ފްލެޓަށް އެދުމަށްޓަކައި ބައިލައްކަ އަށް ވުރެ ގިނަ ފޯމު ނަގައިފި

ބޯހިޔާވަހި ކަމަށް ހުޅުވާލި 7،000 ފްލެޓަށް އެދި މިހާތަނަށް، 50،000 އަށް ވުރެ ގިނަ ފޯމު ނަގާފައިވާ ކަމަށް ހައުސިން މިނިސްޓްރީން އިއްޔެ ބުނެފި އެވެ.

ހުޅުމާލޭގައި އިމާރާތް ކުރާ ފްލެޓްތައް 17 ކެޓަގަރީ އަކަށް ބަހާލައި، ކުރިމަތިލާން ހުޅުވާލީ މިދިޔަ އާދީއްތަ ދުވަހު އެވެ. އެ ފުރުސަތު ހުޅުވާލުމާ އެކު، ފުރަތަމަ ދެ ގަޑިއިރުގެ ތެރޭގައި ވެސް 15،000 އަށް ވުރެ ގިނަ ފޯމު ނެގި އެވެ.

ހައުސިން މިނިސްޓްރީގެ މީޑިއާ ކޮންސަލްޓަންޓް، އަހްމަދު ފަޒާލް ވިދާޅުވީ ދަރުބާރުގެ އިން ގިނަ އަދަދެއްގެ ފޯމު ދޫކޮށްފައިވާއިރު، ވަރަށް ގިނަ އަދަދަކަށް ފޯމު ޑައުންލޯޑް ވެސް ކުރަމުން އަންނަ ކަމަށެވެ. ދިރާގު މެދުވެރިކޮށް، ހައުސިން މިނިސްޓްރީން ހޯދާފައިވާ ހިސާބުތަކަށް ބަލާއިރު، ބޯހިޔާވަހިކަމުގެ މަޝްރޫއު ހުޅުވާލުމާ އެކު މިހާތަނަށް 800،000 އަށް ވުރެ ގިނަ ފޯމާއި މައުލޫމާތު ޝީޓު ވަނީ ޑައުންލޯޑް ކޮށްފަ އެވެ.

އޭގެ ތެރެއިން ފޯމު ނެގި ޖުމުލަ އަދަދު ފަހުން އާއްމު ކުރައްވާނެ ކަމަށް ވެސް އޭނާ ވިދާޅުވި އެވެ.

"އަޅުގަނޑުމެންނަށް ލިބިފައި ހުރި ހިސާބުތަކަށް ބަލާއިރު، ފުރަތަމަ ދެ ދުވަސް ތެރޭގައި އެކަނި ވެސް 847،245 ފޯމާއި މައުލޫމާތު ޝީޓް ޑައުންލޯޑް ކޮށްފައިވޭ. މީގެ މާނަ އަކީ ފްލެޓަށް ވަރަށް ގިނަ އަދަދެއްގެ ބަޔަކު މިހާތަނަށް ފޯމު ނެގުން. އެ ތަފްސީލްތައް އަޅުގަނޑުމެން އާއްމު ކުރާނަން،" ފަޒާލް ވިދާޅުވި އެވެ.

މިނިސްޓްރީގެ ތަފާސްހިސާބުތަކަށް ބަލާއިރު، އެންމެ ގިނަ އަދަދެއްގެ ފޯމު ނަގަނީ އުމުރުން 18-40 ދެމެދަށް ޚާއްސަ ކުރި ކެޓަގަރީންނެވެ. މި ކެޓަގަރީގައި 40 އަހަރަށް ވުރެން މަތީގެ މީހުންނަށް ފްލެޓް ނުލިބޭތީވެ ޝަކުވާ ބޮޑެވެ.

ފަޒާލް ވިދާޅުވި ގޮތުގައި، 40 އަހަރުން މަތީގެ މީހުންނަށް މި ކެޓަގަރީން ކުރިމަތި ނުލެވުނަސް އެހެން ކެޓަގަރީތަކުން ފުރުސަތު އެބައޮތެވެ.

މި އަހަރުގެ ޖުލައި 31 ގެ ނިޔަލަށް ފްލެޓްތަކަށް ފޯމު ދޫކުރާ ގޮތަށް ވަނީ ހަމަޖައްސައިފަ އެވެ. ފޯމު ބަލައިގަންނަން ފަށާނީ އަންނަ މަހުގެ ތިން ވަނަ ދުވަހުން ފެށިގެން ޖުލައި 31 އަށެވެ. ފޯމު ދޫކުރުމަށް ޖުލައި 31 ގެ ނިޔަލަށް ދަރުބާރުގޭގެ ރަންނަބަނޑޭރި މާލަން ޚާއްސަ ކޮށްފައިވާ އިރު، ބޯހިޔާވަހިކަން ފޯރުކޮށްދިނުމަށް ހިންގާ މި މަޝްރޫއުގެ ހުރިހާ މައުލޫމާތެއް ވެސް އެ ތަނުން ލިބޭނެ އިންތިޒާމް ވަނީ ހަމަޖައްސައިފަ އެވެ. ކޮންމެ ކެޓަގަރީ އަކަށް ވަކިން ޚާއްސަ މޭޒެއް ބަހައްޓައި، މައުލޫމާތު ދޭން ހައުސިން މިނިސްޓްރީގެ މުވައްޒަފުން ތިބެ އެވެ. އަދި އެ މިނިސްޓްރީގެ ވެބްސައިޓުން ވެސް ފޯމު ލިބެން ހުންނާނެ އެވެ.

ރައީސް އަބްދުﷲ ޔާމީންގެ ސަރުކާރުން ހުޅުވާލި ބޯހިޔާވަހިކަމުގެ ފުރަތަމަ މަޝްރޫ އަށް ގާތްގަނޑަކަށް 15،000 މީހުން ކުރިމަތިލި އެވެ. އެ މަޝްރޫއުގެ ފުރަތަމަ ބުރުން ފްލެޓް ދިނީ އެންމެ 704 މީހުންނަށެވެ.

އެ މަޝްރޫއުން ފްލެޓް ނުލިބުނު މީހުންނަށް ސަރުކާރުން ދެއްކި ހައްލަކީ ހުޅުމާލޭ ދެ ވަނަ ފިޔަވަހީގެ 80،000 ފްލެޓެވެ. އެ މަޝްރޫއު ރައީސް ޔާމީން ފައްޓަވައި ދެއްވައި، ފްލެޓް އަޅަން ހަވާލުކުރީ ސަރުކާރުގެ އެކި ކުންފުނިތަކާ އެވެ. މި މަޝްރޫއުގެ ބޮޑު ބައި މި އަހަރު ނިމޭނެ ކަމަށް ލަފާކޮށްފައިވާއިރު، މިއީ ބޯހިޔާވަހިކަމުގެ ހައްލަށް ވަރަށް ބޮޑު ލުޔެއް ލިބޭނެ ކަމެއް ކަމަށް ވެސް ސަރުކާރުން ވަނީ ބުނެފަ އެވެ.