ގޭބަންދަށް ބަދަލުކުރި ކުރީގެ ދެ ފުލުހަކު ޖަލަށް ގެންގޮސްފި

ވެރިކަން ވައްޓާލަން އުޅުމުގެ ތުހުމަތުގައި ހައްޔަރުކޮށް، ފުލުހުންގެ ވަޒީފާއިން ވަކިކުރި މީހުންގެ ތެރެއިން ގޭބަންދަށް ބަދަލުކުރި ދެ މީހަކު އަނެއްކާވެސް ޖަލަށް ގެންގޮސްފި އެވެ.

މި އަށް މީހުން ގޭބަންދަށް ބަދަލުކުރީ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުންނެވެ. ނަމަވެސް އެ ފުލުހުންގެ ގާނޫނީ ވަކީލް ސަފާ ޝަރީފް މިއަދު ވިދާޅުވީ އެސްއޯގެ ކުރީގެ ކޮމާންޑަރު ސައިފް ހުސެއިނާއި ސްޓޭޝަން އިންސްޕެކްޓަ ފާއިޒް މުހައްމަދު މިއަދު އަނެއްކާވެސް ޖަލަށް ގެންގޮސްފައިވާ ކަމަށެވެ.

ސަފާ ވިދާޅުވި ގޮތުގައި އެ މީހުން ޖަލަށް ގެންދިޔައީ ލިބުނު އިންޓެލިޖެންސް ރިޕޯޓަކާ ގުޅިގެން ކަމަށް ބުނެފަ އެވެ. އެކަމާ ގުޅޭ އެއްވެސް މައުލޫމާތެއް ވަކީލުންނާ ހިއްސާކޮށްފައިނުވާ ކަމަށާއި އެހެންވެ ދިފާއުވުމަށް ކުރެވޭނެ ކަމެއް ނެތް ކަމަށް ސަފާ ވިދާޅުވި އެވެ.

އިދިކޮޅު ސިޔާސީ ލީޑަރުން ހިމެނޭގޮތަށް ނުވަ މީހަކު ދޫކޮށްލުމަށް ސުޕްރީމް ކޯޓުން އަމުރު ކުރުމާއެކު، އެ އަމުރު ތަންފީޒު ކުރާނެ ކަމަށް ބުނެ، އެސްއޯ ކޮމާންޑަރަކަށް އޭރުގެ ކޮމިޝަނާ އަހުމަދު އަރީފް އައްޔަން ކުރެއްވީ ސައިފެވެ.

ވެރިކަން ވައްޓާލަން އުޅުމުގެ އިތުރުން ސަލާމަތީ ބާރުތަކާ ދެކޮޅަށް ނުކުމެ ޣައިރު ގާނޫނީ އެއްވުންތަކެއްގެ ތެރެއިން، އަމަން ބަލަހައްޓަން ތިބި ފުލުހުންނާ މެދު މާރާމާރީ ހިންގައި ސަލާމަތީބާރުތަކާ މެދު ރައްޔިތުންގެ އިތުބާރު ގެއްލުވާލަން މަސައްކަތް ކުރި ކަމުގެ ތުހުމަތު ވެސް މި ފުލުހުންގެ މައްޗަށް ކުރެ އެވެ.