12 މެމްބަރުންގެ ޝަރީއަތް އަލުން ފަށައި ކޯޓަށް ހާޒިރުކުރަނީ

ރައްޔިތުންގެ މަޖިލީހުގެ 12 މެމްބަރަކާ ދެކޮޅަށް ދައުލަތުން އުފުލާފައިވާ ދައުވާގެ ޝަރީއަތްތައް އަލުން ފަށައި ބައެއް މެމްބަރުން ކޯޓަށް ހާޒިރުވާން ޗިޓު ފޮނުވައިފި އެވެ.

އިދިކޮޅު 12 މެމްބަރެއްގެ މައްޗަށް ދައުވާ އުފުލީ، ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމުގެ ވޯޓަށް ވެރިކަން ކުރާ ޕީޕީއެމްގެ މެމްބަރުން ހުރަސްއެޅި މައްސަލައިގައި ހިނގި ހަމަނުޖެހުންތަކާ ގުޅިގެން، މަޖިލީހަށް ވަނުން ސަލާމަތީ ބާރުތަކުން މަނާކޮށްފައި އޮއްވައި ގަދަކަމުން ވެންނެވި ކަމަށް ބުނެ އެވެ. މި މައްސަލައިގައި 12 މެމްބަރުންގެ މައްޗަށް ދައުލަތުން އުފުލާފައި ވަނީ، ގާނޫނު ތަންފީޒު ކުރާ މުވައްޒަފަކަށް ގަސްތުގައި ހުރަސް އެޅުމުގެ ދައުވާ އެވެ.

ކްރިމިނަލް ކޯޓުގައި މި ޝަރީއަތް މެދުކަނޑާލާފައި އޮތުމަށް ފަހު، އިއްޔެ ވަނީ ކެންދޫ ދާއިރާގެ މެމްބަރު އަލީ ހުސައިންގެ ޝަރީއަތް ފަށައިފަ އެވެ. ދައުވާއާ ގުޅިގެން އޭނާ އަށް ވަނީ ވަކީލަކު އައްޔަންކުރަން ދެ ދުވަސް ދީފަ އެވެ.

މި ދައުވާ އަށް، ހިތަދޫ އުތުރު ދާއިރާގެ މެމްބަރު މުހައްމަދު އަސްލަމާއި ހެންވޭރު މެދު ދާއިރާގެ މެމްބަރު އަބްދުﷲ ޝާހިދު މާދަމާ 10 ޖަހާ އިރަށް ކޯޓަށް ހާޒިރުވުމަށް ޗިޓު ފޮނުވާފައި ކަަމަށް އެ ދެ މެމްބަރުން ވިދާޅުވި އެވެ.

އިދިކޮޅު މެމްބަރުންގެ މައްސަލަ އަލުން ފެށުމުން، ކުރީގެ ރައީސް މުހައްމަދު ނަޝީދު ވަނީ ކަންބޮޑުވުން ފާޅު ކުރައްވައިފަ އެވެ. އެމަނިކުފާނު ވިދާޅުވި ގޮތުގައި، މިނިވަން އިންސާފުވެރި އިންތިހާބެއް ބޭއްވުމުގެ މާހައުލު ތަނަވަސްކުރުމަށްޓަކައި، އެ ދައުވާތައް ހުއްޓާލަން ޖެހެ އެވެ.

އިދިކޮޅު 12 މެމްބަރުންގެ ދައުވާ ސާބިތުވެއްޖެ ނަމަ ހަތަރު މަހާއި 24 ދުވަހުގެ ޖަލު ހުކުމެއް އަންނާނެ އެވެ. އެ ހުކުމް އަޔަސް މަޖިލީހުގެ މެމްބަރުކަމުގެ ގޮނޑިއެއް ނުގެއްލޭނެ އެވެ. އެކަމަކު ހުކުމުގެ މުއްދަތުގައި މަޖިލީހަށް ހާޒިރެއް ނުވެވޭނެ އެވެ.