އަހަރުގެ ޖަލު ހުކުމެއް އަދީބު ދަނީ ތަންފީޒު ކުރަމުންނެވެ. އިތުރު ގިނަ ދައުވާތަކެއް ވެސް އޭނާއާ ދެކޮޅަށް ކޯޓުގައި އެބަ ހިނގަ އެވެ.