ޑރ. މަޖީދު އެޑްމިޓް ކުރި ޚަބަރު އެހީ ފުން ހިތާމައާ އެކު: ރައީސް

އެމްޑީޕީގެ ސަރުކާރުގައި އިސްލާމިކް މިނިސްޓަރުކަން ކުރެއްވި ޑރ. އަބްދުލް މަޖީދު އަބްދުލްބާރީގެ ހާލު ދެރަވެ، ލަންކާ ހޮސްޕިޓަލްގެ އައިސީޔޫގައި އެޑްމިޓް ކުރި ޚަބަރު އެއްސެވީ ފުން ހިތާމައާ އެކު ކަމަށް ރައީސް އަބްދުﷲ ޔާމީން އިއްޔެ ވިދާޅުވެއްޖެ އެވެ.

ރައީސް އޮފީހުގެ ތަރުޖަމާން އިބްރާހިމް މުއާޒް އަލީ ކުރެއްވި ޓުވީޓެއްގައި ވިދާޅުވީ، އިދިކޮޅު ކޯލިޝަންގައި ހިމެނޭ އަދާލަތު ޕާޓީގެ އިލްމުވެރިންގެ މަޖިލީހުގެ ރައީސް ޑރ. މަޖީދަށް އަވަސް ޝިފާއަކަށް ރައީސް ޔާމީން އެދިވަޑައިގަންނަވާ ކަމަށެވެ.

"...މި ހިތާމަވެރި ވަގުތުގައި، ޑރ. މަޖީދުގެ އާއިލާ އަށް ކެތްތެރިކަން ދެއްވުން އެދި ﷲ އަށް ދުއާ ދަންނަވަން،" ރައީސް ޔާމީނާ ހަވާލާ ދެއްވައި ތަރުޖަމާން މުއާޒް ވިދާޅުވި އެވެ.

ދީނީ އިލްމުވެރިޔާ، އަދި ކުރީގެ ރައީސް މައުމޫން އަބްދުލްގައްޔޫމްގެ ސަރުކާރުގައި އުފެއްދި ކީރިތި ގުރުއާނާ ބެހޭ މަރުކަޒުގެ ރައީސްކަން ވެސް ކުރެއްވި ޑރ. މަޖީދަށް ސްޓްރޯކެއް ޖެހި ލަންކާ ހޮސްޕިޓަލްގެ އައިސީޔޫގައި މިދިޔަ ހުކުރު ދުވަހު އެޑްމިޓް ކުރީ، ބައްދަލުވުމަކަށް ލަންކާ އަށް ވަޑައިގެން އުޅުއްވަނިކޮށެވެ.

ލޭ މައްޗަށް ދިއުމުގެ މައްސަލަ ހުންނަ ޑރ. މަޖީދު މިވަގުތު އޮންނެވީ ވެންޓިލޭޓަރުގައި ކަމަށް ވާއިރު އޭނާގެ ހާލު ވަރަށް ސީރިއަސް ކަމަށް ވެ އެވެ.